Engaado 10 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Engaado cha Solomooni

¹ Omwaana w'amakesi asangaasa laatang'ene, nae omwaana musiru aleetera ng'ina engisa.

² Emyaandu kinyoolehana mu huhola obubi kibulamo engaanga, nae obuluungifu buwonia obulamu bwao.

³ Omwaami haba siyahalehe omuundu muluungifu yaafwa enjala, nae achia ohukayira ababi ohunyoola ebiindu bi beekoomba.

⁴ Emihono mikata kileeta obumanani, nae eky'esinani kileeta obuyiinda.

⁵ Omwaana okesa mu ndaalo ch'esiruumbi mukesi niye, nae omwaana weeyalisa mu ndaalo cheekesa aleeta esoni.

⁶ Omuundu muluungifu anyoola ehabi nyiingi, nae ababi balomaloma eby'obwaalaba.

⁷ Omuundu muluungifu anechulisweenge mbwe w'ehabi, nae eliita ly'omuhola-mbi lyahabole.

⁸ Omuundu mukesi afukiirira ebilagiro, nae oyo olomaloma eby'obusiru achia ohusihirira.

⁹ Omuundu okeendera mubwadyeeri aba bulai, nae oyo owehubbira-hubbira yahamanyihane.

¹⁰ Omuundu okisa obwadyeeri n'afwiinya-fwiinya emoni aleeta ebidinyu, nae oyo owoolyobya ataali ohutya hwoosi, aleeta omuleembe.

¹¹ Emboosi ch'omuundu muluungifu, nimwo omutula obulamu, nae emboosi ch'omuundu mubi chikisa obwaalaba.

¹² Ohulekana huleeta obusoolo, nae ohudahana huleheramo ebisobyo byoosi.

¹³ Mu mboosi ch'omuundu owulira onyoolamo amakesi, nae omukoongo kw'omuundu musiru kuhoyerwa ohuhuywa endawusi.

¹⁴ Abaandu bakesi haba sibahaywa esy'ohulomaloma, nae ohwebwangula hw'omusiru husudya aambi ohusihirira.

¹⁵ Obuyiinda buliinda omuyiinda; obumanani busihirisa omumanani.

¹⁶ Omusaara kw'omuundu muluungifu nikwo obulamu, omuheemba kw'omuhola-mbi nisyo esyonoono.

¹⁷ Oyo ofukiirira ohukerakirwa ali hu ngira y'obulamu, nae oyo otadaha ohwoolosibwa, yahanyoole ebidinyu.

¹⁸ Omuundu okisa-kisa obulekani, mubacha niye, haandi oyo obachira owaasye, musiru niye.

¹⁹ Mu hulomaloma emboosi nyiingi, haba simuhayamo emboosi ehyaamu, nae oyo owebulerera, aba omwehaliirisa.

²⁰ Emboosi ch'omuundu muluungifu chiri nga efeesa ndai muno; ebibaaso by'omuundu mubi, bibulamo obuhoonyi.

²¹ Emboosi ch'omuundu muluungifu chihoonya abaandu baangi, nae abasiru bafwa olw'ohuhaya obutamanya.

²² Ehabi ch'Omwaami chileeta obuyiinda, haandi chibulamo engisa.

²³ Ohuhola ebibi nikwo omubayo kw'omusiru, nae ohuhola eby'amakesi nilyo esangaalo ly'omuundu muulisi.

²⁴ Ebiindu bi muundu mubi atya nibyo ebyahamukweeho, nae omuluungifu yahanyoole bi yekoomba.

²⁵ Omuyaka kw'amaani nikuwuucha, ababi bahadumuuhe, nae omuluungifu yahomiire endaalo choosi.

²⁶ Koti lu malwa kahaliihe keeta ameeno, haandi omwoosi kuwofusa emoni, nilwo lu biri n'otuma omuundu muteengu.

²⁷ Ohutya Omwaami hukera omuundu yayiindira, nae emyaaka ky'omuundu mubi kyaheembikitanisibwe.

²⁸ Esuubi ly'omuundu muluungifu lileeta ohweehoya, nae ohusuubira hw'abahola-mbi hwa bihaya.

²⁹ Omwaami niye amaani k'abaandu baluungifu, nae asihirisa ababi.

³⁰ Abaluungifu haba sibahamalweo, nae ababi haba sibahayiindire mu syaalo.

³¹ Abaandu baluungifu balomaloma eby'amakesi, nae abadoondobanu mu hulomaloma bahaakamisibwe.

³² Abaandu baluungifu bamanyire esihoyerwa ohulomwalomwa, nae ababi balomaloma ebidoondobania abaandu.