Amaliro 3 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ohusaandya, ohweyolobya neende ohusuubira

¹ Niise omuundu wabona esaando oyo yi Omwaami yasaandya.

² Yaanjirusa mani yandeeta mu siirima omutaali obulafu.

³ Mubwadyeeri bweene Omwaami yasaandiisye amahabi neende amahabi oludaalo lwoosi pe.

⁴ Anyaalire omubiri neende esihoba syaange, mani n'afunaka-funaka amakuumba kaange.

⁵ Yanjikaliire mu jeela omuli engisa neende obuchuuni.

⁶ Akerere ndaamenya mu siirima koti abo abafwa hale muno.

⁷ Asitiriire yandebodoohania mbula yinyala ohweyibira; yamboyere neende omunyororo musito.

⁸ Kata andahalira mani ndekongooya ohuhoonya, haba saawulira ohusaba hwaange.

⁹ Yekaale engira chaange mani yachoombahaho esida sy'amakina mabaache. Ahyamiise engira chaange.

¹⁰ Yandekaluuhanisiire ali koti elyaaka elindetekeheere, koti edalang'i yindekisiire.

¹¹ Yanjiruuse yandusa hu ngira, mani yambosyoola-mbosyoolamo mani yaandeha ao atyo.

¹² Aleegere oluyiingo lwae mani yaahola ohuba esabba y'olusaale lwae.

¹³ Afumiite obusaale bwae mu mwooyo kwaange.

¹⁴ Abaandu boosi baanjeha haandi ndeeholere olweembo lwaabwe oludaalo lwoosi pe.

¹⁵ Yaambereese obubuuha ohulya mani yanjikusa ebiindu bihahaata.

¹⁶ Akerere ndamenena embaale haandi yafuufula mu kohe.

¹⁷ Omwooyo kwaange kubula omuleembe, njibiriire koti esangaalo lu liri.

¹⁸ Ao mani nimboola endi, “Oluyaali lwaange luweere, haandi esuubi lyaange mu Omwaami likotere.”

¹⁹ Ninjichulisa hu buchuuni bwaange neende hu tima lyaange, bihahaata koti obubuuha neende endusye.

²⁰ Omwooyo kwaange kusibaasaho buli siha mani nindewunamira.

²¹ Nae njichulisa sino, mani sakira ndi neende esuubi.

²² Obuheeri bw'Omwaami butaakama haba sibuwa daawe, esisa syae haba sisyaakama daawe.

²³ Buli buhya syehola esiyaaha; siingi muno haandi syeesikwa.

²⁴ Omwooyo kwaange kuboola kuti, “Omwaami niye omukabo kwaange,” “Sakira musuubiriramo.”

²⁵ Omwaami mulai eyiri abo abamwesika, eyiri buli muundu omukoonya.

²⁶ Silai omuundu ohwesimiirisa kaala n'aliinda Omwaami amuwonie.

²⁷ Silai omuundu ohweeka ohwesimiirisa ohutula mubuyere bwae.

²⁸ Omuundu naasaanda, silai yehaleho yeeng'ene mani awuleere.

²⁹ Leha yeyolobye awuundi anyala ohuba neende esuubi liindi.

³⁰ Kata ayahanyekwa oba yaahuywa, leha yesimiirise mu byoosi.

³¹ Olwohuba Omwaami haba saachia hutusukuna endaalo choosi daawe.

³² Nae kata ayahaleeta engisa, achia ohutudiirira esisa, olwohuba obuheeri bwae butaakama buungi nibwo.

³³ Olwohuba esichiiririrwa syae haba sinisyo ohuchuunia oba ohudiisya abaandu engisa daawe.

³⁴ Ohusenakira ababoye bohu syaalo boosi,

³⁵ ohwiima abaandu bae ebibahoyera mu moni w'oyo oli Aakulu Muno,

³⁶ neende ohuheengera omuundu omusaango, ebyo Omwaami haba saabifukiirira daawe.

³⁷ Wiina mweene owalagiraho mani syolerera, ohutusaho Omwaami nasifukiriire?

³⁸ Hasibe esilai oba esibi, sibaao oyo oli Aakulu Muno n'amalire ohusifukiirira.

³⁹ Lwasiina omuundu osisiiri omulamu yekanyiirisa, ebidiira hu husaandisibwa ohweema hubyonoono byae?

⁴⁰ Lehe hutingaale mani hwehaliirise esaambo cheefwe, mani hukaluuhane hukobole eyiri Omwaami.

⁴¹ Lehe husiingise emyooyo kyeefwe neende amahono keefwe eyiri Nasaae muukulu, mani huboole huti:

⁴² Huholere ebibi haandi hujeemere, mani Ewe haba sootuleheeremo daawe.

⁴³ “Ewe otuboyeere obwaalaba mani watwoongaho, notwiita ataali ohusaasira daawe.

⁴⁴ Ewe webwiihire esireesi mani ohusaba hweefwe huhaye ohuhwoolaho daawe.

⁴⁵ Otuholere hwaaba koti esituuli sy'amasiingo neende ebikoha mu baandu boosi hu syaalo.

⁴⁶ “Abasuku beefwe boosi batulekeeresa haandi baatunyeka.

⁴⁷ Oluteengo neende ohunyakwa, amasira neende ohusihiirira bitukwiireho.

⁴⁸ Emoni chaange chihulukusa emyaalo ky'amasika hulw'ohusihirisa abaandu baange.

⁴⁹ “Amasika kaange kanaahulukuse ataali ohwaakama, ataali ohuhama,

⁵⁰ ohwoola Omwaami Muukulu lu anatingaaleho aasi mani yaatubona.

⁵¹ Omwooyo kwaange kwichuulemo engisa hulw'ebiindu bikwiire hu baandu bomu siko syaange.

⁵² “Abasuku baange baanyiimire koti abayiima eyoni ataali esifune syoosi.

⁵³ Baasukuune mu liina nisisiiri omulamu mani nibambuukaho amakina.

⁵⁴ Amaachi kahulukusa, nikabita hu mutwe kwaange mani nimboola endi: ‘Ese fwiire.’

⁵⁵ “Ewe Omwaami, ese ndahulaanga, ni ndi aasi mu liina;

⁵⁶ wabulira omulaanga kwaange, ‘Otadiimbya amatwi kao, nae wulira amaliro kaange mani wuhoonye.’

⁵⁷ Ewe wasuda aambi nindahulaanga; mani n'oboola oti: ‘Otatya daawe!’

⁵⁸ “Ewe Omwaami, wanjabina, wawonia obulamu bwaange.

⁵⁹ Ewe Omwaami, obweene ebibi bi baaholere, heengere omusaango mani hire.

⁶⁰ Obweene koti lu basuku baange baasyuula. Haandi koti lu bali ohuuhoba.

⁶¹ “Ewe Omwaami, owuliire koti lu bali ohuunyeka haandi koti lu bali ohuuhoba.

⁶² Abasuku baange, baanomanomaho oludaalo lwoosi, haandi bateesa ebindiiraho.

⁶³ Bona, baanyemba nibandekeeresa buli yi baba nibehaale neende yi beemere.

⁶⁴ “Ewe Omwaami, basaandye, ohuchianakana neende ebiholwa byaabwe.

⁶⁵ Babwaabe, mani oboomye emyooyo.

⁶⁶ Ewe Omwaami, mu tima lyao, bakiiye mani obasihirise obamaleo hu syaalo.”