Ebiholwa 10 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Petero neende Korinelio

¹ Mu Kaisarea, mwalimo omusaacha wuundi olaangwa ati Korinelio, kaputeeni owali ow'omukaanda kw'ab'amaye Abarooma okulaangwa mbwe, “Eye ly'Esiyitalia”,

² omusaacha omunadiini muno owatya Nasaae alala neende edaala lyae lyoosi, owaberesanga abaandu bamanani obuhoonyi, haandi owali yaheera muno ohusabaanga Nasaae butoli-toli.

³ Aambi w'esaa chitaanu-na-chine ch'esideete, yachaaka ohubona bulai bweene. Malaika wa Nasaae muhuboneherwa niyeengira mu nyuumba yi yalimo yamuboolera ati, “Korinelio.”

⁴ Yamudangaaliraho n'atiire muno, mani yaboola ati, “Omwaami, siina syeene?” Nae malaika yamuboolera ati, “Ohusaba esala hwao alala neende ohukaba hwao biniinire byoola mu moni wa Nasaae yabibaasaho.

⁵ Bulaanu tuma abasaacha bachie Yopa, baleete Simooni wuundi olaangwa ati Petero;

⁶ amenyere neende Simooni, omubaambi w'amaseero, oli neende enyuumba hu ndulo w'enyaanja.”

⁷ Malaika owali n'alomaloome nae niyawaao, Korinelio yalaanga abasaacha babiri hu bahalaabani bae, alala neende omunamaye munadiini wuundi ohutula hu abo abamuliindaanga.

⁸ Niyali n'amalire ohubatondoolera ebyo byoosi, yeecha yabatuma Yopa.

⁹ Nibwahya oludaalo luloondaho, nibali hu lukeendo olwo nibali aambi ohwoola mu siko sihuluundu esyo, Petero yeecha yaniina mu siseenge siri aakulu hu sirama ohulaama Nasaae, aambi w'esaa chisaasaba chesideete.

¹⁰ Enjala yachaaka ohumuluma, yachaaka ohudaha esiindu syoosi esyohulya; nae nibali hu bali ohusitekeha, yaakwa mu huloota,

¹¹ yabona ekulu nilikuuhe, haandi esiindu siindi nisiri ohwiiha aasi, nisifwaana koti esuuka hoongo muno, niliiswa aasi hu syaalo nilidiirirwe esoonda chaalyo chine.

¹² Mu suuka omwo mwalimo embya choosi ech'ebisolo neende ebyaafula byoosi, neende amayoni kabburuha mu mboo.

¹³ Abweene ao, ekono lyamwichira liti, “Petero, siingira; yita olye.”

¹⁴ Nae Petero yaboola ati, “Haba daawe, Omwaami; olwohuba ese haba sindichaangaho esiindu syoosi esyasiirwa oba esitaali esilafu sitahoyerwa ohuliibwa.”

¹⁵ Ekono haandi lyamwichira ehabi lyohubiri liti, “Esyo syoosi si Nasaae yalabya, haba sohoyere ohusilaanga esy'omusiro.”

¹⁶ Esiindu nasilala sino syehola sityo amahabi kadatu, mani esuuka elyo lyabukulwa lyaniniiswa Muukulu bwaangu muno.

¹⁷ Bulaanu, Petero niyali nasyeteebaanga mu mwooyo esiindu si huboneherwa ohwo si nyala ohuba nisyeekesa; bone, abasaacha bala abali nibatumirwe neende Korinelio, nibamalire ohuteeba eyiri enyuumba ya Simooni, bafuduha baaba nibeemere hu siruwa

¹⁸ bachaaka ohulaanga nibateeba nikali mbwe Simooni owali n'alaangwa Petero yali n'amenyere mu nyuumba omwo.

¹⁹ Nae Petero niyali n'asibasaanga hu huboneherwa ohwo, Mwooyo yeecha yamuboolera ati, “Bonaho, abasaacha badatu mbao bali ohuhukoonya.

²⁰ Siingira mani hwiihe aasi, ochiane nabo ataali ohuhiinda; olwohuba niise obatumire.”

²¹ Petero yeeha yaachia eyiri abasaacha abo yaboola ati, “Niise oyo yi muli ohukoonya; sifune siina esikerere mweecha?”

²² Nabo baboola bati, “Korinelio, kaputeeni w'amaye k'Abarooma, omusaacha omuluungifu muno haandi omutiiririrwa muno wa Nasaae, haandi omanyihaane muno neende Abayudaaya boosi, yeecha yemirirwa neende malaika mwoolerefu ohuhulaanga wiiche ena daala lyae, mani anyale ohuwulira ewe by'onanyala ohuboola.”

²³ Petero yabengisa mu nyuumba babe abakeni bae.

²⁴ Oludaalo lwaloondaho baachia beengira mu Kaisarea. Korinelio hane yali n'abaliindiriire mani yali n'amalire ohubuusa alala abanaluyia bae alala neende abeecha bae.

²⁵ Mani Petero niyeecha yeengira mu nyuumba omwo, Korinelio yasiingira yaachia ohumubukaanira mani yaakwa aasi mu makulu kae mani yaamwiinamira.

²⁶ Nae Petero yamusiingisa mani n'aboola ati, “Yema bweema; Ese syesi ndi sa omuundu.”

²⁷ Mani niyali hu ali ohulomalomaanga nae atyo, Petero yeecha yeengira mukati mani yakaana abaandu baangi nibebuusire alala;

²⁸ mani yeecha yababoolera ati, “Eng'we abeene mumanyire koti lu sitafukiirirwa Omuyudaaya ohuholegana neende oba ohukeniya omuundu yeesi ow'esyaalo siindi; nae Nasaae yanjekeese ati sihoyere ohulaanga omuundu yeesi ohuba ow'omusiro oba ohuba otahoyera.

²⁹ Mani nimbeere ninaangirwe ohwiicha, njichire nitaaliho ohukaana hwoosi. Njichire ndeteeba esikerere mwaanaanga.”

³⁰ Korinelio yaboola ati, “Endaalo chine chibitire, esaa chifwaana koti chino chiti, ndali ni ndi ohwooseresa ohulaama hw'esaa chitaanu-na-chine mu nyuumba yaange; abweene ao, ndabona omusaacha niyeemere mu moni waange niyefwaalire ebifwaalo bing'enaang'ena,

³¹ n'ali ohuboolaanga ati, ‘Korinelio, esaala chao chiwuliirwe, haandi obuhoonyi bwao biichuliiswe mu moni wa Nasaae.

³² Mani sakira, tuma Yopa mani oteebe Simooni olaangwa Petero; amenyere mu nyuumba ya Simooni, omubaambi w'amaseero, hu ndulo w'enyaanja.’

³³ Mani sakira hulaangire bwaangu, mani wesi onyalire ohuba ow'esisa simala ohukanya weecha. Mani sakira bulaanu, fweesi mbano huli ano mu moni wa Nasaae, ohutekeeresa ohuwulira ebyo byoosi by'olagiirwe neende Omwaami ohutuboolera.”

Enomanoma ya Petero

³⁴ Petero yeemao yachaaka ohulomaloma, mani yaboola ati, “Mubwadyeeri bweene, malire ohweeka neende ohumanya endi, hane Nasaae haba sakwiraanga omundu yeesi,

³⁵ ohutusaho mu buli syaalo buli muundu yeesi omutya haandi ohola ebiluungifu niye oyo ofukiirirwa nae.

³⁶ Mumanyire emboosi yi yagoobera Yisiraeli, ohuyaala emboosi ndai ey'omuleembe ohubitira mu Yesu Kristo (oyo niye Omwaami wa boosi),

³⁷ emboosi yayaalwa mu Buyudaaya mwoosi, ohuchaakira Galilaaya luunyuma lw'ohubatiiswa hu Yowaana yayalaanga:

³⁸ koti lu Nasaae yabaha Yesu wa Nasareeti Mwooyo Mwoolerefu neende amaani; koti lu yakeendaanga naahola ebilai bihaya haandi nawonianga abo boosi abali beehalwaho neende Sitaani, olwohuba Nasaae yali ali nae.

³⁹ Haandi fweesi huli Abaloli b'ebiindu ebyo byoosi bi yahola naali mu syaalo sy'Abayudaaya haandi neende mu Yerusalemu. Beecha bamwiita neende ohumubaamba hu musalabba;

⁴⁰ nae Nasaae yaamusyuhisa hu ludaalo lwohudatu mani yamuhola yabonehana;

⁴¹ natabonehera abaandu boosi ohutusaho efwe abadoolebwa neende Nasaae ohuba Abaloli, abalya haandi baang'wa nae luunyuma lw'ohusyuuha ohutula mu bafu.

⁴² Haandi yatutuma ohuyaalira abaandu, haandi neende ohutusa obuloli huti oyo niye owaulwa neende Nasaae ohuba omuheengi w'emisaango ky'abalamu neende abafwa.

⁴³ Oyo niye yi banabbi boosi batusira obuloli bati buli muundu yeesi omufukiiriramo anyoola ohuleherwamo ebyonoono ohubitira mu liita lyae.”

Abateende banyoola Mwooyo Mwoolerefu

⁴⁴ Petero niyali nasiilomalomaanga atyo, Mwooyo Mwoolerefu yeeha hu abo boosi abali nibawuliire emboosi echo.

⁴⁵ Abafukiiriri baandi bali nibeechere neende Petero besiinduha muno, olwohuba esiyaanwa sya Mwooyo Mwoolerefu syali nisimalire ohwiiha kata hu Bateende.

⁴⁶ Olwohuba bali nibabawuliire nibali ohulomalomaanga mu nimi chikabuhaane haandi nibakinia Nasaae. Petero yalaangirira ati,

⁴⁷ “Aliwo onyala ohwiima amaachi ak'ohubatiisamo abaandu bano abamalire ohunyoola Mwooyo Mwoolerefu koti sa fwesi lu huli?”

⁴⁸ Mani yabalagira bachie babatiisibwe mu liita lya Yesu Kristo. Bamusaba adoong'e nabo hulw'endaalo chiindi hooho.