Amosi 1 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ Chino nicho emboosi chia Amosi, mulala hu baayi ba Tekoa. Bino byoosi bidiira hu Yisiraeli bi Nasaae yeekesa Amosi, Wusia naali omutuki wa Buyudaaya, neende Yerobboamu, omwaana wa Yoasi, naali omutuki wa Yisiraeli, emyaaka kibiri musisi niyisisiiri ohuba hu syaalo.

² Mani Amosi n'aboola ati: “Omwaami abuluula naali hu Lugulu lwa Siyooni, ekono lyae libuliirihana nilitula mu Yerusalemu. Obwaayiro bw'abaayi bwooma, haandi aakulu w'olugulu lwa Karimeeli huhooha.”

Nasaae aheengera ebyaalo Byebodoohania Yisiraeli omusaango Siria

³ Omwaami aboola ati: “Abaandu bomu Damasiko baholere ebyonoono amahabi-na-mahabi. Mani sakira njia ohubasaandya olwohuba basaandya abaandu bomu Gileadi n'obwaalaba buungi muno.

⁴ Mani njia otubula omuliro hu dooho ly'omutuki Hasaeli, haandi saambe ebiko by'omutuki Bbenihadadi.

⁵ Njia ohufunaka ebiruwa by'esiko sya Damasiko, mani sihirise abaandu bomu hooho lya Afeeni, neende omutuki wa Bbetedeni; mani abaandu bomu Asiria bahachie mu jeela Kiiri.”

Filisitia

⁶ Omwaami aboola ati: “Abaandu bomu Gasa baholere ebyonoono amahabi neende amahabi. Mani sakira njia ohubasaandya. Olwohuba baayira abaandu bomu syaalo syoosi mu jeela mani nibabakusa mu Edomu.

⁷ Sakira njia otubula omuliro hu sida sy'esiko sya Gasa, mani saambe ebiko byasyo.

⁸ Njia ohusihirisa abaandu bomu siko sya Asudoodi, neende omutuki wa Asukelooni. Njia ohusaandya esiko sya Ekironi; haandi Abafilisiti badoong'ao bachia ohusihirira.”

Tiiro

⁹ Omwaami aboola ati: “Abaandu bomu Tiiro bahola ebyonoono amahabi-na-mahabi. Mani sakira njia ohubasaandya, olwohuba bayira abaandu bomu syaalo boosi mu jeela, mu Edomu, mani nibataliinda endagaano y'obwiicha liindahola nabo.

¹⁰ Mani njia otubula omuliro hu sida sy'esiko sya Tiiro, mani saambe ebiko byasyo.”

Edomu

¹¹ Omwaami aboola ati: “Abaandu bomu Edomu bahola ebyonoono amahabi-na-mahabi. Mani sakira njia ohubasaandya, olwohuba bakiiya abasyaabwe neende olugaanga, mani nibabeeta ataali ohubakwiira esisa kata nabudiidi. Mani etima lyaabwe nilitahendeera, nae nibadoong'a nalyo endaalo choosi.

¹² Mani njia ohubula omuliro hu siko sya Temani, haandi sihirise ebiko byomu Bbosura.”

Abaamooni

¹³ Omwaami aboola ati: “Abaandu bomu Abaamooni bahola ebyonoono amahabi-na-mahabi. Mani sakira njia ohubasaandya, olwohuba mu biita bi balwaana ohutakalasa enjaho chaabwe, baata enda ch'abahasi bali nibali aasito.

¹⁴ Mani njia otubula omuliro hu sida sy'esiko sya Rabba, mani sihirise ebiko byasyo. Wahabeeo ohuyokera hu ludaalo lw'ebiita, mani ebiita byahawuume koti esifuusye.

¹⁵ Omutuki waabwe yahayiingirwe mani ayirwe mu jeela, alala neende abahunuufu bae.”