Amaliro 1 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Engisa ya Yerusalemu

¹ Esiko syali nisyeechulamo abaandu bulaanu sireherwe ao sityo! Esiko syali esihunuufu muno mu byaalo, bulaanu syeholere koti omuhasi mufwiirwe. Esiko syali esichweenufu mu biko, bulaanu syeholere esiwaambe.

² Mu siro sino, siindisya amasika, mani nikahulukusa hu matama. Mu beecha basyo bahale, abulao osilemya omwooyo. Abaholeraanga alala nasyo, basihobere, bulaanu beeholere abasuku basyo.

³ Abomu Buyudaaya bayirirwe mu buwaambe haandi babayiika ohuhola emirimo ch'amaani. Bulaanu bamenya mu byaalo biindi, nae haba sibanyoola obwiiruhiro daawe. Abasuku basyo bamalire ohusyebodoohania, abulao awohweyibira daawe.

⁴ Engira chichia Siyooni bulaanu chirira amasika, olwohuba abulao omuundu wiicha ohwiinamira Nasaae hu ndaalo ehuluundu. Ebiruwa byasyo byoosi bidoong'ere buhaya bweene, abalaamisi basyo babiinduha sa. Abahaana baamwo bahwehweeserwe nibairwa, mani esiko syeene sidoobere muno.

⁵ Abasuku basyo bayingiire; basidiirire mu bunyala baabwe, olwohuba Omwaami asisaandiisye hulw'ebyonoono byasyo biingi. Abaana basyo bawaambirwe, mani nibayirwa mu jeela.

⁶ Oluyaali lwa Siyooni bulaanu lumalire ohwaakama. Abachweenufu basyo bali koti emboongo echitanyoola olwaayiro; echiweeremo amaani nichiiruha abachikiiya.

⁷ Mu ndaalo chaasyo ch'obuchuuni neende engisa, Yerusalemu yechulisa ebiindu bilai byoosi neende oluyaali lwae lw'endaalo hale. Nae abasuku bae nibamuseeta, yibulao kata owamwaabina daawe, abasuku bae bamucheha sa, mani nibamuduulira naakwiire.

⁸ Yerusalemu syonoona muno, mani sakira syeholere esitaali esyoolerefu; abo boosi abasiisaangamo oluyaali bulaanu basirekeresa, olwohuba babona bati siri buhaya. Esyeene syosi sibiinduha sa, mani nisyemwaayamwaaya esoni nichisidiirire.

⁹ Obutaali obwoolerefu bwasyo bwaboneha alafu, nae haba sisyadeebayo daawe; mani sakira syaakwa bubi muno, mani abulao osilemya omwooyo. “Ewe Omwaami, bona obuchuuni bwaange mani wuhoonye, olwohuba omusuku ayingiire.”

¹⁰ Abasuku basyo banyakire oby'obuyiinda byasyo byoosi. Eee, sibwene ebyaalo nibiseetere abuundu awoolerefu wasyo bweene. Abo ba Ewe Omwaami wakayiriraanga abateende ohwiingiramo.

¹¹ Abaandu baamwo boosi babiinduha nibakoonya esyohulya. Bafuunjisamo eby'engaanga byaabwe neende ebyohulya olwo nilwo lubanaliindire obulamu bwaabwe. “Ewe Omwaami, tingaala mani obone, olwohuba mbula obuchiiro.”

¹² Haandi nimboola endi: “Eng'we ababitaao, haba simudeebayo daawe?” “Tingaale mani mubone ni aluwo omuundu oli neende engisa yiri koti eyaange yi Omwaami yangwiisaho hu ludaalo lu yekeseraho etima lyae.

¹³ “Yatuma omuliro ohutula muukulu; mani n'akusiindiha mu makuumba kaange. Yaateka oluhaanda mani ninyaambia n'anjiisa aasi; niyandeha ao oludaalo lwoosi ni ndi mubuchuuni.

¹⁴ “Yehaliirisa ebyonoono byaange mani yabiboya alala koti ekoombo; mani n'abyomiisa alala n'abimboya mu kosi. Obusito bwaalyo buumaliremo amaani. Omwaami yandeha abasuku baange bamaamba, abo batanyala ohulwaania kata nabudiidi.

¹⁵ “Omwaami alekereese ab'amaye baange boosi abahiramo amaani. Atumire eye lyae ohulwaania neende ohusihirisa abaraaga baange. Omwaami aseenakiire abaandu baange koti lu basenakira emisabbiibbu mu sinyuhiro.

¹⁶ “Sakira ndi ohulira hulw'ebiindu ebyo, mani niihulukusa amasika. Abulao omuundu onyala ohuunemya omwooyo, abulao omuundu onyala ohuungumya. Omusuku ayingiire; abaana baange badoong'ere ao batyo.”

¹⁷ Siyooni sisingiise amahono aakulu, nae abulao omuundu yeesi osihoonya. Omwaami alagiire ohulwaania Yakobbo, abaasye beehole abasuku bae. Yerusalemu sibalirwa mu byaalo bitaali ebyoolerefu.

¹⁸ “Nae Omwaami wadyeeri niye, olwohuba ese ndajeemera amalako kae. Nae wulire, eng'we abaandu mweesi, mani bone engisa yaange. Abaana baange basyaani neende abahaana bayirirwe mu buwaambe.

¹⁹ “Ndalaanga abeecha baange ohuhoonya, nae nibatadeebayo daawe. Abalaamisi neende abeemirisi baange bafwiira hu ngira ch'esiko nibali nibachiire ohwekoonyera ebyohulya ebinaliinde obulamu bwaabwe.

²⁰ “Ewe Omwaami, bona engisa yaange, haandi ndeyendehereere muno. Omwooyo kwaange kuweeremo amaani olwohuba mbeere omujeemu muno. Obutemo buli hu ngira, haandi ohufwa huli mu nyuumba.

²¹ “Wulire koti lu miinduha; nae abulao omuundu onemya omwooyo. Abasuku baange boosi basangaalire hulw'ebidinyu bingwiireho. Leha oludaalo lu walaka lwoole, mani boosi basaande koti lu ndi ohusaanda.

²² “Bahire omusaango hulw'ebiholwa byaabwe bibi mani obasaandye koti lu oli ohusaandya hulw'ebyonoono byaange byoosi. Ndi ohubiinduha hulw'engisa yaange mani omwooyo mudehere.”