Ebiholwa 27 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Paulo asyaabala naachia Rooma

¹ Mani syabiswa siti efwe huhoyere ohusyaabala ohuchia mu Yitali, baata Paulo alala neende ababoye baasye mu mahono k'omuhongo w'abasikaari emia ndala ow'omukaanda kwa Agusitani olaangwa Juliasi.

² Nihwamala ohwiingira mu meeri eya Adiramitiomi, eyali niyiri aambi ohuchaaka ohusyaabala niyichia hu bikobero biri hu lwaasi lwa Asia, hweemao hwakwiisira mu nyaanja, nihuli alala neende Arisitariko, Omumakedonia ohutula Tesalonika.

³ Hu ludaalo lwaloondaho hwakobera Sidoni; Juliasi yaliinda Paulo neende esisa siingi muno, mani yamulehuula ati anyale ohuchia eyiri abeecha bae haandi anyale ohuliindirwa eyo.

⁴ Mani hwakwiisira mu nyaanja nihutula ao, hwasyaabala nihwehiingire olukoongo lwa Saipurasi, olwohuba omuyaka kwa buyaanja kwali kuwucha nikutuchoomere.

⁵ Nihwali nihumalire ohusyaabala nihuhalakaanie enyaanja eyihededya eyale neende esyaalo sya Silisia neende esya Pafilia, hwanyala ohwoola Mira mu Lisia.

⁶ Ebweene eyo, niyo yi muhoongo w'Abasikaari emia ndala wula yeecha yanyoola emeeri y'Alekisaandiria niyiri ohusyaabala niyichia Yitale, mani naamala natwiingisa eyeene eyo.

⁷ Hwasyaabala kaala-kaala hulw'embaka y'endaalo chiyera hooho, mani hwamala hwoola aambi neende Sinido nihunyahaane muno, mani koti buyaanja kwahaya ohutufukiirira ohwemeeda mu moni neende olukeendo lweefwe, bulaanu hwasyaabala haandi nihwekisire emukoongo wolukoongo lwa Kireete endulo wa Salimone.

⁸ Nihuhededisiria hu ndulo w'enyaanja nihunyaahana muno, hweemao hwanyala ohwoola abuundu alaangwa mbwe, Esikobero Silai, esyali sisibiraane aambi neende esiko sya Lasea.

⁹ Mani koti embaka endeeyi muno lu yali niyinyasiihe, haandi olukeendo lwosi lwali niluli olw'amasira, olwohuba obwiire bw'esisiibo bwosi bwali nibumalire ohubita, Paulo yabakerakira,

¹⁰ n'aboola ati, “Bahuluundu baange, mbano ndi ohubona endi olukeendo luno luchia ohubaamo ohunyaaliha alala neende ohufwiirwa ohuhoongo muno, eyitaali emigugu choong'ene alala neende emeeri, nae eyiri neende obulamu bweefwe bwosi.”

¹¹ Nae omuhoongo w'abasikaari wula, yafwaayo muno ohuloonda aka kaputeeni w'emeeri neende ak'abeene meeri, ohuhira ka Paulo yali n'aboolere.

¹² Olwohuba esikobero esyo haba sisyali nisiri esilai ohweyikamamo obunyifu bw'etoocho, abaandu bahira obuungi bakeraka bati b'amaye kadoong'a nibali mu nyaanja bweene, nibabaasa bati ehabi niyibadiira kata banyala basyaabala boola hu Foenikisi, esikobero sya Kireete, esitingaalire emukulu butula lyuuba neende emukulu muumbo, mani banyala ohweyikama ebweene eyo obunyifu bw'etoocho.

Omuyaaka kw'amaani mu nyaanja

¹³ Mani omuyaka kwa buyaanja kutulira emwaalo nikwachaaka ohuwuucha kaala-kaala, mani bosi nibabaasa bati Awuundi mbao bamalire ohunyoola esifune syali syaabwe, baasiingisa enaanga mani bachaaka ohusyabalira hu ndulwo wa Kireete, aambi neende eloba.

¹⁴ Nae abweene ao, omuyaka kw'amaani, okulaangwa mbwe emukulu w'ebukwe, kwasyuuha nikutulira hu lukoongo;

¹⁵ emeeri yadiirwa, mani byayihaya ohuchooma mu muyaka okwo, hwakulehera mani hwafuutwa nihuyirwa.

¹⁶ Nae nihwaba koti abeeruhira mu siiniha sy'esisiinga siindi sidiidi silaangwa Kauda, hwanyala ohunyaahana muno hwawonia elyaato;

¹⁷ nihwamala ohuliniinia hu meeri, hwaliboya neende emikoye nihubodoohania emeeri; nae bulaanu, nihwali nihutya huti hunyala ohuchia hweengira mu lugulu lw'omusenye eyale neende olwaasi lwa Libbya hweesa etaanga mani hwaleha emeeri niyiyirwa neende omuyaka.

¹⁸ Mani koti lu hwali nihubbirwe muno neende omuyaka hu ludaalo lwaloondaho, bachaaka ohusukuna emigugu chiindi mu lusiba;

¹⁹ haandi hu ludaalo lwohudatu, bahalaka neende amahono kaabwe abeene, ebituundu by'emeeri biindi nibabisukuna ebusiba.

²⁰ Nae bulaanu kata elyuuba kata eng'ining'ini nibitanyala ohubonehanaho hulw'embaka y'endaalo enyiingi, haandi nae omuyaka nakwo kulumiriire ohuwuucha muno, esuubi lyeefwe elyali ely'ohuwona lyoola lyatutulamo lyoosi.

²¹ Koti lu bali nibamalire embaka endeeyi muno nibatalichaanga, Paulo yetusayo mu baasye mani yamala yaboola ati, “Basaacha basyaange, muba mutekeereseho akaange, haba simuba musyabaale ohutula mu Kireete mwoola ohunyoola ohunyaaliha huno alala neende ohufwiirwa hwakiire ano huti.

²² Ese bulaanu ndi ohubekweeda endi mugume emyooyo; olwohuba haba siyichia ohubaao ohukosa obulamu mweeng'we daawe, ohutusaho emeeri yoong'ene.

²³ Olwohuba esiro syeene sino, malaika wa Nasaae yandeyambaaniaho, haandi oyo yi nyinamiraanga, yeechere yeema aambi naange,

²⁴ yaboola ati, ‘Otatya haba daawe ewe Paulo; ohoyere ohwoola waachia weema mu moni wa Kaisaari; mani mbao, Nasaae amalire ohuhuberesa abo boosi abali ohusyaabala naawe.’

²⁵ Mani sakira eng'we mugume sa emyooyo, basyaange, olwohuba ese ndi neende efukiirira mu Nasaae endi bicha sa ohuba koti sa lu mboleerwe.

²⁶ Nae kata katyo, huhoyeere ohuyirwa paka hweduuya hu sisiinga syoosi-syoosi.”

²⁷ Bulaanu, esiro sy'ehumi neende bine nisyoola, nihwali huhuli ohubengaanga nihuhalakania enyaanja ya Aduria, aambi esiro akati, abeerusi b'emeeri bachaaka ohubaasirisa bati Awuundi huli aambi ohwoola hu lukoongo.

²⁸ Mani sakira bachaaka ohudiimbula ekina liriho obusito mu maachi nibatekeeresa ekono lilihola, mani baabala bakaana emiita amahumi kane ohwiiha aasi hu lweero.

²⁹ Mani nibachaaka ohutya bati hunyala hwoola ohwehuya hu nyanda, balehuula enaanga chine enaamba ohutula hu numa, nibamala bachaaka ohwekongooya Nasaae obwiire butere buhye.

³⁰ Koti lu beerusi b'emeeri bali nibachaaka ohuheenga amakesi k'ohwiiruha ohutula mu meeri, haandi nibamalire ohwiisa elyaato nilyoolere hu maachi k'enyaanja, nibali ohwekaadya koti abali huhwisaanga enaanga chiri mu moni w'emeeri,

³¹ Paulo yaboolera omuhoongo w'abasikaari alala neende abasikaari beene ati, “Abasaacha bano nibatadoong'a nibali mu meeri muno, haba simuchia huwonisibwa daawe.”

³² Abasikaari abo baheenga emikoye kyali nikidiirire elyaato elyo, mani kaleha elyaato lyawaao.

³³ Bulaanu koti lu bwiire bwali nibuli aambi ohuhya, Paulo yayiika boosi ohubukulaho neende ohulyaaho ebyohulya n'aboola ati, “Nyaanga yino ni oludaalo lw'ehumi-na-hane lu mumalire nimuli mu hukanaakana haandi nimutaalyaaho ebyohulya, haandi n'abulao esiindu syoosi simuliireho.

³⁴ Mani sakira ese ndi ohubasaba mulyeeho ebyohulya; bicha ohubabaaho amaani, koti lu kata olwooya lulala lutacha ohukotaho ohutula hu mutwe kw'omuundu kata mulala hweeng'we.”

³⁵ Paulo niyali amalire ohuboola sa atyo, omweene yabukula omugaati, niyamala ohweebasa Nasaae mu moni w'abaandu boosi, yaakudonyadonya, yachaaka ohukulya.

³⁶ Bulaanu boosi balaluhamo esuubi mani baalya ebyohulya abeene.

³⁷ (Efwe fweesi hwali abaandu emia chibiri neende amahumi kataanu-na-kabiri, neende basaasaba mu meeri eyo.)

³⁸ Nibali nibamalire ohulya ebibayera, bachaaka ohwanguya emeeri, nibasukuna engaano yoosi mu nyaanja.

Ohwabuhanamo hw'emeeri

³⁹ Bulaanu nibwali nibuhyeere, haba sibeecha bamanyirisa olukoongo daawe, nae baabona eloba lyasondoohera mu nyaanja niliriho esikobero, yibachaaka ohutekeha bati nikali mbwe sinyaliha, banyale ohukobosera emeeri abweene ao.

⁴⁰ Bahalaka enaanga choosi mani baachileha chaakwa mu nyaanja, haandi esiha syeene esyo badeembula emikoye kyali nikyaboya emyooho kiboyaanga emeeri; mani nibamala ohusiingisa olwaande lw'etaanga luli mu moni, emeeri yachaaka ohwiiruha niyichia hu sikobero esyo.

⁴¹ Nae emeeri yatwooma olugulu lw'omusenye, yaabuhanamo, engasi yaanda mani byayihaya ohukaluuhana, haandi enyuma yosi yeecha yaabuhanamo niyahubbwa neende efwiinda ch'amaani.

⁴² Endekeha y'abasikaari, yali ohwiita ababoye boosi, yitabayo oyo yeesi onyala yaanyala ohusoga nawawo, yeyiba;

⁴³ nae omuhoongo w'abasikaari, koti luyali n'adaha ohuwonia Paulo, yabakayira ohwooseresa endekeha yaabwe eyo. Yecha yaalagira abo boosi abali nibanyala ohusoga ohwesukuna mu maachi mani banyale ohweyuna ohwoola hu lukoongo,

⁴⁴ nae abadoong'ao boosi bediraanga hu mbaao neende ebituundu by'embaao ch'emeeri. Mani byaaba mbwe buli muundu yeesi yaanyala ohwoola hu lukoongo yawona.