Engaado 16 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ Omuundu niye otekeha esy'ohuhola, nae Omwaami niye oli neende emboosi yimalirihaayo.

² Omuundu abaasa mu mwooyo ati buli siindu sy'ahola silai nisyo, nae Omwaami niye opiima esiri mu mwooyo kw'omuundu.

³ Buli siindu sy'ohola sidiise Omwaami, mani ebyo byoosi by'otekeha bicha ohwolerera.

⁴ Buli siindu Omwaami yasihola naali neende esichiiririrwa, kata katyo boosi bali neende oludaalo lw'ohusihirisirwaho.

⁵ Omwaami haba saadaha buli muundu yehusya-husya, abulao yibaheeruhire esibonereso si yahababereese.

⁶ Ohuba ow'esisa neende obwadyeeri nibyo ebileheramo ebyonoono, haandi mu hutya Omwaami nihwo ohutusa omuundu mu bubi.

⁷ Omuundu n'ahola ebisangaasa Omwaami, kata abasuku bae abahola baaba abeecha bae.

⁸ Ahadiidi h'onyoola mu buluungifu hahira ebiingi bi onyoola n'otehoonyeere obwadyeeri.

⁹ Omuundu niye otekeha esy'ohuhola, nae Omwaami niye otereesa engira yae.

¹⁰ Nasaae niye otereesa enomanoma y'omutuki; niye omuhoonya mani yahaya ohudoondobana mu huheenga omusaango.

¹¹ Elatiri ndai neende ebipiimo bilai nibyo bi Omwaami adaha; haandi buli bukusi bwoosi adaha bube obwadyeeri.

¹² Syoomusiro omutuki ohwonoona, olwohuba obunyala bwae bw'ohutuka abunyoola mu huhola ebiluungifu.

¹³ Omutuki asangaalira abamuboolera ebiluungifu, haandi adaha oyo olomaloma ebyadyeeri.

¹⁴ Omutuki nanyolera, anyala kata ohwiita omuundu, mani omuundu mukesi ateemaho koti lu anyala ohumusangaasa bwaangu.

¹⁵ Omutuki n'asangaala, abaandu bae baba abalamu, haandi esisa syae siri koti ebireesi bileeta efula y'etoocho.

¹⁶ Oli neende amakesi ahira eyale esaabbu; haandi ohudoola ohumanya, silai ohuhira ohudoola efeesa.

¹⁷ Abaluungifu bebwaaba ohwonoona; haandi oyo onaawonie obulamu bwae ali neende ohwehaliirisa mu saambo chae.

¹⁸ Ohweninia huleeta ohusihirira, haandi ohwehuduumbasa hutulamo ohukwa.

¹⁹ Ohweloongoyasa mani waaba alala neende abamanani, huhira ohukabana ebiindu bipeeye neende abehuduumbasa.

²⁰ Oyo ofukiirira bi bamweekesa yahahulahulane, haandi oyo owesika Omwaami w'ehabi niye.

²¹ Omuundu ow'amakesi niye omanyihaane koti omanyire, haandi ow'enomanoma yisangaasa niye owiikusa bwaangu muno mu mboosi.

²² Amakesi k'omuundu mumanyirifu kamutuliramo obulamu, nae ohweekesa omusiru, oba ohalaabanira bihaya byeene.

²³ Omuundu w'amakesi alomaloma ebirimo amahuluundu, haandi bi alomaloma biikusa muno.

²⁴ Emboosi chisaangaasa chiri koti obuuhi, chinyunyuulira omwooyo haandi chikobosa obulamu mu mubiri.

²⁵ Engira yi muundu abaasirisa ati ndai, nayo niyo eyimuyira mu hufwa.

²⁶ Obwekoombi nibwo obuleetera omuundu ohuhalaabana; olwohuba adaha ohulya yekute.

²⁷ Omuundu mubi obula obuhoonyi akoonya engira y'ohuyaala abaandu baandi, haandi enomanoma yae yaaduha koti omuliro.

²⁸ Abaandu badoondobanu bakeesa obusoolo, haandi omumoonyi akabuhania ab'obwiicha.

²⁹ Omuundu mwaalaba abachirisa owaasye, mani yamuta hu ngira yitali ndai.

³⁰ Oyo ofwiinya emoni aba atekeha ebiindu bidoondobanu, haandi oweluma-luma omunwa aba ali neende esyonoono syatekeha ohuhola.

³¹ Embuchi ch'obukofu nicho ekofia y'oluyaali; haandi nicho omukabo kwobulamu buluungifu.

³² Omudiira kaala otanyoolera bwaangu, ahira omulwaani w'amaani, haandi owetuka mu mwooyo ahira owaamba esiko.

³³ Abaandu bahubba eha babone esinatulemo, nae Omwaami yeeng'ene niye oheengao yi yinakwiire.