Ebiholwa 1 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ Omukoosi Teofiilo: Mu sitabo sitaangira, ndandiika ebidiira hu biindu byoosi bi Yesu yataangira ohuhola neende ohweekesa,

² ohwoola hu ludaalo lu yayirirwa Muukulu. N'asisiiri ohuyirwa Muukulu, yataangira ohulagira abatume ba yali yadoola niyehoonyera Mwooyo Mwoolerefu.

³ Yesu yeyekesa eyiri abatume mu ngeri nyiingi koti lu yali omulamu, n'amalire ohusaandisibwa neende ohufwa haandi mu mbaka y'endaalo amahumi kane, yababonehera naalomaloma hu Bwaami bwa Nasaae.

⁴ Niyali n'asisiiri nabo, yabalagira obutatula mu Yerusalemu, nae baliinde si Laata yasuubisa si mwawulira nimbaboolera endi,

⁵ “Yowaana yabatiisaanga neende amaachi, nae mu ndaalo chitaali enyiingi, muchia ohubatiisibwa neende Mwooyo Mwoolerefu.”

Yesu ayirwa aakulu Muukulu

⁶ Abatume nibali nibebuusire alala, bateeba Yesu bati, “Omwaami, bulaanu esiha sino nisyo syoocha ohukobosera Yisiraeli obwaami?”

⁷ Nae yababoolera ati, “Haba simulimo kweeng'we ohumanya endaalo oba obwiire bu Laata mweene yatekeha neende obunyala bwae.

⁸ Nae muchia ohunyoola amaani Mwooyo Mwoolerefu n'amalire ohubeehaho; muchia ohuba abaloli baange mu Yerusalemu neende mu Yudea mwoosi, neende Samaria, neende ohwoola yi syaalo syaakamira.”

⁹ Niyali niyahamala ohuboola atyo, yayirwa aakulu nibabona, esireesi syaamubwiiha baahaya ohumubona.

¹⁰ Koti lu bali nibasitingaalire aakulu Yesu n'awaao, bone, abasaacha babiri abefwaalire engubo cha rachaari, baboneha nibeemere aambi nabo,

¹¹ baboola bati, “Abasaacha Bagalilaaya eng'we, lwasiina mweemere nimutingaalire aakulu? Yesu wuno, obatusirweho yayirwa Muukulu, achia ohukobola mu ngeri nasilala eyo yi mumubweneremo naachia Muukulu.”

Owakobola mu makulu ka Yuda Yisikarioti

¹² Bulaanu Abatume bakobola Yerusalemu nibatula hu lugulu lwa Olifu, oluli aambi ekilomiita ndala ohwoola Yerusalemu, olukeendo lufukiirirwa ohukeendwa hu ludaalo lwa Sabbaato.

¹³ Nibamala ohwiingira mu Yerusalemu, baachia baniina mu siseenge sy'aakulu si bali nibamenyamo: Petero neende Yowaana neende Yakobbo neende Anderea, Filipo neende Tomasi, Bbatolomeo neende Matayo, Yakobbo omwaana wa Alufaayo neende Simooni Omulwaanirisi w'esyaalo syae, Yuda omwaana wa Yakobbo.

¹⁴ Bano boosi, alala neende abahasi baandi neende Maria ng'ina Yesu, alala neende bamwaanang'ina, balaamaanga Nasaae neende omwooyo mulala.

¹⁵ Mu ndaalo echo, Petero yaasiingira yeema mu baasye (omukaanda kw'abaandu boola aambi emia ndala neende amahumi kabiri), mani yaalomaloma n'aboola ati,

¹⁶ “Basyaange, ebyandiiko byoolerefu byali eby'ohwosereswa abweene, bi Mwooyo Mwoolerefu yalomaloma hale n'abitira mu munwa kwa Daudi, ebidiira hu Yuda owali omweemeresi w'abaandu badiira Yesu.

¹⁷ Olwohuba yali mulala hweefwe, mani yaberesebwa omukabo kwae mu mulimo kuno.”

¹⁸ (Bulaanu, omusaacha wuno yakula omukuunda neende esiyaanwa sy'esiholwa syae sibi mani yakwiira omutwe yaadihanamo amala keediha erwaanyi.

¹⁹ Sino syamanyiha eyiri abaandu boosi abamenya mu Yerusalemu, omukuunda okwo kwalaangwa mu lulimi lwaabwe kuti Akelidaama, esyeekesa siti, Omukuunda kw'Amabaanga.)

²⁰ “Olwohuba syandiikwa mu sitabo sy'Esabbuli siti, ‘Lehe edaala lyae lyeehole ekuunda, haandi lehe omuundu yeesi ahaye ohulimenyamo’; haandi ‘Lehe omuundu wuundi abukule omulimo kwae.’

²¹ Sakira, mulala hu baandu bakeendaanga naafwe endaalo choosi chi Omwaami Yesu yaba mweefwe,

²² ohutulira elalira hu hubatiisa hwa Yowaana, ohwoolera elalira hu ludaalo lu yatubukulirwaho yaayirwa muukulu, mulala hu baandu bano niye ohoyere ohweehola naafwe omuloli w'ohusyuuha hwa Yesu.”

²³ Badoolamo bataao abaandu babiri: Yosefu olaangwa ati Bbarisabba, owakulihwa Yusito, neende Matiasi.

²⁴ Mani balaama nibaboola bati, “Omwaami, niiwe omanyire emyooyo ky'abaandu boosi, tweekese wiina hu babiri bano, oyo yi ewe omweene odoolere

²⁵ ohubukula obweyaango mu mulimo kuno, neende mu butume bu Yuda yetusaho, mani yechiira yi yadaha omweene.”

²⁶ Baboobbera eha, eha yaakwa hu Matiasi oweecha yaabalirwa mu batume ehumi-na-mulala.