Amalako Kohubiri 6 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Amalako mahuluundu

¹ “Bulaanu kano niko, amalako neende ohulabula bi Omwaami Nasaae weeng'we yandagira ohubeekesa, mubyosereseenge mu syaalo si muli aambi ohwiingiramo, sibe esyeeng'we.

² Mwiiseenge oluyaali mu Omwaami Nasaae weeng'we, eng'we neende abaana beeng'we neende abeechuhulu beeng'we, nimuliinda amalako kae neende ebilagiro bi mbalagira bino endaalo choosi, hu munyale ohuyiindira muno.

³ Sakira eng'we Abaisiraeli, tekeerese, haandi mwehaliirise ohubyooseresaanga; hu biindu bibachiire bulai, haandi hu munyale ohwiingiya koti lu Omwaami Nasaae wa bakuuka yeeng'we yabasuubisa, mu loba lai elihulukusa amabeere alala neende obuuhi.

⁴ “Ewe Yisiraeli, Omwaami Nasaae, niye Omwaami yeeng'ene.

⁵ Heeraanga Omwaami Nasaae wao neende omwooyo kwao kwoosi, neende obulamu bwao bwoosi, neende amaani kao koosi.

⁶ Mani leha emboosi ch'amalako kano koosi ka hulagira enyaanga yino kadoong'e mu mwooyo kwao.

⁷ Okeekesaanga abaana bao bulai, haandi okalomalomaangaho n'oli mu daala lyao, neende n'okeenda hu ngira, niweyaliise aasi, oba n'osiingira.

⁸ Onakeeboyaanga koti esilolero hu mahono kao, haandi okeekeseraanga mu bweeni bwao.

⁹ Okandiikaanga hu milyaangiro ky'enyuumba chao neende hu biruwa byao.

Ohulabula hudiira hu bujeemu

¹⁰ “Nae Omwaami Nasaae weeng'we niyahaboose mu syaalo si yechubira bakuuka yeeng'we, eyiri Abburahamu, Yisaka, neende Yakobbo, ati achia ohubaberesa, nimulimo ebiko bihoongo haandi ebilai, bi mutoombaha,

¹¹ neende enyuumba cheechulamo ebiindu bilai, bi mutahalaabanira, neende esulo chi mutayaba, neende endalo ch'emisabbiibbu neende emisaala ky'emiseituuni, ki mutataaka. Nae nimuba nimuliire mani mweekuta,

¹² mwehaliiriseenge muhaya ohwiibiriranga Omwaami, owabatusa mu syaalo sy'e Misiri yi mwali koti abawaambe.

¹³ Mwiseenge oluyaali mu Omwaami Nasaae weeng'we; mumuhalaabanireenge, haandi mwechubeenge nimwehoonyera eliita lyae.

¹⁴ Muteenamiraanga banasaae baandi, banasaae b'abaandu babeebodoohaanie.

¹⁵ Olwohuba Omwaami Nasaae weeng'we haba sayiinganisibwaanga. Ataali ao, etima ly'Omwaami Nasaae weeng'we liba lichia ohubaaduhiraho koti omuliro, mani abasihirise muwe hu syaalo.

¹⁶ “Mutateemaanga Omwaami Nasaae weeng'we, koti lu mwamuteema nimuli Maasa.

¹⁷ Muliindeenge bulai ebilagiro by'Omwaami Nasaae weeng'we, neende amalako kae neende engeraka chae, bi yabalagira.

¹⁸ Muholeenge ebiindu bilai haandi ebihoyera mu moni w'Omwaami, hu biindu bibachiire bulai, munyale ohwiingira haandi mutuke esyaalo silai si Omwaami yeechuba ohuberesa bakuuka yeeng'we.

¹⁹ Omwaami achia ohwiirusamo abasuku beeng'we boosi koti lu yabasuubisa.

²⁰ “Abaana beeng'we nibabateebaanga mu ndaalo chiichayo bati, ‘Amahuluundu k'amalako kano neende ebilagiro bino neende engeraka yino bi Omwaami Nasaae weefwe abalagiire niko siina?’

²¹ Mubaboolereenge muti, ‘Hwali abawaambe b'omutuki wa Misiri mu Misiri; nae Omwaami yatutusa mu Misiri neende obunyala bwae bw'amaani.

²² Mani efwe abeene hweeboneraho neende emoni cheefwe obulolero neende eby'amayia, eby'amaani haandi ebitiisa bi Omwaami yahola mu Misiri neende eyiri omutuki wa Misiri neende abomu nyuumba yae boosi.

²³ Nae efwe, Omwaami yatutusayo, hwaanyale ohutuleeta ano mani atuberese esyaalo si yechuba ohuberesa bakuuka yeefwe.

²⁴ Mani Omwaami yatulagira ohudiira amalako kano koosi, ohwiisa oluyaali mu Omwaami Nasaae weefwe, hulw'obulai bweefwe endaalo choosi, hu hunyale ohuyiindira, koti lu huli buti.

²⁵ Haandi sinatubeeranga esiluungifu, nihudiira bulai ebilagiro by'Omwaami Nasaae weefwe bino byoosi, koti lu yatulagira.’ ”