Engaado 21 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ Omwooyo kw'omutuki kuli mu bunyala bw'Omwaami okukaluuhania yaakuyira yi adaha; koti lu akaluuhania emyaalo ky'amaachi ohuhulukusira y'adahira.

² Omuundu anyala ohubaasa ati, buli siindu sy'ahola silai nisyo, nae Omwaami apiima esichiiririrwa sy'omwooyo.

³ Ohuhola ebiluungifu neende ebyadyeeri, bisangaasa Omwaami, huhira ohumuleetera ebiyaanwa.

⁴ Ohwekoomba hubi neende omwooyo kwo hwehuduumbasa, nibyo ebituka abahola-mbi, mani bino bibi nibyo.

⁵ Endekeha ch'omuundu w'esinani chimutuliramo omusaara muhoongo, nae oyo ong'ang'abanira ebiindu, yeleetera obumanani.

⁶ Obuyiinda bw'onyoola mu ngeri yitaali eyadyeeri haba sibuyiindira daawe, haandi obudaha omweene yekoonyera ohufwa.

⁷ Obwaalaba bw'abahola-mbi nibwo obwahabamaleo, olwohuba bahaya ohufukiirira ohuhola ebyadyeeri.

⁸ Obulamu bw'abahola-mbi budoondobanu nibwo, nae abaluungifu bahola ebyadyeeri.

⁹ Silai ohumenya abuundu adiyiifu hu sirama sy'enyuumba, ohuhira ohumenya neende omuhasi musolani mu nyuumba hoongo.

¹⁰ Omwooyo kw'omuhola-mbi kwekoomba ohwonoona, abulao omuundu yakwiira esisa.

¹¹ Omuundu mulekeresi n'asaandisibwa, kata omuundu otamanyire anyoola elyeeko; nae omukesi n'akerakirwa, niyemeeda ohumanya.

¹² Nasaae, Omuluungifu mweene, amanyire ebiri mu madaala k'abahola-mbi; mani achia ohubakwiisa aasi basihirire.

¹³ Oyo otawulira amaliro k'omumanani, yesi achia ohulira haandi abulao owahamuwulire.

¹⁴ Esiyaanwa syomungiso siyenjeesa etima; haandi asowa yomusyaama, yimalao egiili.

¹⁵ Abaandu baluungifu basangaalira obwadyeeri, nae obwadyeeri bunyoolesa abahola-mbi.

¹⁶ Omuundu odikaana mani yaatula hu ngira y'ohumanya achia ohwenyoola naali alala neende abafu.

¹⁷ Oyo odaha muno obulamu bw'ohwesangaasa yahabe omumanani; oyo odaha amalwa neende ohulya ebinulu haba siyahabe omuyiinda.

¹⁸ Abaandu babi abeene beleetera ebidinyu, bibateema ohukwiisa hu baandu baluungifu.

¹⁹ Silai ohumenya mu syaalo sy'esiparara ohuhira ohumenya neende omuhasi musolani haandi owekanyiirisa buli siha.

²⁰ Obuyiinda bw'engaanga budoong'a mu daala ly'omuundu mukesi, nae omuundu musiru abwekotyombera bwoosi.

²¹ Oyo oteema ohuba omuluungifu haandi ow'esisa yahayindire haandi yeswamo oluyaali.

²² Omuhoongo w'amaye mukesi ayiingira esiko sy'abaandu b'amaani mani yalikula likula ebida bi bali nibeesika.

²³ Oyo omanyirisa emboosi ch'alomaloma omweene yewonia ebidinyu.

²⁴ Oyo owehuduumbasa mani yeniinia bamulaanga ohuba omulekeeresi, owesuunga haandi otadeeba daawe.

²⁵ Obwekoombi bw'omuundu mukata nibwo obumwiita olwohuba amahono kae haba sikadaha ohuhola emirimo.

²⁶ Oludaalo lwoosi omuhola-mbi yekoomba ohubaaho neende sy'ananyoole, nae omuluungifu akaba haandi simwiimani.

²⁷ Esiyaanwa sy'omuhola mbi syoomusiro eyiri Omwaami; ohirira elalira n'asileeta neende esichiiririrwa sibi.

²⁸ Omuloli w'obubacha yahasihirire, nae oyo owulira esifune syeene, bafukiirira si alomaloma.

²⁹ Omuhola-mbi ahanana mu moni, nae omuundu muluungifu omweene aba niyemanyire.

³⁰ Abula amakesi, oba ohumanya, obulao ohukeraka, ebinyala ohuyiingania mani byaayiingira Omwaami.

³¹ Onyala ohutekeha efaraasi ohulwaana amaye, nae Omwaami niye oleeta ohuyiingira.