Ebiholwa 8 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ Haandi Saulo yesi yeboneraho omweene ohufwa hwa Sitefaano huno. Hu ludaalo lweene olwo, nilwo lu hwiitwa huhoongo muno ohwa abafukiiriri bali mu Yerusalemu hwachaakiraho; boosi baasalaanira mu syaalo syoosi sya Yudea neende esya Samaria, ohutusaho Abatume boong'ene nibo abadoong'a mu Yerusalemu.

Saulo asaandya abaandu bafukiirira Yesu Kristo

² Abaandu bali baheera muno efukiirira ya Yesu Kristo basiiha Sitefaano, mani baamala baamulira muno.

³ Nae Saulo esiha syeene esyo yali naali ohusaandya muno abaandu bali bafukiirira mu Yesu Kristo, niyeengira maloondehania mu buli nyuumba, n'adiira abasaacha alala neende abahasi n'abayira ohubeekalira mu jeela.

Emboosi Ndai yiyaalwa mu Samaria

⁴ Nae bulaanu, abaandu bali niberuuhe nibasalaanire bachaaka ohukeendanaanga nibayaala Emboosi eyo.

⁵ Filipo yehirira yaachia mu siko sihuluundu sya Samaria, n'ayaalira abaandu bali bamenya mu bweene omwo ebidiira hu Kristo.

⁶ Omukaanda muhoongo kw'abaandu nikuli neende omwooyo mulala, kwafukiirira ebiindu bi Filipo yali ohuboolaanga, nibatekeresa haandi nibabona eby'amayia bi yaholaanga.

⁷ Olwohuba ebihyeeno ebiingi byatulaanga mu baandu baangi, nibiririra mu kono hoongo muno; haandi abaandu baangi balichiingi nibebokoya emibiri neende abalema bawonisibwaanga.

⁸ Esangaalo liingi muno lyeecha lyaaba mu siko sihuluundu esyo.

⁹ Nae yaliwo omusaacha wuundi olaangwa ati Simooni owali hale niyalakulaanga mu siko sihuluundu omwo owawukiaanga esyaalo syoosi esya Samaria, haandi yabolaanga ati omweene yali omuundu muhunuufu muno.

¹⁰ Abaandu boosi bali nibamuwulira muno, ohutulira elalira hu muundu wa aasi muno, ohwoolera elalira hu muundu muhunuufu muno, babolaanga bati, “Omusaacha wuno niye amaani kala aka Nasaae akalaangwa mbwe Amahunuufu.”

¹¹ Abaandu boosi bali bamuwulira muno, olwohuba hulw'embaka endeeyi muno, omusaacha oyo yali yabatiisa muno neende amayia kae kano.

¹² Nae abaandu abo bafukiirira mu Filipo, koti luyayaala Emboosi Ndai chidiira hu Bwaami bwa Nasaae, haandi neende eliita lya Yesu Kristo, baabatiisibwaanga sidubaanie, abasaacha neende abahasi.

¹³ Kata neende Simooni mweene yesi yeecha yafukiirira, mani luunyuma lw'ohubatiisibwa, yachaaka ohukeendaanga neende Filipo. Niyali niyahamala ohubona ebilolero biingi alala neende eby'amayia bihunuufu muno nibiholwa, yesi yeemao yaatya muno.

¹⁴ Nae bulaanu abatume bali nibali mu Yerusalemu nibawulira bati esiko sihuluundu sya Samaria syali nisimalire ohunyoola emboosi ya Nasaae, babatumira Petero neende Yowaana,

¹⁵ abeehirira mani balaamira abaandu abo eyiri Nasaae bati banyale ohunyoola Mwooyo Mwoolerefu;

¹⁶ olwohuba haba siyali niyeehaho hu muundu yeesi hu abo, nae bali nibamala ohubatiisibwa sa mu liita ly'Omwaami Yesu.

¹⁷ Petero neende Yowaana abo beesa hu baandu abo amahono kaabwe, banyala ohunyoola Mwooyo Mwoolerefu.

¹⁸ Nae bulaanu, Simooni niyamala ohubona ati Mwooyo yali naakabibwa ohubitira mu hwisaanga amahono k'abatume hu baandu, yahengao ohubaberesa eseende,

¹⁹ n'aboola ati, “Mumbeereseho syesi amaani kano, hu buli muundu yeesi syesi yi mba ninjisaho amahono kaange anyaleenge ohunyoola Mwooyo Mwoolerefu.”

²⁰ Nae Petero yamuboolera ati, “Efeesa yao eyo, yisihirire naawe omweene, olwohuba obaasire oti onyala ohwenyoolera esiyaanwa sya Nasaae sino niwehoonyera sa eseende!

²¹ Ewe haba sooli neende kata omukabo kwoosi, oba eha yoosi mu biindu bino, olwohuba omwooyo kwao haba simuluungifu mu moni wa Nasaae.

²² Weyolobye mu buhyaamu bwao buno, omale olaame eyiri Omwaami oti nisiba nisinyalihana, esichiiririrwa siri mu mwooyo kwao okwo sihoyere ohuhuleherwamo.

²³ Olwohuba ndi ohubona endi mbao hane oli mubuchuuni bwehali-hali haandi neende mu jeela y'ebibi.”

²⁴ Simooni yakobolamo ati, “Naamireho eyiri Omwaami oyo, oti kata esiindu silala hweebyo byoosi by'olomaloome sitanyala ohunjolaho.”

²⁵ Bulaanu, nibali nibamalire ohutusa obuloli haandi neende ohulomaloma emboosi y'Omwaami, bakobola Yerusalemu, nibayaala Emboosi Ndai mu ngoongo nyiingi muno ech'abaandu Basamaria.

Filipo neende Omuyitiopia muhoongo

²⁶ Nae malaika w'Omwaami yeecha yaboolera Filipo ati, “Siingira ochiire emwaalo w'engira yiihirira niyitula Yerusalemu niyichia Gasa.” Engira yino yomu siparara niyo.

²⁷ Filipo yaasiingira yaacha. Nae boneho, Omuitiopia mulooye, omubiihi muhoongo w'eseende ch'Omutuki muhasi Muitiopia yali niyeechere mu Yerusalemu ohwiinamira Nasaae.

²⁸ Yali hwali ohukobolayo engo; niyali huyehaale mu sigaari sihweeswa neende esuhiri, naali ohusomaanga mu sitabo sy'omunabbi Yisaaya.

²⁹ Mwooyo yaboolera Filipo ati, “Yalaalaho wakaane esigaari sino.”

³⁰ Filipo yeeruha yamwoolaho, yawulira omusaacha oyo naali ohusomaanga esitabo sya Yisaaya munabbi, yateeba ati, “Oli ohumanyirisaanga byooli ohusomaanga?”

³¹ Nae yaboola ati, “Ndahanyala endye ohumanya, omuundu wuundi n'atanyimiriire?” Yalaanga Filipo aniine aakulu yaali, yehale nae.

³² Bulaanu esituundu sy'ebyandiiko byoolerefu si yali naali ohusomaanga syali sino: “Koti ekoondi liyirwa ohusiinjwa oba omwaana kw'ekoondi nikuli mu moni womubeki kudimbaanga, yesi kata haba siyaasamaho omunwa kwae.

³³ Naali muhuswaasibwa, obwadyeeri bwamwiimwa. Wiina onyala ohuboola ebidiira hu lwiibulo lwae? Olwohuba obulamu bwae buli ohumalibwa hu syaalo.”

³⁴ Omulooye oyo yaboolera Filipo ati, “Wiina mweene, mubwadyeeri bweene, yi munabbi wuno ali ohulomalomaho bino, yelomalomaho omweene, oba hu omuundu wuundi?”

³⁵ Filipo mani niyaasamya omunwa n'achaaka ohulomaloma. Yachaakira hu byandiiko byeene bino; yamuboolera Emboosi Ndai cha Yesu.

³⁶ Nibali nibasikeendaanga hu ngira eyo boola eyiri amaachi; omulooyo oyo yaboola ati, “Bona, amaachi ngano! Siina syeene esinyala ohuungayira ohubatiisibwa?”

³⁷ Nae Filipo yaboola ati, “Nooba n'ofukiirira neende omwooyo kwao kwoosi, onyala ohubatiisibwa.” Nae yamukobolamo ati, “Fukiirira endi Yesu Kristo niye Omwaana wa Nasaae.”

³⁸ Yalagira esigaari syeeme, mani boombi beeha aasi baachia mu maachi, mani Filipo n'abatiisa omulade oyo.

³⁹ Boombi batula mu maachi, Mwooyo w'Omwaami yabukula Filipo; omulooye oyo haba siyamubonaho haandi, mani yeweerao niyehoya.

⁴⁰ Nae Filipo yabonehanirwa naali mu Asooto, n'achiiririra neende olukeendo lwae olwohuyalaanga Emboosi Ndai eyiri ebiko byoosi ohwoola lu yoolera Kaisarea.