Amosi 8 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ohuboneherwa hw'esikono sy'ebyaamo

¹ Bino nibyo bi Omwaami Nasaae yanjekesa: Bona, esikono sy'ebyaamo byomu siminyu.

² Omwaami yandeeba ati: “Amosi, obona siina?” Mani ningobolamo endi, “Esikono sy'ebyaamo byomu siminyu.” Mani Omwaami niyamboolera ati: “Enjakamo yahoola hu baandu baange Abaisiraeli.” “Haba siinja ohukaluuhania ebibaaso byaange, njia ohubasaandya.”

³ “Hu ludaalo olwo, enyembo chomu dooho chaheehole amaliro.” “Emilaambo kyahabe emiingi muno; kyahasukunwe sa buli abuundu kaala.”

Ohusihiriswa hw'Abaisiraeli

⁴ Wulire sino, eng'we abaseenakira abaandu bateenyala, haandi abasihirisa abamanani bomu syaalo muno,

⁵ nimuboola muti: “Endaalo huluundu chahawe liina, mani huchaake ohukusa engaano? Haandi Sabbaato yahawe liina, mani huchaake ohukusa engaano haandi? Ao mani hunyale ohuduuduya ebikero by'ohukusiramo haandi hutakalase ebikero by'ohukuliramo, haandi humeede obukusi nihwehoonyera emisaani chipiima bulai.

⁶ Mani hukule omuhuuchi kw'engaano hu bukusi bw'aakulu. Hukule abamanani batanyala ohutuunga amakobi, neende abaandu bateenyala, abatanyala ohukula kata ebiraato, babe abawaambe beefwe.”

⁷ Omwaami Nasaae wa Yisiraeli yechuba n'aboola ati: “Mubwadyeeri bweene, haba siinja ohwiibirira kata silala hu biholwa byaabwe.

⁸ Esyaalo syahatengerehe hulw'esiholwa esyo, haandi buli muundu oli mu syaalo yaheyendeherere. Mani esyaalo syoosi syahatuumbuhe koti omwaalo kwa Naili, mani situumbuha haandi nisiibira haandi, koti omwaalo kwa Naili kwa Misiri.”

⁹ “Mani hu ludaalo olwo,” ndahalagire elyuuba lyaakwa esideete ng'alang'ala, haandi esiirima syahadiire esyaalo esideete ng'alang'ala Omwaami Nasaae niise oboolere.

¹⁰ Njia ohukaluuhania ebidyaalo byeeng'we bibe ebiha by'ohuliriramo, haandi enyembo cheeng'we ch'esaangaalo choosi, chibe ech'amaliro. Njia ohubabekaho efwiiri; mani mwefwaale engubo ch'ebigunia. Mani muchia ohuba koti ab'abeebusi balira omwaana waabwe mudeerwa. Oludaalo olwo lwoosi lwahabe olw'amasira.

¹¹ Omwaami Nasaae aboola ati: “Bone, ebiha bichia ohwoola,” “bi ndahasiindihiremo enjala hu syaalo. Abaandu bahalumwe enjala, nae haba siyahabe enjala y'ebyaahulya, noomba obuluwo bw'amaachi, nae ey'ohuwulira ehuwa ly'Omwaami.

¹² Abaandu bahakeende nibatula hu Nyaanja Y'omuunyu ohwoola hu Nyaanja Hoongo ya Mediterania, haandi ohutula emukulu ohwoola ebukwe. Haandi baheeruhe ohutula eno neende eyo, nibakoonya ehuwa ly'Omwaami, nae haba sibahalyakaane daawe.

¹³ “Hu ludaalo olwo, abahaana bataamanyire eby'abasaacha neende abasaacha baraaga bahalumwe obuluwo mani baakwa aasi koti abafu.

¹⁴ Abo abeechuba eyiri nasaae Asima wa Samaria, mani nibaboola bati: ‘Ewe, Daani, koti nasaae wao ali omulamu,’ haandi bati, ‘Koti engira ya Bberisebba yisisiiriwo,’ bahakwe, mani baahaya ohusiingira haandi.”