Engaado 20 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ Amalwa kabachirisa abakang'wa, haandi ebimeesa bikera nibayokera; haandi oyo yeesi yikakosa aba omusiru.

² Omutuki n'anyoolera aba koti edalang'i yiwoola; mani oyo amunyoolesa aba yeyiita omweene.

³ Sy'oluyaali omuundu ohwekaya obusoolo; nae abasiru nibo abadaha ohusoolanaanga.

⁴ Omukata haba salima efula niyikwa; yahakoonye esy'ohukesa mani ahaye ohunyoola.

⁵ Esichiririra sy'ebibaaso by'omuundu siri koti amaachi komulusiba, nae omuundu muwuliri niye okadaya.

⁶ Abaandu baangi beelaanga abeene bati b'esisa haandi b'obwadyeeri, nae wiina mweene onyala ohwakaana omuundu wadyeeri?

⁷ Omuundu muluungifu akeendera mubwadyeeri bwae haandi omweesikwa abaana bae baliba ab'ehabi naafwiire.

⁸ Omutuki niyehala hu sisaala sy'ohuheenga omusaango, atingaala neende emoni n'amanya esibi neende esilai.

⁹ Wiina onyala ohuboola ati, “Ndalabya omwooyo kwaange; ndi omwoolerefu, mbulaho esibi syoosi”?

¹⁰ Elatiri hyaamu neende ebipiimiro bihyaamu Omwaami sabadahiraho elalira.

¹¹ Kata omwaana muyere yeesi byaahola byeekesa koti lwaali, onyala ohumanya oti w'obwadyeeri haandi mulai niye.

¹² Amatwi kawulira neende emoni chibona, byoombi Omwaami niye owabiloonga.

¹³ Otekoombaanga endoolo, oba wekoonyera obumanani; bechaanga mwaaywe, mani olinyoola ebyohulya biingi.

¹⁴ Omukuli aboola ati, “Sino sibi nisyo, sino sibi nisyo,” nae naamala ohusikula awaao niyepaaha ati, “Sino ndoolere budoola”.

¹⁵ Yiriyo esaabbu, haandi yiriyo amakina k'engaanga maangi muno; nae siriwo esy'engaanga sitahirwa, niye omuundu olomaloma ebyaamakesi.

¹⁶ Omuundu wemerera omuteende ahoyera ohusingao engubo yae, haandi omweene ohuyera ohwesingao niyeemerera bawalukeendwa.

¹⁷ Omuundu anyunyuulirwa ebiindu bi aduhaane mu bubacha, nae luunyuma bimwechuuhira yaaba koti olya omusenye.

¹⁸ Silai ohukerakirwa mberi hu wahola esiindu; kata ohulwaana hwosi hudaha omuundu oberesa amakesi.

¹⁹ Oyo okeesa otuhuwa-huwa haba sabiiha esyaama; mani sakira otabechaanga omwiicha w'omuundu olomaloma eby'obusiru.

²⁰ Omuundu n'abwaaba laatang'ene oba ng'ina, obulamu bwae bwahabe koti etaara lisimiiswe mu siirima sya titititi.

²¹ N'onyoola ebiindu byotatangiire ohuhalaabanira, muhumaliiriha sibirimo ehabi.

²² Otaboola oti, “Njia ohwetuunga esibi” liinda Omwaami mani achia ohuhuhoonya.

²³ Elatiri hyaamu ch'omusiro eyiri Omwaami, haandi ebipiimiro bitaali ebyadyeeri haba si bilai.

²⁴ Omwaami niye otuka engeenda yeefwe; mani omuundu anyala atye ohumanya engira y'obulamu bwae yi adiirire.

²⁵ Kuba omuteego eyiri omuundu ohwanguya ohuboola ati, “Syoolerefu nisyo,” mani yachaaka ohweyichulisa luunyuma n'amalire ohweeyama.

²⁶ Omutuki mukesi amanya bumanya abahola-mbi, mani yabasaandya neende obwalaba.

²⁷ Omwooyo kw'omuundu nilyo etaara li Omwaami yamutaamo.

²⁸ Esisa neende obweesikwa nibyo ebikera omutuki yayiindira mu butuki, haandi obuluungifu bwae nibwo obwomiisa esisaala syae.

²⁹ Oluyaali lw'abaraaga nilwo amaani kaabwe, nae oluyaali lw'abakofu nicho embuchi chaabwe.

³⁰ Endawusi yiwumisa niyo eyikolola esaambo mbi, haandi ohuhuywa humalamo emise mibi.