Amosi 5 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Abaisiraeli baboolerwa ohweyolobya

¹ Eng'we Abaisiraeli, wulire olweembo lw'ohulira lu mbeembera:

² “Yisiraeli omuhaana otaamanyire eby'abasaacha akwiire, haba siyahasiingire yeema haandi Akwiire aasi hu syaalo syae, mani abulao onaamusiingise daawe.”

³ Olwohuba Omwaami Nasaae aboola ati: “Esiko syomu Yisiraeli esyahasiindihe abalwaani elifu, abalwaani emia nibo abahadoong'eo. Haandi esiko esyo esyahasiindihe abalwaani emia, abalwaani ehumi nibo abahadoong'eo.”

⁴ Olwohuba Omwaami aboolera Abaisiraeli ati: “Mwiiche yi ndi mani munaabecheenge abalamu.

⁵ Nae mutachia Bbeteli, haandi muteengira mu Giligaali oba mwaahalania nimuchia Bberisebba. Olwohuba abomu Giligaali bahachie mu buboye, haandi Bbeteli syahasihiriswe.”

⁶ Muchie eyiri Omwaami mani munaabecheenge abalamu. Mani Omwaami ahaye ohusihirisa enyuumba ya Yosefu koti omuliro, mani kusaambe abaandu bomu Bbeteli, naabulao onyala ohukusimya.

⁷ Chibaakaanire eng'we abakaluuhania obwadyeeri, haandi abafwiinyirira abaluungifu!

⁸ Omwaami niye owaloonga eng'ining'ini cha Pileyade neende Orioni. Niye okaluuhania esiirima syaaba esideete. Haandi ebiha bibeere esideete, abikaluuhania byaaba esiro. Niye olaanga amaachi komu nyaanja, mani yaakachuha hu syaalo. Eliita lyae nilyo Omwaami.

⁹ Omwaami niye osihirisaanga ab'amaani, neende ebiko byaabwe.

¹⁰ Eng'we musyuula oyo oheenga omusaango mubwadyeeri, haandi mwebwaaba oyo olomaloma obwadyeeri.

¹¹ Mani sakira, koti lu mufwiinyirira abamanani, mani mwabanyakaho engaano yaabwe, mweyoombahiire enyuumba ch'amakina, nae haba simuchia ohuchimenyamo daawe. Haandi mutaakire emisabbiibbu, nae haba simuchia ohung'waaho efiini yakyo.

¹² Olwohuba manyire ebyonoono byeeng'we koti lu byaaka, neende koti lu emisaango kyeeng'we kiri. Mwiita abaluungifu, mukulwa, haandi mwiirusa emisaango ky'abamanani.

¹³ Mani sakira, omukesi yebuleerere-buwuleera mu biha bino; olwohuba bino biha bibi nibyo.

¹⁴ Lehe echoomo lyeeng'we libe ohuhola ebilai, ataali ohwonoona, humuba muchia ohuba abalamu. Mani olwo nilwo lu Omwaami, Nasaae w'Amaye achia ohuba naang'we, koti lu muboola muti ali naang'we.

¹⁵ Musyuuleenge ebibi, muheereenge ebilai. Mani muteeo obwadyeeri mu biko byeeng'we. Awuundi Omwaami, Nasaae w'Amaye, alikwiira esisa Abaisiraeli bahadoong'eo.

¹⁶ Mani sakira Omwaami, Nasaae w'Obunyala, Omwaami aboola ati: “Wahabeeo ohuubba wuui mu ngira choosi; haandi hu ngira choosi bahaboole bati, ‘Katunyoole!’ Bahalaange abalimi ohulira; haandi abo babakula ohulira bahabalaange ohuchereenjesa.

¹⁷ Wahabeeo ohulira mu ndalo ch'emisabbiibbu, olwohuba njia ohubasaandya.” Omwaami niye oboolere.

¹⁸ Chibaakaanire eng'we abekoomba oludaalo lw'Omwaami. Lwasiina mwekoomba oludaalo lw'Omwaami? Lwahabe oludaalo lw'esiirima, ataali obulafu.

¹⁹ Syahabe koti omuundu yaheeruha ohutula eyiri edalang'i mani yabukaanana neende enani. Oba koti omuundu yaheengira mu nyuumba yesiira hu sida, mani enjuha mbi yaamuluma.

²⁰ Oludaalo lw'Omwaami olw'esiirima, ataali olw'obulafu, olw'esiirima sya titititi, olutaalimo obulafu.

²¹ Omwaami aboola ati: “Ndasyuula, haandi ndalekeeresa ebidyaalo byeeng'we, haandi haba sisaangaalira emihung'aano kyeeng'we myoolerefu.

²² Kata mwahaanyaanira ebiyaanwa beeng'we bisaambwa neende ebiyaanwa by'emwo, haba siinja ohubifukiirira daawe. Haandi haba sisaangaalira ebisolo byeeng'we bikinu bi munyaanira.

²³ Mutuse mu moni waange esiyoka sy'enyembo cheeng'we; haba siinja ohutekeeresa amakono k'obuhana bweeng'we.

²⁴ Nae lehe obuhoyera buhulukuse koti omuhula, haandi obuluungifu bube koti omwaalo kutahama.

²⁵ “Eng'we Abaisiraeli, mwandeeteraanga ebiyaanwa neende ebiyaanwa mu myaaka amahumi kane, ki mwabeera mu siparara?

²⁶ Nae bulaanu mwiinamira ebifwaanani bi beene mweeholera ebya Sakuti omutuki weeng'we, neende Kaiwani, nasaae eng'ining'ini weeng'we.

²⁷ Mani sakira njia ohubayira mu bwiiruhiro mu syaalo sy'eyale ohubita Damasiko.” Omwaami nilwo lu aboola. Eliita lyae nilyo Nasaae w'Amaye.