Amosi 4 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ “Wulire emboosi chino, eng'we abahasi ba Samaria, abahomera muno koti eng'oombe chilya bulai cha Bbasani. Eng'we niing'we abafwiinyirira abamanani, haandi mwaakoneerera abateenyala. Niing'we ababoolera abasaacha beeng'we muti, ‘Leete amalwa, mani hung'we!’

² Koti Omwaami Nasaae ali omwoolerefu, yechubire n'aboola ati: “Bone, endaalo chichia ohwoola, mani bahabatecheengemo mweesi amalobo mani babahweesa koti eng'eeni.

³ Bahabahweese nibababisira mu bidomo byomu bida, buli muundu mu sidomo siri mu moni wae, mani babasukune mu Harimooni.” Omwaami niye oboola.

Ohuhaya ohweeka hw'Abaisiraeli

⁴ Omwaami Nasaae aboola ati: “Eng'we Abaisiraeli, mwiiche Abuundu Woolerefu ali Bbeteli, mani muhole ebyonoono, nikali mbwe nilwo lu mudaha; muchie Giligaali, mani mwemeede ohwonoona. Muleete ebiyaanwa byeeng'we buli chuli, neende silala sy'ehumi syeeng'we buli lu ndaalo chidatu chibitao.

⁵ Yaane ebiyaanwa by'emigaati kibbaahirwe, mani chisaambwa nimweebasa Nasaae, mutuumbule ebiyaanwa bi muyaana abeene nimudaha, leha buli muundu amanye; hulwohuba esyo nisyo si mwaheera ohuhola, eng'we Abaisiraeli.

⁶ “Niise owaleeta enjala mu biko byeeng'we, mani ebyohulya nibikotao mu byaalo byeeng'we, nae eng'we nimuhaya ohukobola yi ndi.” Omwaami niye oboola.

⁷ “Haandi Niise owaakamya efula ohubakwiira nikidoong'ereo emyoosi kidatu ekesa lyoole. Ndakwiisaanga efula hu siko silala, haandi ninjibisa hu siko siindi. Efula yakwichaanga mu mumikunda kiindi, nae yihaya ohukwa mu kiindi.

⁸ Abaandu b'amadehere katulana mu hulumwa obuluwo bomu biko bibiri oba bidatu bakeendaanga nibachia mu siko silala ohukoonya amaachi kohung'wa, nae haba sibanyoolaanga amaachi kabayera ohung'wa. Nae kata katyo haba simwakobola yi ndi.” Omwaami niye oboola.

⁹ “Ndabasaandya nibasiindihira omuyaka neende oluyoongo; endalo cheeng'we neende endalo ch'emisabbiibbu cheeng'we, byooma. Esike chaalya emiseituuni kyeeng'we neende emisaala kyeeng'we ky'amafuta. Nae kata katyo nimuhaya ohukobola yi ndi.” Omwaani niye oboola.

¹⁰ “Ndabasiindihamo amalwaae kali koti ka ndasiindiha mu baandu ba Misiri. Ndeetera abasaacha baraaga beeng'we mu biita; mani efaraasi cheeng'we nichinyakwa. Ndeechusa esibolu sy'emilaambo mu kaambi cheeng'we. Nae kata katyo nimuhaya ohukobola yi ndi.” Omwaami niye oboola.

¹¹ “Ndasihirisa abaandi hweeng'we, koti lu ndasihirisa abaandu ba Sodomu neende Gomora. Mani abo Abawonao bali koti ebikeenga by'omuliro. Nae kata katyo nimuhaya ohukobola yi ndi.” Omwaami niye oboola.

¹² “Mani sakira, eng'we Abaisiraeli, njia ohubasaandya. Mani olwohuba njia ohuhola sino, mwetekehe ohubukaanana naange.”

¹³ Mani bone, Nasaae niye owaloonga engulu, haandi niye owaloonga omuyaka, haandi niye oboolera omuundu ebibaaso byae. Niye okaluuhania esideete syaaba esiro. Niye okeendera aakulu w'esyaalo. Eliita lyae nilyo, Omwaami, Nasaae w'Amaye.