Ebiholwa 6 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Abahoonyi bataanu-na-babiri

¹ Bulaanu endaalo echo, abeeki nibachaaka ohwemeeda ohwiingiya, Abayudaaya balomalomaanga Olugiriki bachaaka ohwekanyiirisa hu Bayudaaya beene bati abahasi bafwiirwe baabwe bali nibalehwaangwa nibatabeereswa obuhoonyi bwakabwaangwa.

² Abeeki ehumi-na-babiri abo balaanga omukaanda kwa abeeki boosi baababoolera bati, “Haba sisihoyera efwe ohulehuulira ohuyalaanga emboosi ya Nasaae haandi huchaake ohukabaanga abaandu ebiindu by'obuhoonyi.

³ Mani sakira basyaange, mwedoolemo abasaacha bataanu-na-babiri abali neende ebiima bilai, abechula Mwooyo alala neende amakesi, ba huhoyeere ohuberesa omulimo kuno.

⁴ Nae efwe hunewaayo neende omwooyo mulala hwedeeke ohulaaamanga Nasaae alala neende ohuyalaanga emboosi yae.”

⁵ Ebiindu bi baboola ebyo byoosi byeecha byasangaasa abaandu abo boosi, badoola Sitefaano, omusaacha wali niyeechula efukiirira alala neende Mwooyo Mwoolerefu, alala neende Filipo, alala neende Purokoro, alala neende Nikanori, alala neende Timoni, alala neende Parimena, alala neende Nikola Omugiriki wali n'atula mu Atiokia owali niyeengira mu diini y'Esiyudaaya.

⁶ Abaandu bano bateebwa mu moni w'abatume, babalaamira eyiri Nasaae, mani babeesaho amahono kaabwe.

⁷ Emboosi ya Nasaae yemeeda ohusalaana; obuungi bw'Abeeki bwemeeda muno mu Yerusalemu, omukaanda muhoongo kw'abalaamisi kwosi kweeyama efukiirira yino.

Ohudiirwa hwa Sitefaano.

⁸ Sitefaano, niyeechuule embabaasi nyiingi neende amaani, yahola ebiindu by'amaya ebihuluundu muno, alala neende ebilolero mu baandu abo.

⁹ Bulaanu abaandu baandi bali abomu Sinagoogi y'Abaandu Baboolole (koti lu yali niyilaangwa), alala neende eya Abasireeni, alala neende Abalekisaandaria, alala neende abaandu batula mu Silisia alala neende Asia, basiingira bachaaka ohuyiingana neende Sitefaano.

¹⁰ Nae haba sibanyala ohuyiingania amakesi alala neende Mwooyo bi Sitefaano yehoonyeraanga naalomaloma nabo.

¹¹ Bachaaka ohuserera abasaacha baandi mu bweekisi baboole bati, “Humuwuliire naalomaloma emboosi chifwoola Musa alala neende Nasaae.”

¹² Basaangulusa abaandu boosi alala neende abahuluundu b'enono, alala neende abeekesa b'Amalako ka Musa, boosi baamukwaaho baamudiira, baamala baamuleeta mu moni w'esiina,

¹³ bamala bataao abaloli bobubacha ababoola bati, “Omusaacha wuno yalumiirira obutayeera ohulomaloma emboosi mbi Abuundu Woolerefu ano alala neende amalako ka Musa;

¹⁴ olwohuba efwe humuwuliraanga n'aboola ati, Yesu w'e Nasareeti wuno achia ohusihirisa abuundu ano, haandi achia ohukaluuhania emiduunga ki Musa yatudiisa.”

¹⁵ Abaandu boosi abali mu siina omwo nibali nibamuhang'asiireho emoni chaabwe, babona bati obweeni bwae bwali nibufwaana koti obweeni bwa malaika.