Amalako Kohubiri 9 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Obujeemu bw'Abaisiraeli

¹ “Eng'we Abaisiraeli, tekeerese; enyaanga yino muchia ohwaambuha omwaalo kwa Yorodaani, mwiingire haandi mutuke ebyaalo bibahira obuhoongo neende amaani, ebiko byabyo bihoongo haandi byoombahwaho ebida bileeyi ohwoola hu bireesi.

² Abaandu bomu byaalo ebyo ni rahula nikyo haandi kileeyi kyeene. Nikyo abeechuhulu ba Anakimu ba mumanyire, haandi ba mwawuliraho nisibalomwalomwaho siti, ‘Wiina mweene onyala ohuyiingania abeechuhulu ba Anaki?’

³ Mani sakira enyaanga yino manye muti oyo onabeemiriramo oli koti omuliro kusaamba niye Omwaami Nasaae weeng'we. Omweene niye ochia ohuyiingira abaandu abo mani abate mu bunyala bweeng'we nimwahabe nimwiingira mu syaalo esyo. Muchia ohubeerusa batule mu syaalo esyo, mubasihirise bwaangu muno, koti lu Omwaami yabasuubisa.

⁴ “Mutaboolaanga mu myooyo kyeeng'we, Omwaami Nasaae weeng'we niyahabe naamalire ohutusa abaandu abo bomu syaalo esyo muti, ‘Obuluungifu bweefwe nibwo obukerere Omwaami yaatuleeta mani hwaatuka esyaalo sino.’ Ohutusaho obubi bw'ebyaalo bino nibwo obunaba nibukerere Omwaami yaatusamo abaandu abo eng'we nimuteengiramo.

⁵ Obuluungifu bweeng'we neende obulai bw'emyooyo kyeeng'we haba sinibyo ebinakera mwiingire haandi mutuke ebyaalo bino, nae obubi bw'ebyaalo bino nibwo obunakera Omwaami Nasaae weeng'we yeerusemo abaandu abo eng'we nimwoola sa muti. Mani Omwaami achia ohwomiisa emboosi yi yechubira bakuuka yeeng'we, eyiri Abburahamu, Yisaka, neende Yakobbo.

⁶ “Mani sakira manyeenge muti Omwaami Nasaae weeng'we s'ali ohubaberesa esyaalo silai sino musituke hulw'obuluungifu bweeng'we, olwohuba eng'we muli abaandu b'emyooyo myoomu.

⁷ “Mwiichulise haandi muhaye ohwiibirira koti lu mwakera etima lyadiira Omwaami Nasaae weeng'we nimuli mu siparara. Ohutula hu ludaalo lu mwatulira mu syaalo sy'e Misiri, mubeere nimwajeemera Omwaami.

⁸ Kata hu lugulu lwa Sinai, mwanyoolesa Omwaami, mani Omwaami n'abanyoolerera muno haandi n'aba omwetekefu ohubasihirisa.

⁹ Nindaniina hu lugulu ohuchia ohunyoola ebipaande by'amakina, ebipaande by'endagaano yi Omwaami yahola naang'we, ndadoong'a hu lugulu endaalo amahumi kane neende ebiro amahumi kane nitalyaaho esyohulya syoosi oba ohung'waaho amaachi koosi.

¹⁰ Omwaami yamberesa ebipaande bibiri eby'amakina bi Nasaae mweene yandiika neende omuhono kwae; haandi hu bipaande ohwo hwaliho emboosi choosi chi Omwaami yalomaloma naang'we n'ali akatikaati w'omuliro, hu ludaalo lu mwali nimwebusiire hu lugulu.

¹¹ Nae endaalo amahumi kane nichawa, Omwaami yamberesa ebipaande bibiri eby'amakina, ebipaande by'endagaano.

¹² Mani Omwaami niyamboolera ati, ‘Siingira otule ano bwaangu; olwohuba abaandu ba watusa Misiri banyasiihe mani nibahola esitahoyera. Bakaluhaane bwaangu mani nibatula hu ngira yi ndabalagira; beyitaanyiire abeene esifwaanani sy'ebichuma.’

¹³ Haandi Omwaami yemeeda ohumboolera ati, ‘Mbweene abaandu bano, mani bona, baandu b'emyooyo myoomeranu.

¹⁴ Ndehe mbe, nyale ohubasihirisa mani abuleo omuundu yeesi hu syaalo ochia ohubeechulisaho. Njia ohweeholera olwiibulo lw'amaani haandi oluhoongo muno ohuhira olwaabwe ohutula mweewe.’

¹⁵ “Bulaanu ndeemao ndaakaluuhana ndeehirira nindula hu lugulu, nae olugulu lwali nilwaaduha omuliro; nae ebipaande bibiri eby'endagaano byali nibiri mu mahono kaange koombi.

¹⁶ Nae ndatingaala, mani bone, mwali nimumalire ohwonoona eyiri Omwaami Nasaae weeng'we; nimweholeere esifwaanani sy'emoosi y'ebichuma. Mwali nimumalire ohukaluuhana bwaangu nimutulire hu ngira yi Omwaami yabalagira.

¹⁷ Etima lyandiira mani ndaakiinga ebipaande by'amakina ebyo byoombi, ndaabihuya aasi byaadiha nimubona.

¹⁸ Ndaguunama mu moni w'Omwaami koti lu ndaholaanga mu njaako; ndaamala endaalo amahumi kane neende ebiro amahumi kane niitalyaaho esyohulya syoosi oba ohung'waaho amaachi koosi, hulw'ebyonoono byoosi bi mwahola, nimuhola ebiindu bitahoyera mu moni w'Omwaami, nimumunyoolesa.

¹⁹ Olwohuba ndali nindiirire etima ly'egiili li Omwaami yali n'abadiiriire, n'ali omwetekefu ohubasihirisa. Nae Omwaami yaambulira ehabi lino lyosi.

²⁰ Omwaami yanyoolerera Arooni muno, yaaba omwetekefu ohumusihirisa; nae ndasabira Arooni yesi ebiha byeene ebyo.

²¹ Mani ndaadiira esiindu sy'ebyonoono syeeng'we esyo, esifwaanani sy'emoosi sy'ebichuma si mwali nimuholere, ndaasisukuna mu muliro, mani ndaasisya syaanyuhuulwa syaaba koti olufu; mani ndaachuha olufu lwasyo mu mwaalo kuhulukusa nikutula hu lugulu.

²² “Haandi Tabbera yosi, neende Maasa, neende Kibburooti-Hataafa, mwanyooleserayo Omwaami.

²³ Omwaami niyabatuma ohutula Kadesi Bbarinea, n'aboola ati, mubukule esyaalo si mbabereese ohutuka. Mweemao mwaajeemera amalako k'Omwaami Nasaae weeng'we, nae haba simwamweesika oba mwaawulira ekono lyae.

²⁴ Mubeere nimujeemera Omwaami ohutula hu ludaalo lu ndabamanyiraho.

²⁵ “Mani ndaguunama mu moni w'Omwaami endaalo amahumi kane chino neende ebiro amahumi kane, olwohuba Omwaami yali niyamboleere ati achia ohubasihirisa.

²⁶ Ndekweeda Omwaami nimboola endi, ‘Ewe Omwaami Nasaae, otasihirisa abaandu bao, abaandu bao beene, ba wanunula neende obunyala bwao, abaandu ba watusa mu Misiri neende amaani kao.

²⁷ Yichulisa abahalaabani bao, Abburahamu, Yisaka, neende Yakobbo. Otatingaalaho hu bwoomeranu bw'emyooyo ky'abaandu bano, oba hu budoondobanu bwaabwe, oba hu bibi byaabwe.

²⁸ Ataali ao abaandu bomu syaalo si watutusamo baba banaaboole bati, “Omwaami haba siyanyala ohuboosa mu syaalo si yabasuubisa, haandi olwohuba yabasyuula, sakira yabayira ohubasihirisira mu siparara.”

²⁹ Olwohuba abaandu bano baandu bao nibo haandi bao beene, ba watusa mu Misiri neende obunyala bwao buungi neende amaani kao.’ ”