Amalako Kohubiri 34 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ohufwa hwa Musa

¹ Musa yatula mu bipaapi bya Moabbu, mani n'aniina hu lugulu lwa Nebbo, aakulu w'olugulu lwa Pisiga, ebukwe wa Yeriko. Naali eyo, Omwaami yamweekesa esyaalo syoosi, ohutula Gileadi ohwoola Daani,

² neende esituundu syoosi esya Nafutaali, neende esyaalo syoosi esya Efuraimu neende Manaase, esyaalo sya Yuda syoosi ohwoolera elalira hu nyaanja hoongo ya Mediterania;

³ emwaalo w'esituundu sya Yudea; neende esipaapi, elyo nilyo, ehooho ly'esiko sya Yeriko, esy'emisaala minaasi, ohwoolera elalira Soyaari.

⁴ Omwaami mani n'aboolera Musa ati, “Sino nisyo esyaalo si ndeechubira Abburahamu, Yisaka neende Yakobbo, endi, ‘Njia ohusiberesa abeechuhulu beeng'we.’ Ngerere wasibona neende emoni chao, nae haba s'ochia hwaambuha osiingiremo daawe.”

⁵ Musa, omuhalaabani w'Omwaami yafwiira eyo mu syaalo sya Moabbu, ohuchianakana neende emboosi y'Omwaami.

⁶ Bamusiiha mu hooho mu syaalo sya Moabbu elitingaalire esiko sya Bbetipewoori, nae abulao omanyire yi siriindwa syae siri ohwoola buti.

⁷ Musa yafwa naali neende emyaaka emia ndala neende amahumi kabiri (120); kata katyo, yali n'asiibona bulai haandi n'asisiiri ow'amaani.

⁸ Nae Abaisiraeli balira Musa nibali mu sipaapi sya Moabbu ohumala endaalo amahumi kadatu; mani amasika nikeeya.

⁹ Yosua omwaana wa Nuuni, yali niyechuule amakesi, olwohuba Musa yaali n'amalire ohumwiisaho amahono. Abaisiraeli bamuwulira, haandi bahola koti Omwaami lu yali niyalagira Musa.

¹⁰ Mani ohutula olwo, sabechangahoo omunabbi mu Yisiraeli yi Omwaami yamanya mani yalomalomaanga nae emoni-hu-moni koti Musa.

¹¹ Haandi sabechangahoo omunabbi wuundi owahola obulolero neende eby'amayia bi Omwaami yatuma Musa ohuhola mu syaalo sy'e Misiri, eyiri omutuki wa Misiri neende abahunuufu bae boosi, neende eyiri abaandu bomu syaalo syae boosi.

¹² Haandi abulao omunabbi wuundi owaholaho eby'amaani ebyo byoosi haandi neende ebitiisa koti bi Musa yahola Abaisiraeli boosi nibabona.