Amaliro 5 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKOEsaala y'ohukwiirwa esisa 1 Ewe Omwaami, yichulisa ebyatukwaaho; Tingaala, mani obone ohudiirwa esoni hweefwe! 2 Ebiindu byeefwe biri mu bunyala bwa walukeendaa, amadaala keefwe kali mu bunyala bw'abateende. 3 Hweholere bamulehwa, hubula baseefwe; bang'inayeefwe bali koti abahasi bafwiire. 4 Amaachi kahung'wa hukatuungira, eehwi ch'ohudeehera huli n'ohukula. 5 Huboywa emikoye mu kosi mani nihuhwehweeswa; hujoong'a, nae hubula obuuluhiro. 6 Husaba Abamisiri neende Abasiria ebyohulya huhunyale ohudoong'a abalamu. 7 Bakuuka yeefwe bahola bafwa hale; mani efwe huli ohusaanda hulw'ebyonoono byaabwe. 8 Hutukwa neende abawaambe; mani abulao onyala ohutwaabina mu bunyala bwaabwe. 9 Huwaayo obulamu bweefwe, hu hukoonye ebyohulya, olwohuba abatemo batweebodoohaanie hu nyaande choosi. 10 Enjala yitulwaasire, emibiri kibalire koti etanuuru. 11 Abahasi beefwe babakwiiraho mu Siyooni bweene, abahaana bataamanyire eby'abasaacha babakwiiraho mu biko byomu Buyudaaya. 12 Abachweenufu beefwe bayirwa ohwiitwa; Abahuluundu beefwe haba sibeeswamo oluyaali. 13 Abaana basyaani beefwe bayiikwa ohusya hu lukina koti abawaambe; haandi abaana bayere badandaamira olw'obusito bw'eehwi chibakiinga. 14 Abaandu bahuluundu haba sibasiihala mu siruwa sy'esiko, abaana baraaga haba sibasyeemba daawe. 15 Hubula esangaalo lyoosi mu bulamu bweefwe; mu bweyaango bw'ohuhina, huli mu masika. 16 Hubula esiindu situberesa oluyaali. Chitwakaanire, olwohuba hwahola ebyonoono! 17 Olwohuba sino, engisa yitudiirire hu mwooyo, olwohuba ebiindu bino, emoni chikwiireho olububi, 18 olwohuba Olugulu lwa Siyooni luleherwe ao lutyo. Ebinamiindi nibyo ebikeenderaho. 19 Nae ewe, Omwaami, niiwe otuka endaalo choosi pe; esisaala syao sy'obutuki sy'endaalo choosi pe. 20 Lwasiina otwibirira endaalo choosi, lwasiina otwebwaaba otyo? 21 Ewe Omwaami, tukobose y'oli, ofunyiseo ebilai byeefwe byaahale! 22 Kose otwebwabiire elalira? Etima lyao liingi elyo haba silyahaakame daawe? |