Engaado 15 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ Ohukobolamo kaala hwakamya etima, nae emboosi ch'obwaalaba chisiingisa etima.

² Abakesi balomaloma ebiindu bihoyera, nae abasiru balomaloma ebitahoyera.

³ Omwaami abona buli abuundu, atubona nihuhola esibi oba esilai.

⁴ Ohulomaloma neende esisa huleeta obulamu, nae enomanoma y'obwalaba yimalamo omwooyo.

⁵ Omusiri alekeeresa engeraka ya laatang'ene, nae oyo omuundu muwuliri afukiirira ohwolobwa.

⁶ Mu madaala k'abaandu baluungifu mubaamo obuyiinda buungi, nae mu ngaanga ch'abahola-mbi haba simubaamo omuleembe.

⁷ Abakesi bi balomaloma byeekesa ohumanya, nae ebibaaso by'abasiru haba sibiri bityo.

⁸ Esiyaanwa sy'abahola-mbi syoomusiro eyiri Omwaami, nae ohwekongooya hwo muluungifu husangaasa Omwaami.

⁹ Omwaami haba saadaha engeri y'abahola-mbi, nae adaha abateemaho ohuhola ebiluungifu.

¹⁰ Oyo otula hu ngira y'obwadyeeri, wohusaandisibwa muno, oyo otadaha hukololwa achia ohufwa.

¹¹ Omwaami amanyire ebidiira hu emakoombe neende Abbadoni, mani siina esimukayira ohumanya ebidiira hu myooyo ky'abaandu!

¹² Omuundu mulekeresi haba s'adaha hwolosibwa; haandi haba s'adaha ohweteebaho hu baandu bamuhiraho amakesi.

¹³ Omusangaafu mu mwooyo, amweenya, nae owengisa mu mwooyo, omumanyira mu moni.

¹⁴ Ebibaaso bw'omuundu muwuliri bikoonya ohumanya, nae abasiru basangaala mu butamanya.

¹⁵ Endaalo choosi ech'abaandu basaandisibwa mbi nicho, nae abasangaafu mu mwooyo bali koti abali mu sidyaalo sy'endaalo sitakama.

¹⁶ Ohuba neende ebidiidi notya Omwaami, silai ohuhira ohuba neende ebiingi nonyoola ebidinyu.

¹⁷ Silai ohulya elyaani ni mwaheerana, ohuhira ohulya ebiriiro nimuhayaane.

¹⁸ Omuundu w'etima asiingisa obusoolo, nae omudiira kaala amalao amayiingi.

¹⁹ Engira y'omukata, lukaka lw'amawa, nae omuhoosi kw'omuluungifu, nikwo engira ngwalaafu.

²⁰ Omwaana mukesi, niye esangaalo lya laatang'ene, nae omuundu musiru aswaasa ng'ina.

²¹ Otali omukesi asangaalire obudoondobanu, nae omuundu muwuliri adaha ohuhola ebilai.

²² Ataali ohukerakirwa, s'onyala huhola esilai, nae nooli neende abahukerakira, buli siohola sibitamo.

²³ Ohukobolamo ebyadyeeri, nilyo esangaalo ly'omuundu, haandi emboosi yadyeeri mu biha bilai, ndai niyo.

²⁴ Abaandu b'amakesi badiira engira yicha eyiri obulamu, hu banyale ohwebwaaba eyihirira Seyoli mu makoombe.

²⁵ Omwaami asihirisa amadaala k'abaandu beehuduumbasa, nae aliinda haandi yomiisa ebiindu by'abahasi bafwiirwe.

²⁶ Ebibaaso by'abahola-mbi by'omusiro eyiri Omwaami, nae asangaalira emboosi ch'abaandu boolerefu.

²⁷ Oyo olaluhira engaanga yanyoola mu ngira mbi, aleetera edaala lyae ebidinyu, nae oyo otakulirirwa, niye owahawangaale.

²⁸ Abaandu baluungifu babaasa mberi hu bakobolamo, nae ababi balomaloma ebitahoyerwa.

²⁹ Omwaami haba s'adeeba hu bahola-mbi, nae awulira ohwekongooya hw'abaluungifu.

³⁰ Omuundu oli neende esangaalo mu moni aleeta esangaalo mu mwooyo, haandi emboosi ndai chileeta omwehoyo.

³¹ Omuundu ofukiirira ohukerakirwa ebimwoombaha, achia ohubalirwa mu b'amakesi.

³² Oyo ohaya ohukerakirwa, omweene yefwiirisa, nae oyo ofukiirira ohukololwa, yemeeda ohumanya.

³³ Ohutya Omwaami, nihwo ohukerakirwa mu makesi, haandi obuloonga nibwo obutaangirira ohunyoola oluyaali.