Ebiholwa 2 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ohwiicha hwa Mwooyo Mwoolerefu

¹ Oludaalo lwa Pentekosti nilwoola, abatume bali nibebuusire alala abuundu alala.

² Abweene ao, ekono lyawuliiriha nilitula Muukulu niliwoola koti omuyaka kw'amaani, lyeechula mu nyuumba yoosi yi batume bali nibehaale.

³ Mani babona enimi chifwaana koti omuliro nichisalaanire nicheemere hu buli muundu.

⁴ Boosi beechusibwa Mwooyo Mwoolerefu, bachaaka ohulomaloma mu nimi chitaali nasilala, koti lu Mwooyo oyo yabanyalira ohulomaloma.

⁵ Nae mu Yerusalemu mwalimo Abayudaaya, abasaacha baheera Nasaae muno ohutula mu buli mbeka choosi chohu syaalo huno.

⁶ Nibawulira ekono lino, bebuusa alala, bawuka muno, olwohuba buli muundu hu bo yawuliraanga abatume nibalomalomera mu lulimi lwae lweene.

⁷ Besiinduha haandi baawuka muno nibaboola bati, “Abaandu bali ohulomalomaanga bano boosi haba si Bagalilaaya?

⁸ Nae siba sitye mbwe efwe hubawulira, buli muundu mu lulimi lwae lweene?

⁹ Abaperisi neende Abamedia neende Abaelamu neende abamenya mu Mesopotamia, Yudea neende Kapadokia, Ponto neende Asia,

¹⁰ Firigia neende Pafilia, Misiri neende ebituundu bya Libbya ebiri aambi neende Sireeni, neende abakeni ohutula Rooma, Abayudaaya alala neende Abateende basoma ediini y'Abayudaaya,

¹¹ Abakireete neende Abaraabbu, huli ohubawulira nibaboola mu nimi cheefwe ebiindu by'amaani bi Nasaae yahola.”

¹² Boosi baawuka mani bamala baateng'eng'ala nibaboolanira abeene-na-beene bati, “Sino syeekesa siina?”

¹³ Nae abaandi badyaabuha nibaboola bati, “Abo bameerere efiini njaaha.”

Ohuyaala hwa Petero

¹⁴ Nae Petero, yeema alala neende ehumi-na-mulala, mani yaasiingisa ekono yachaaka ohulomaloma n'ababoolera ati, “Eng'we abasaacha Bayudaaya basyaange, alala neende eng'we mweesi abamenyere mu Yerusalemu, mutekeerese muwulire bi mbaboolera.

¹⁵ Abasaacha bano haba sibameerere koti lu mubaasa, olwohuba hu chiri sa esaa chidatu ch'echuli;

¹⁶ nae sino nisyo si munabbi Yoeli yalomaloma n'aboola ati:

¹⁷ ‘Nasaae aboola ati, bino nibyo ebichia ohubaao mu ndaalo chimaliiriha, njia ohuchuha Mwooyo waange hu baandu boosi, mani abasyaani neende abahaana beeng'we bachia ohutuumbulaanga ebichia ohubaao, haandi abasyaani baraaga beeng'we bachia ohuboneherwaanga, haandi abasaacha bahuluundu beeng'we bachia ohulootaanga ebilooto;

¹⁸ eee, haandi hu bahalaabani baange basaacha neende abahalaabani baange bahasi mu ndaalo echo, njia ohubachuhaho Mwooyo waange; mani bachia ohutuumbulaanga ebichia ohubaao.

¹⁹ Njia ohuhola ebiwuukisa aakulu Muukulu neende obulolero aasi hu syaalo, yicha ohubaao amabaanga, omuliro, neende okwoosi kudiiraane;

²⁰ elyuuba lichia ohukaluuhana libe esiirima nae omwoosi nakwo kukaluuhane kube koti amabaanga, Oludaalo lw'Omwaami nilutoola, oludaalo luhuluundu haandi olw'oluyaali muno.

²¹ Buli muundu yeesi owalaangeenge eliita ly'Omwaami yahawonisibwe.’

²² “Eng'we Abaisiraeli, muwulire emboosi chino: Yesu Omunasareeti, niye omusaacha womiisibwa mu moni weeng'we neende ebiholwa by'amaani neende ebiwukisa neende eby'amayia bi Nasaae yamuholerangamo koti lu eng'we abeene mumanyire.

²³ Mu hutekeha hwa Nasaae neende mu humanya hwa Nasaae, Yesu wuno, yeyaanayo mani mwamubaamba, haandi yeetwa neende abaandu bataloondakana neende amalako.

²⁴ Nae Nasaae yamusyuhisa ohutula mu bafu, yamuboolola mubuchuuni bw'ohufwa, olwohuba haba sisyali nisinyalihana ohudoong'a mu maani k'ohufwa.

²⁵ Olwohuba Daudi alomaloma ebimudiiraho n'aboola ati, ‘Ndabona Omwaami naali naange ebiha byoosi, nitateenga olwohuba ali hu muhono kwaange muluungi;

²⁶ sakira omwooyo kwaange kwasangaala, haandi olulimi lwaange lweehoya; haandi omubiri kwaange kwosi kuchia ohuba neende esuubi liingi.

²⁷ Olwohuba haba soochia ohuleha omwooyo kwaange mu syaalo sy'abafu, oba ohuleha Omwoolerefu wao ohubola.

²⁸ Omalire ohuunjekesa engira y'obulamu; haandi ohuba aambi naawe, huchia ohunjichusa esangaalo.’

²⁹ “Basyaange, hambaboolere ataali ohutya hwoosi ebidiira hu Daudi kuuka yeefwe endi, yafwa baamusiiha, haandi esiriindwa syae sisisiiri naafwe ohwoola buti.

³⁰ Olwohuba koti lu yali omunabbi, haandi n'amanyire ati Nasaae yechuba namwelayirira ati, yahehase hu sisaala syae sy'obutuki mulala hu beechuhulu bae.

³¹ Daudi yali amanyire hale ebichia ohubaao, mani yaalomaloma hu husyuuha hwa Kristo n'aboola ati, haba siyahalehe omubiri kwae mu syaalo sy'abafu oba yaaleha omubiri kwae ohubola.

³² Yesu wuno Nasaae yamusyuuhisa haandi efwe fweesi huli Abaloli bahwo.

³³ Naamalire ohuniinisibwa yaaba hu muhono muluungi kwa Nasaae, haandi n'amalire ohubukaana Mwooyo Mwoolerefu yi Laatang'ene yalaka, achuhire sino si muli ohubona, haandi ohuwulira.

³⁴ Olwohuba Daudi haba siyaniinaho Muukulu daawe; nae omweene aboola ati, ‘Omwaami yaboolera Omwaami waange ati, yihala hu muhono kwaange muluungi,

³⁵ ohwoola lu ndiriholera abasuku bao ohuba esiteeni syowuluusiraho amakulu kao.’

³⁶ Leha enyuumba ya Yisiraeli yoosi yimanyire elalira neende obwomiifu yiti, Nasaae amalire ohuhola Yesu yi mwabaamba wuno, ohuba Omwaami haandi Kristo.”

³⁷ Nae bulaanu nibawulira sino, syabachuunira elalira ohwoola hu ndasi, baboolera Petero alala neende Abatume baasye boosi bati, “Baana beefwe, siina syeene si huba huhole?”

³⁸ Nae Petero yababoolera ati, “Mweyolobye, mani buli muundu abatiisibwe mu liita lya Yesu Kristo munyale ohuleherwa ebyonoono byeeng'we; mani muchia ohunyoola esiyaanwa sya Mwooyo Mwoolerefu.

³⁹ Olwohuba esisuubise sino syeng'we, alala neende abaana beeng'we, alala neende abo boosi abali eyale muno; oyo yeesi yi Nasaae Omwaami weefwe aba n'alaangire ohwiicha yaali.”

⁴⁰ Petero yalomaloma niyehoonyera emboosi nyiingi muno, yabalabula n'aboola ati, “Mwewonie abeene ohutula hu luse ludoondobanu luno.”

⁴¹ Abo boosi abafukiirira emboosi chae, babatiisibwa. Hu ludaalo olwo, abemeeda hu mukaanda kw'abafukiiriri bali abaandu aambi elifu chidatu (3,000).

⁴² Boomiirira hu njekesa y'Abatume neende ohuholeraanga alala, neende ohuliiraanga omugaati alala neende ohulaamiraanga alala.

Obulamu bw'Abafukiiriri

⁴³ Obuti bwadiira buli muundu; abatume baholaanga ebiindu biwukisa alala neende eby'amayia biingi muno.

⁴⁴ Abafukiirira baholeraanga alala mani buli siindu syabechaanga esyaabwe boosi;

⁴⁵ bakusaanga emyaandu kyaabwe neende ebiindu byaabwe, bamala baakabiraanga buli muundu koti lu yalichiingi n'adaha.

⁴⁶ Buli ludaalo balaamiraanga alala mu Nyuumba ya Nasaae, haandi baliiraanga omugaati mu madaala kaabwe, haandi balichaanga ebyohulya neende emyooyo misangaafu alala neende emyooyo mikabi.

⁴⁷ Bafumiaanga Nasaae, haandi abaandu boosi babadahaanga. Mani buli ludaalo Omwaami yameedaanga hu buungi bwaabwe abo abalichiingi nibaonisibwa.