Amalako Kohubiri 5 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Amalako ehumi

¹ Musa yalaanga Abaisiraeli boosi yaababoolera ati, “Eng'we Abaisiraeli, tekeerese, amalako neende ebilagiro bi mbaboolera enyaanga yino. Mubyeeke haandi mwehaliirise ohubyooseresaanga.

² Omwaami Nasaae weefwe yahola naafwe endagaano hu lugulu lwa Sinai.

³ Endagaano yino Omwaami haba siyayihola neende bakuuka yeefwe, nae yayihola naafwe fweesi abali ano enyaanga yino.

⁴ Omwaami yalomaloma naang'we nimubona abeene hu lugulu olwo, naali akatikaati w'omuliro.

⁵ Mu biha ebyo, ese ndali ninyemere akati weeng'we neende Omwaami, ohubeekesa bi Omwaami yali n'aboola; olwohuba mwali nimutiire omuliro haandi nimuhayire ohuniina hu lugulu. Yaboola ati:

⁶ “Niise Omwaami Nasaae weeng'we owabatusa mu syaalo sy'e Misiri, yi mwali koti abawaambe.

⁷ “ ‘Mutabechaanga neende banasaae baandi ohumalaho ese.

⁸ “ ‘Oteholeraanga omweene esifwaanani sy'esiindu syoosi, oba esifwaanani sy'esiindu syoosi esiri Muukulu aakulu, oba esiri hu syaalo aasi, oba esiri mu maachi kali aasi w'esyaalo.

⁹ Otabiinamiraanga oba obihalaabanira; olwohuba ese Omwaami Nasaae wao haba sinyiinganisibwaanga. Saandya abeechuhulu bohudatu neende abohune ab'olwiibulo lw'abakuukaao bataandaha.

¹⁰ Nae njekesa obuheeri bwaange butaakama eyiri enjibulo elifu ch'abo abaheera haandi abadiira amalako kaange.

¹¹ “ ‘Otehoonyeraanga eliita ly'Omwaami Nasaae wao n'otaali neende echoomo: olwohuba Omwaami achia ohusaandya buli muundu wehoonyera eliita lyae buhaya.

¹² “ ‘Husaanga oludaalo lwa Sabbaato, oluhusa mu bwoolerefu, koti Omwaami Nasaae weeng'we yabalagira.

¹³ Muli neende endaalo chisaasaba ech'ohuholeraangamo emirimo, mani muholeenge emirimo kyeeng'we kyoosi.

¹⁴ Nae hu ludaalo lwahataanu-na-habiri nilwo Sabbaato y'Omwaami Nasaae weeng'we. Hu ludaalo olwo otaholaangaho omulimo kwoosi, ewe, oba abaana bao basyaani oba abahaana, oba abawaambe bao basaacha, oba abahasi, oba eng'oombe endaawu yao, oba esuhiri, oba eng'oombe yao yoosi, oba bawalukeendua bali mu daala lyao. Abahalaabani bao abasaacha neende abahasi banawuluuhaanga koti lu eng'we muwuluuhaanga.

¹⁵ Mwiichuliseenge muti mwesi mwaliho abawaambe mu syaalo sy'e Misiri, mani Omwaami Nasaae weeng'we yaabatusayo niyehoonyera obunyala bwae buungi neende amaani. Sakira Omwaami Nasaae weeng'we yabalagira ohuhusaanga oludaalo lwa Sabbaato.

¹⁶ “ ‘Yiseenge oluyaali mu balaata yeeng'we neende mu bang'ineeng'we, koti lu Omwaami Nasaae weeng'we yabalagira; hu munyale ohuyiindira, haandi hu biindu binyale ohubachiira bulai mu syaalo si Omwaami Nasaae weeng'we ali ohubaberesa.

¹⁷ “ ‘Muteetaanga omuundu.

¹⁸ “ ‘Mutayiranaanga obucheke.

¹⁹ “ ‘Muteebaanga.

²⁰ “ ‘Mutatusaanga obuloli bw'obubacha hu muundu yeesi.

²¹ “ ‘Haandi mutekoombanga omuhasi w'omuundu, oba mwekoomba enyuumba yae, endalo yae, omuwaambe wae musaacha oba omuhasi, oba eng'oombe endaawu yae, oba esuhiri yae, oba esiindu syoosi syali nasyo.’

²² “Emboosi chino choosi, Omwaami yababoolera nimwebuusiire alala hu lugulu. Yachilomalomera mu kono ly'aakulu, naali akatikaati w'omuliro, neende mu bireesi, neende mu siirima sya titititi; mani n'atameedaho emboosi chiindi. Yandiika amalako kano hu bipaande by'amakina bibiri, mani n'abiimberesa.

Obuti bw'abaandu

²³ “Nae nimwawulira ekono nilitula akatikaati w'esiirima, olugulu nilwaaduha omuliro, mwasuda aambi naange, abeemirisi b'enono cheeng'we boosi, neende abahuluundu beeng'we.

²⁴ Mwaboola muti, ‘Bona, Omwaami Nasaae weefwe atwekeese oluyaali lwae neende amaani kae, haandi huwuliire ekono lyae nilitulira akatikaati w'omuliro! Enyaanga yino huwuliire Nasaae n'alomaloma neende omuundu, nae omuundu yadoong'a n'asisiiri omulamu.

²⁵ Nae bulaanu, lwasiina hufwe? Olwohuba omuliro kw'amaani kuno kuchia ohutusihirisa; haandi nihunaakaluhiremo ohuwulira ekono ly'Omwaami Nasaae weefwe ehabi liindi, huchia ohufwa.

²⁶ Olwohuba, wiina mweene owali niyawuliraho ekono lya Nasaae mulamu nililomalomera akatikaati w'omuliro, koti lu efwe huwuliire, mani yaadoong'a n'aluwo omulamu?

²⁷ Ewe Musa, suda aambi, otekeerese ebyo byoosi bi Omwaami Nasaae weefwe aboola; mani okaluhe otuboolere ebyo byoosi bi achia ohuhuboolera. Huchia ohubiwulira haandi hubiholereho.’

²⁸ “Omwaami yawulira emboosi cheeng'we chi mwamboolera; haandi Omwaami yamboolera ati, ‘Mbuliire emboosi ch'abaandu bano chi bahuboolere; babeere abadyeeri ohulomaloma koti lu baboolere.

²⁹ Mani baba nibali neende ebibaaso biri biti endaalo choosi, ohutya haandi ohuliinda ebilagiro byaange byoosi, hu biindu bibachiire bulai alala neende abaana baabwe bosi endaalo choosi!

³⁰ Chia obaboolere bakaluhe mu mayeema kaabwe.

³¹ Nae ewe, yema aambi naange, mani njia ohuhuboolera amalako koosi neende ebilagiro byoosi by'ochia ohubeekesa, babyosereseenge nibali mu syaalo si njia ohubaberesa basituke.’

³² Mani sakira mwehaliirise bulai muhole koti lu Omwaami Nasaae weeng'we abalagiire; ataali ohukanaakana hwoosi.

³³ Muchianakaneenge neende ebyo byoosi bi Omwaami Nasaae weeng'we abalagiire, hu munyale ohuyiindira, haandi hu biindu bibachiire bulai, mani hu munyale ohuyiindira mu syaalo si muchia ohwiingiramo.”