Ebiholwa 23 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ Nae Paulo niyeecha yahang'aasa emoni chae esiina esyo syoosi, mani n'aboola ati, “Eng'we basyaange, ese ndahamenya mu moni wa Nasaae nimanyire endi mbechaanga omuluungifu ohwoolera elalira hu ludaalo luno.”

² Nae Omulaamisi muhuluundu olaangwa ati Anania yalagira abo abali nibeemere aambi nae ohumupaama.

³ Paulo yamuboolera ati, “Nasaae mweene niye ochia ohuhuhuya, ewe esida syabahwa echooka! Wihaale ano ohuheengera omusaango ohweema hu malako ka Musa, haandi niiwe ohalaka amalako ako n'olagira oti ese huywe endyo?”

⁴ Abo abali nibeemere aambi ao baboola bati, “Ewe, onyala otye ohunyohoolesa Omulaamisi Muhuluundu wa Nasaae?”

⁵ Nae Paulo yaboola ati, “Basyaange, ese haba simbeere nimanyire endi, niye Omulaamisi Muhuluundu; olwohuba syandiikwa siti, ‘Otalomalomanga bubi hu mweemeresi w'abaandu bao.’ ”

⁶ Nae Paulo niyamanya ati, olwaande lulala lwali olw'Abasadukaayo, nae oluundi lwali olw'Abafarisaayo, yehuuma mu siina n'aboola ati, “Eng'we basyaange, ese ndi Omufarisaayo, omwaana w'Abafarisaayo beene; olwohuba ese ndi neende esuubi haandi fukiirira mu husyuuha hw'abafu, sakira ndi ohuyaaswa.”

⁷ Mani niyamala ohuboola atyo, amayiingani kakwaao akatikaati w'Abafarisaayo neende Abasadukaayo; mani oluhung'aano lwakabuhanamo.

⁸ Olwohuba Abasadukaayo baboola bati, yibulao ohusyuuhira, neende bamalaika, kata neende emyooyo; nae Abafarisaayo nabo bafukiirira mweebyo byoosi.

⁹ Bulaanu amawumumu maangi keecha kasiingira; mani abaandiiki b'Amalako ka Musa ab'esikaanda sy'Abafarisaayo basiingira beema mani nibachaaka ohuyiingana muno nibaboola bati, “Efwe haba sihuli ohubonaho esiindu sihyaamu syoosi hu omusaacha wuno. Awuundi omwooyo wuundi niye okulomaloome nae, oba malaika?”

¹⁰ Mani amayiingani ako keecha kachaaka ohutuliramo enduli, omuhuluundu w'abasikaari oyo n'atiire ati, Awuundi Paulo anyala yahalakwamo ebituundu-tuundu neende abaandu abo, yalagira abasikaari ohuchaayo bamutuse mu baandu abo neende amaani, mani baamuleeta mu daala ly'abasikaari.

¹¹ Mu siro esyo, Omwaami yeema aambi nae mani yaboola ati, “Guma omwooyo, olwohuba koti lu omalire ohundusira obuloli mu Yerusalemu, ohoyere otyo haandi ohuchia ohundusira obuloli mu Rooma mwosi.”

Ohukiiywa hw'obulamu bwa Paulo

¹² Nibwahya muchuli, Abayudaaya bahola olukwe, mani bamala beechuba bati sibachia ohulya, kata ohung'wa esiindu syoosi ohwoola nibamalire ohwiita Paulo.

¹³ Bali abaandu bahira amahumi kane, abahola olukwe luno.

¹⁴ Bachia eyiri abalaamisi bahuluundu alala neende eyiri abahuluundu boosi, nibaboola bati, “Efwe humalire ohweboyera neende esichubo silala esyohutahoombaho hu syohulya syoosi, ohwoola nihumalire ohwiita Paulo.

¹⁵ Mani sakira eng'we alala neende esiina syoosi, muhoyere ohuboolera omuhuluundu w'abasikaari amuleete eno yi muli, koti lumwahaba nimudaha ohumanyirisa omusaango kwae bulai. Nae efwe humalire ohwetekeha bulai muno ohumwiita kata natoola aambi ano.”

¹⁶ Nae bulaanu, omwaana wa mboochoong'ene Paulo yawulira ebidiira hu lukwe olwo; yeengira mu daala ly'abasikaari elyo, yaboolera Paulo atyo.

¹⁷ Paulo yesi yalaanga mulala hu bahoongo b'abasikaari, yamuboolera ati, “Bukula omuraaga wuno omuyire eyiri omuhuluundu w'abasikaari oyo; olwohuba ali neende esiindu sy'adaha ohumuboolera.”

¹⁸ Mani omuhoongo oyo yabukula omusyaani oyo mani yaamuyira eyiri omuhuluundu oyo mani n'aboola ati, “Paulo muboye wula yanangire mani yaasaba ati ndeete omuraaga wuno yooli, koti lwali neende esiindu sy'adaha ohuhuboolera.”

¹⁹ Omuhuluundu oyo yadiira omuhono kw'omusyaani oyo mani yamusudya endulo yi bali boong'ene mani yaamuteeba ati, “Ni siina syeene sy'odaha ohumboolera?”

²⁰ Nae yamuboolera ati, “Abayudaaya bano bamalire ohufukiirisania ohuhusaba ohuleeta Paulo eyiri esiina muchuli, koti lu bahaba nibadaha ohumuhemeresa bulai ebimudiiraho.

²¹ Nae otabafukiirira daawe; olwohuba bali neende abasaacha babita amahumi kane abeliindiriirire ohumukwaaho, nibamalire ohweboya silala neende esichubo obutalyaaho kata sa ohung'waaho esiindu syoosi ohwoola lubanamala ohumwiita; mani bulaanu bamalire ohwetekehera elalira, baliindiriire sa ewe syonabaholere.”

²² Mani sakira omuhuluundu oyo yeecha yamala ohuseebula omusyaani oyo, n'amalire ohulagira ati, “Otabooleraho omuundu yeesi oti omalire ohumbooleraho esiindu sino.”

Paulo ayirwa eyiri gafana Felikisi

²³ Bulaanu omuhuluundu oyo yalaanga abahoongo babiri baandi mani n'ababoolera ati, “Esaa chidatu ch'esiro mutekehe abasikaari emia chibiri neende abalwaanira hu faraasi amahumi kataanu-na-kabiri, neende ababbaayi b'amafumo emia chibiri (200) bachie ohwoolera elalira mu Kaisarea.

²⁴ Haandi mutekehere Paulo yesi esuhiri chi anyala yeeruhiraho, mani mumale mubone muti mumwoosa neende omuleembe mu moni wa gafana Felikisi.”

²⁵ Haandi yandiika ebbarwa eyiboola ebyeene bino ati:

²⁶ “Kilaudio Lisia yandiika ebbarwa ohuchiira ow'oluyaali luhoongo gafana Felikisi, amaheeso.

²⁷ Omusaacha wuno yali nadiiriirwe neende Abayudaaya, haandi nibali sa aambi ohumwiita, syesi nindabeeduuyaho ni ndi neende abasikaari mani ndanyala ohumuwonia, nimalire ohumanya endi, hane yali omwibulanwa wa Rooma.

²⁸ Nindali ndaha ohumanya omusaango ku bali nibamufwaambya, ndeecha ndamuleeta mu siina syaabwe.

²⁹ Ndeecha ndafumbula endi, yali nafwambisibwa ebiindu bidiira hu malako ka Musa kaabwe, nae n'atayaaswa esiindu syoosi esihoyera ohumwiita kata ohumuboya.

³⁰ Mani nisyamanyihana yi ndi mbwe yichia ohubaao olukwe lumudiiraho, njichire ndaheengao ohumuleeta yooli bwaangu muno, haandi neende ohulagira abaandu boosi ababa nibo abali neende esiindu syoosi si bamufwaambya bosi banyale ohubaaho neende si bahuboolera mu moni.”

³¹ Mani sakira Abasikaari, nibeema hu bibaboolerwa, baabukula Paulo mani bamuleeta esiro eyiri Atipatiri.

³² Nibwahya, bakobola mu daala lyaabwe, nibaleha abalwaanira hu faraasi ohuchiiririra nibamugooba.

³³ Boola mu Kaisarea mani badiisa gafana ebbarwa eyo, bamudiisa Paulo yesi.

³⁴ Niyamala ohusoma ebbarwa eyo, yateeba Paulo esituundu sy'esyaalo siina si yaba niyamenyamo. Yamanya ati Paulo atula mu Silisia

³⁵ yaboola ati, “Ese njia ohuhutekeeresa abahutaaho omusaango nibamalire ohwoola.” Yalagira ati bamuliindire mu sipaapi sya Herode.