Amalako Kohubiri 7 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Abaandu b'Omwaami beene

¹ “Omwaami Nasaae wao achia ohuhuleeta mu syaalo si oli ohwiingiramo sibe esyao mani osituke, achia ohutusamo enjia nyiingi ch'abaandu basirimo koti: Abahiiti, Abagirigasiti, Abahiifi, Abarigaasi, Abaamoori, Abakanani, Abaperisi neende Abayebbusi, ebyaalo bitaanu-na-bibiri ebihoongo haandi eby'amaani ohubahira.

² Haandi Omwaami Nasaae wao niyahate abaandu abo mu bunyala bwao, obayiingire, ao niwo y'ochia ohubasihirisira elalira. Otaholaanga nabo endagaano yoosi, haandi otabakwiiraanga esisa.

³ Otadeehisaniaanga nabo, abaana abahaana bao batadeeheraanga abaana baabwe, oba abaana bao badeehya abahaana baabwe.

⁴ Olwohuba nibabadeehya, bachia ohukaluuhania abaana basyaani beeng'we babaanduseho, mani bachaake ohuhalaabanira banasaae baandi; ao niwo yi tima ly'Omwaami lichia ohuniinira mani abasihirise bwaangu muno.

⁵ Nae ochia ohubahola oti: ochia ohulikula alutaari chaabwe, ofunake-funake esiiro chaabwe, oteme-teme ebifwaanani bya Aseriimu baabwe, haandi osaambe ebifwaanani byaabwe neende omuliro.

⁶ “Olwohuba niing'we abaandu boolerefu eyiri Omwaami Nasaae weeng'we; Omwaami Nasaae weeng'we yabadoola ohutula hu njia chiri hu syaalo syoosi mube abaandu bae beene.

⁷ “Omwaami yabaheera haandi yaabadoolamo, sikali mbwe niing'we abali nimuli abaangi muno ohuhira abaandu baandi, nae mubwadyeeri bweene niing'we abali nimuhiramo obudiidi mu baandu boosi.

⁸ Nae Omwaami yabaheera, haandi yadaha ohwooseresa esichubo si yechubira bakuuka yeeng'we, sakira Omwaami yehoonyeera obunyala bwae ohubatusayo, haandi yaabanunula ohutula mu buwaambe yi mwali, neende mu bunyala bw'omutuki wa Misiri.

⁹ Sakira manye muti Omwaami Nasaae weeng'we niye Nasaae yeeng'ene, niye Nasaae w'obwadyeeri haandi owooseresaanga endagaano yae ohuloondakana neende obuheeri bwae butaakama eyiri abo abamuheera haandi abadiira ebilagiro byae, ohwoola hu njibulo elifu.

¹⁰ Nae abo abatamudaha, yahabetuunge n'abasihirisa, haba saacha ohuhiindaanga ohusaandya buli muundu otamudaha.

¹¹ Mani sakiraanga mubecheenge abehaliriifu ohwooseresa ebilagiro, neende amalako, neende endagaano yi mbalagira enyaanga yino.

Ehabi chiri mu huloonda amalako

¹² “Nae nimudiira haandi mwaaloonda amalako kano bulai, Omwaami Nasaae weeng'we aba achia ohuliindaanga endagaano yi yahola naang'we neende ohubeekesa obuheeri bwae butaakama koti lu yechubira bakuuka yeeng'we.

¹³ Omwaami achia ohubaheeraanga haandi ababereseenga ehabi, mani abeengiya. Achia ohuberesaanga abaana beeng'we ehabi haandi achia ohuberesaanga endalo cheeng'we chosi ehabi, mani munyooleenge amadiimwa keeng'we neende efiini yeeng'we neende amafuta k'emiseituuni keeng'we. Achia ohwiingiyaanga eng'oombe cheeng'we neende emoosi ch'ebyaayo byeeng'we, mu syaalo si Omwaami yechubira bakuuka yeeng'we ohubaberesa.

¹⁴ Muchia ohubereswaangwa ehabi ohuhiraho ebyaalo biindi. Abulao omusaacha oba omuhasi mweeng'we ochia ohubechaanga omukuumba, oba eng'oombe cheeng'we ohuhayaanga ohwiibula.

¹⁵ Omwaami achia ohumalao buli bulwaae buhaye ohubadiira; haandi kabulao amalwaae mabi ak'e Misiri, ka mwali nimumanyire, akachia ohubadiiraanga, nae kachia ohudiiraanga abasuku beeng'we.

¹⁶ Muchia ohusihirisaanga ebyaalo byoosi bi Omwaami Nasaae weeng'we achia ohuta mu bunyala bweeng'we. Mutabikwiiraanga esisa; oba mwahalaabaniraho banasaae babyo, olwohuba esyo siba sichia ohubeeholeraanga omuteego.

¹⁷ “Mutebooleraanga mu myooyo kyeeng'we muti, ‘Abaandu bano baangi muno ohutuhira, sakira haba sihunyala ohubahira amaani hwaabeerusa’

¹⁸ Mutabatichaanga, nae mwiichuliseenge ebiindu bi Omwaami Nasaae weeng'we yahola eyiri omutuki wa Misiri neende eyiri Misiri syoosi.

¹⁹ Mwiichuliseenge ohuteemwa hw'amaani hu mweeboneraho abeene, ebyamayia neende ebiwuukisa neende obunyala buungi bw'amaani, bi Omwaami yehoonyera ohubanunula ohutula mu Misiri. Mu ngeri nasilala eyo niyo yi Omwaami Nasaae weeng'we achia ohuholaanga buli baandu bamutya.

²⁰ Omwaami Nasaae weeng'we achia ohubakwiisamo oluteengo, ohwoola lu yahasihirisire abo abaliba nibadoong'ereo neende abaliba nibabeekisire baaweerao elalira.

²¹ Mutatichaanga, olwohuba Omwaami Nasaae weeng'we ali naang'we, haandi niye Nasaae w'amaani haandi otiisa.

²² Omwaami Nasaae weeng'we achia ohutusamo ebyaalo ebyo kala-kaala nimwahabe nimwiingiramo; haba simwahabatusemo ehabi lala, hu solo ndeende chihae ohwemeeda obuungi mani chaababitiiriraho.

²³ Nae Omwaami Nasaae weeng'we achia ohubata mu bunyala bweeng'we, mani abakwiisemo oluteengo lw'amaani, ohwoola lu bahasihirisirwe elalira.

²⁴ Haandi achia ohuta abatuki baabwe mu bunyala bweeng'we, mubasihirise mani ameeta kaabwe kahaye ohwiichuliswaho haandi hu syaalo syoosi. Abulao omuundu yeesi owahabayiinganieho, ohwoola lu mwahabasihirisire.

²⁵ Musaambeenge ebifwaanani bya banasaae baabwe. Mutalaluhaniraanga efeesa oba esaabbu yibiriho, haandi mutayibukulaanga, olwohuba esyo sinyala ohubeeholera omuteego. Olwohuba esyo sy'omusiro eyiri Omwaami Nasaae weeng'we.

²⁶ Mutaleetaanga esy'omusiro mu nyuumba yeeng'we, hu muhaye ohubwaabwa koti lu syabwaabwa; olwohuba siindu sibwaabe nisyo.”