Ebiholwa 24 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Omusaango kwa Paulo

¹ Luunyuma lw'endaalo chitaanu ohubitao, omulaamisi muhunuufu Anania, yaaloondaho yeecha neende abahuluundu alala neende omulomalomi mulala, olaangwa mbwe Teritulusi Beecha batekeha omusaango kubafwaambya Paulo mu moni wa gafana Felikisi;

² Teritulusi niyalaangwa, yachaaka ohuta omusaango hu Paulo n'aboola ati: “Koti ohubitira mu ewe, efwe huli ohwehoyera omuleembe, haandi ohweema hu maani kao, ow'oluyaali Felikisi, engaluuhana ndai nyiingi chileteebweo hulw'obulai bw'esyaalo syeefwe,

³ mani mu ngira choosi, haandi buli abuundu woosi efwe hufukiirira ebiindu bino byoosi bi ewe gafana Felikisi ohola, neende ohusiima hwoosi.

⁴ Nae obutanyala ohwemeeda ohuhusinyisa, ndi ohuhusaba hulw'esisa syao, otutekeereseho mu bwiimbikiti.

⁵ Olwohuba efwe hubweene omusaacha wuno ohuba omuundu musuku mubi muno, omudondobania w'Abayudaaya mu syaalo syoosi, haandi omweemeresi w'ediini y'Abanasareeti.

⁶ Kata yateemaho neende ohunyaasa enyuumba ya Nasaae, nae hwanyala ohumudiira sa.

⁷ Haandi fwesi hwadaha ohumuyaala neende amalako ka Musa keefwe keene. Nae Kabuteeni muhuluundu olaangwa mbwe Lisia yeecha neende amaani maangi muno mani yaanyala ohutung'uula omusaacha wuno mu mahono keefwe, haandi yalagira abo boosi abali nibamufwaambya omusaango ohwiicha mu moni wao.

⁸ N'onanyala ohumuteeba omweene, wesi onanyala ohumweekaho ebidiira hu buli siindu syoosi si humufwaambya.”

⁹ Abayudaaya bosi beemao beyiingisa mu huyaasibwa ohwo nibomiisa bati bino byoosi byali bityo sa.

Ohuyaaswa hwa Paulo niyali naali mu moni wa Gafana Felikisi

¹⁰ Gafana niyali niyahamala ohumusakula achaake ohulomaloma, Paulo yakobolamo ati: “Ni ndi neende obumanyirifu endi hu mbaka y'emyaaka emiingi muno, obeere nooli omukayi w'esyaalo sino, ndi omusangaafu muno ohutekeha ohwelomalomaho hwaange mu moni wao.

¹¹ Koti lwooba n'omalire omweene ohumanya, haba sichibita endaalo ehumi neende chibiri ohutula nindachia Yerusalemu ohusaba;

¹² haandi haba sibanyoolaho ni ndi ohuyingana neende omuundu yeesi kata ni ndi ohusangulusa esidiiyiha syoosi, oba mu Nyuumba ya Nasaae, oba mu Sinagoogi choosi daawe, oba mu siko bweene.

¹³ Haandi kata haba sibanyala ohwomiisa mu moni wao bino bi bali bulaanu ohuundechaangaho bulaanu buti.

¹⁴ Nae sino njia ohusifukiirira mbwe, ohweema hu Ngira yino, yibali ohulaanga bati n'ediini, ese nyinamiraanga Nasaae wa baseefwe, nifukiirisania neende buli siindu syoosi esyateebwao neende amalako ka Musa, oba esyandiikwa mu banabbi,

¹⁵ ni ndi neende esuubi mu Nasaae li beene bano bosi bafukiirira, mbwe yichia ohubaao ohusyuuhira ohw'abaandu baluungifu neende abataali abaluungifu.

¹⁶ Mani sakira ese ndamenya nindechunianga ohubona endi nyale ohunyoola embaasa ndai hu Nasaae neende hu baandu boosi.

¹⁷ Bulaanu luunyuma lw'emyaaka kiindi hooho, ndeecha nindeetera esyaalo syaange ebikabwa neende ebiyaanwa sa ebiha ebiingi.

¹⁸ Mani koti nindali hundi ohuholaanga endyo, banjakaana mu Nyuumba ya Nasaae nimalire ohulabiswa, nitaaliho neende esidiiyiha syoosi daawe, oba okunabuungi. Nae Abayudaaya baandi abali nibeechere ohutula mu Asia

¹⁹ bahoyere bosi ohuba nibali ano mu moni wao, ohutekeha omusaango kuundi, nikali mbwe baandiho neende emboosi yoosi.

²⁰ Ataali ao, mani mulehe abasaacha bano abeene baboole esyonoono syoosi sibanyoola niihola lundeemera mu moni w'esiina,

²¹ ohutusaho esiindu silala syoong'ene sindaayuha nindali nimbeemeremo akati endi, ‘Olwohuba mbwe fukiirira mu husyuuhira hw'abafu, sakira ndi ohuwosesebwa mu moni weeng'we enyaanga yino.’”

²² Nae Felikisi, ohuba niyali naali neende amakesi kahoyera aka Engira yino, yabakaana yaboola ati, “Lisia owali omuhuluundu w'abasikaari niyeecha ano, nilwo lu njia ohuheenga omusaango kweeng'we kuno.”

²³ Bulaanu yaberesa ebilagiro abahoongo b'abasikaari ati Paulo ahoyere ohuteebwa mu buliindi bulai, nae haandi ahoyere ohubeeresebwa obweyaango ohuhola si adaha, haandi bati abulao kata mulala hu bae ochia ohukayirwa ohumuleetera bi yaba n'adaha byoosi.

Paulo naali mu moni wa Felikisi neende Durusiila

²⁴ Luunyuma lw'endaalo endiidi ohubita, Felikisi yeemao neende Durisiila omuhasi wae, owali naali omuhasi Muyudaaya; yalaanga Paulo yamutekeeresa naalomaloma hu fukiirira mu Kristo Yesu.

²⁵ Mani koti lu yali naali ohulomalomaanga hu bwaakanirisi neende ohweetuka omweene, neende ohuheengerwa omusaango ohuchia ohubaao hale, Felikisi yeecha yaatya mani yaboola ati, “Tula yi ndi ano; nindaba ni ndi neende ebiha biindi, njia ohuhulaanga wiiche.”

²⁶ Esiha nasilala esyo, yasuubiranga ati Paulo anyala ohuba naanamuberesaho eseende. Yachaaka ohumulaangaanga butoli-toli niyoobba nae embaha.

²⁷ Nae emyaaka kibiri nikyoola ohuwa, Felikisi yakeramwa hu bwaami neende Porikio Fesito; koti lu yali n'adaha ohusangaasa Abayudaaya, Felikisi yaleha Paulo naali mu jeela.