Engaado 14 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ Amakesi k'omuhasi niko akoombaha edaala, nae obusiru bwae nibwo obulisihirisa.

² Oyo okeendera mu buluungifu yekesa koti lu yeesa oluyaali mu Omwaami, nae omudoondobanu yekesa koti lu alekeeresa Omwaami.

³ Enomanoma y'omusiru niyo endawusi yimuhuya, nae enomanoma y'abakesi niyo eyibaliinda.

⁴ Ataali endaawu chirima, ebyaaki by'emere biba ebihaya; nae ali endaawu chirima, ebyaaki biichulamo emere.

⁵ Omuloli w'obwadyeeri haba saabacha, nae omuloli w'obubacha alomaloma eby'obubacha byoong'ene.

⁶ Omuundu mulekeresi akoonya amakesi mani yahaya ohukanyoola, nae omuundu muwuliri amanya bwaangu.

⁷ Tula eyiri omusiru olwohuba abula esilai syahweekesa.

⁸ Amakesi k'omuundu muwuliri kamweekesa esy'ohuhola, nae obusiru bw'abasiru bubabachirisa.

⁹ Nasaae asaandya abahola-mbi, nae abaluungifu banyoola esisa syae.

¹⁰ Omwooyo kweene nikwo okumanyire engisa yakwo, haandi abulao omuundu wuundi omanyire esangaalo lyakwo.

¹¹ Enyuumba y'omubi yahasihiriswe, nae esikaali sy'omuluungifu syahadoong'e nisyeemere.

¹² Engira yi muundu yabaasirisa ati ndai, nayo niyo eyimuyira mu hufwa.

¹³ Enjeho chinyala ohukisa engisa, haandi esangaalo yatulamo ohweyendeherera.

¹⁴ Omuundu muhyaamu yeechulamo ebyaamo by'engira chae mbi, nae omuundu mulai yeechulamo ebyaamo byae bilai.

¹⁵ Omuundu musiru afukiirira buli siindu, nae omumanyirisi ataangira yehaliirisa mberi yali ohuchia.

¹⁶ Omuundu mukesi yehaliirisa bulai mani yaahaya ohuhola esitahoyera, nae omusiru saadebayo mani yaabbibbilihana bwaangu ohwonoona.

¹⁷ Omuundu w'etima lya bwaangu ahola ebitaalimo amakesi, nae omuundu mukesi mudiira kaala niye.

¹⁸ Abasiru banyoola ebihoyera neende obusiru bwaabwe, nae abakesi banyoola omukabo kwohumanya.

¹⁹ Ababi beenamira abalai, abahola-mbi bahekweede abaluungifu.

²⁰ Abulao omuundu odaha omumanani, kata yaahaba owaasye mweene, nae abayiinda baba neende abeecha baangi.

²¹ Oyo olekeeresa owaasye, muhola-mbi niye, nae oyo okwiira abamanani esisa, aba neende ehabi.

²² Ababaasa ohuhola ebibi badoondobanu, nae ababaasa ohuhola ebilai banyoola oluyaali haandi babesika.

²³ Muhudidiihana hwoosi mulimo engaanga, nae ohulomaloma hwoong'ene huleeta obumanani.

²⁴ Omusaara kw'abaandu bakesi nikwo amakesi kaabwe, nae abasiru obamanyira mu busiru bwaabwe.

²⁵ Omulori alomaloma obwadyeeri awonia obulamu, nae oyo owebwangula neende obubacha, alya mu baandu olukwe.

²⁶ Mu hutya Omwaami, omuundu anyoola obugumu, haandi abaana bae bahanyoole obweyikamo.

²⁷ Ohutya Omwaami nimwo mu bulamu butula, hu muundu anyale ohuwona emiteego ch'ohufwa.

²⁸ Oluyaali lw'omutuki lweema hu buungi bw'abaandu baatuka, nae omutuki obula abaandu baatuka abula oluyaali.

²⁹ Oyo otanyolera bwaangu awulira muno, nae ow'etima lya bwaangu, akinia obusiru.

³⁰ Oyo oli neende omuleembe mu mwooyo, omubiri kwae kwosi kuba omulamu, nae embaliha yikera amakuumba nikahomaka.

³¹ Oyo ofwiinyirira omumanani, aba alekeeresa omuloongi wae, nae oyo okwiira esisa ababi mu budahano, yeyisamo oluyaali.

³² Abahola-mbi basihirira mu huhola ebyonoono hwaabwe, nae abaluungifu bafwa nibali neende esuubi.

³³ Amakesi kamenya mu bibaaso by'omuundu muwuliri, nae esiri mu myooyo ky'abasiru haba sisimanyihaane.

³⁴ Obuluungifu buleetera esyaalo oluyaali, nae esyonoono simala oluyaali mu muundu yeesi.

³⁵ Omuhalaabani ohola emirimo kyae neende amakesi asangaasa omutuki, nae anyoolerera oyo ohola eby'esoni.