Amalako Kohubiri 32 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ “Ewe Ekulu, tekeeresa, mani owulire bi mboola; nae leha esyaalo siwulire bi nomanoma.

² Leha bi njekesa bikwe koti efula, enomanoma yaange yidoonye koti olume, koti olufuuchakirisi ludoonya hu muboka, haandi koti lu fula yikwa hu misaala kiloha.

³ Olwohuba njia ohukinia eliita ly'Omwaami, naangirire obuhunuufu bwa Nasaae!

⁴ “Omwaami niye omukayi weeng'we w'amaani; bi ahola byoosi biluungifu. Nasaae mweesikwa niye, haandi muhoyerwa, ahola ebyadyeeri haandi ebilai.

⁵ Nae abaandu nibo abahola-mbi, haba sibahoyere ohuba abaana bae olwohuba ebyonoono byaabwe; lwiibulo ludoondobanu haandi luhyaamu nilwo.

⁶ Eyo niyo engeri yimuhoyere ohubisiramo Omwaami, eng'we abaandu basiru haandi abataali neende amakesi? Haba siniye laata yeeng'we owabaloonga, owabahola mani yaabataao mwaaba esyaalo?

⁷ Yichulise endaalo ehale, baaseho hu myaaka ky'omuleembe kwa hale muno; teebe balaata yeeng'we, bachia ohubeekesa; teebe bakuuka yeeng'we ebyaliwo, mani bachia ohubaboolera.

⁸ Oyo ow'Aakulu Muno niyali akabira ebyaalo eloba lyaabwe, niyali niyawulamo abaandu, yabaterao enjaho chaabwe ohuchianakana neende obuungi bw'abaana ba Nasaae.

⁹ Olwohuba Omwaami niye omukabo kw'abaandu bae, abeechuhulu ba Yakobbo yabadoola ohuba abaandu bae beene.

¹⁰ “Yabanyoola nibang'alaala mu sichiimi, haandi mu siparara syoomu, si muyaka kuwuuchamo; mani yabebodoohania, yabaliinda, yabaliinda bulai muno.

¹¹ Koti lu eeswi lu yibundaala hu siyu syao, mani yaabbburuhira ali obumwiinyu bwao, niyibudiira, yabukiingira hu mbaya chalyo,

¹² Omwaami yeeng'ene niye owemerera abaandu bae, mani abulao nasaae muteende owamuhoonyaho.

¹³ Yakera baatuka esyaalo sy'engulu, mani baalya ebyohulya bilimwa mu ndalo. Yakera baanuuna obuuhi bwomu lwaanda, haandi eloba ly'ebikina-kina lyameramo amafuta k'esing'aari.

¹⁴ Basacha amabeere batusamo amafuta, haandi baahama amabeere maangi ohutula mu byaayo byaabwe. Batuka amakoondi makinu neende emiiku, ebyaayo bya Bbasani neende embusi, neende engaano yihiramo obulai. Banyuha omweenge kw'emisabbiibbu kunyunyuula, baang'wa efiini yakwo.

¹⁵ “Nae Abaisiraeli beehola abayiinda, mani baajeema; bahomera mani ebyohulya byaabatuumbula. Nae batula hu Nasaae wabaloonga, haandi baalekeeresa ow'Obunyala, omuwonia waabwe.

¹⁶ Ohwiinamira banasaae bateende byakera embaliha yaamudiira; bahola esy'omusiro, mani basiingisa etima lyae.

¹⁷ Bayaanira emisaambwa kitaali nasaae ebiyaanwa, banasaae batamanyihaane, banasaae bayaaha, abahechao sa, ba bakuuka yaabwe bateenamiraanga.

¹⁸ Beebirira ow'Obunyala owabaloonga, mani mweebirira Nasaae wababeresa obulamu.

¹⁹ “Omwaami yabona sino, mani yanyoolera, olwohuba yebwaaba abaana bae basyaani neende abahaana.

²⁰ Mani n'aboola ati: njia ohubeekisa, mani mbone enjakamo yaabwe. Olwohuba beeholere olwiibulo lujeemu, abaana babulamo obweesikwa.

²¹ Bakera embaliha yaandiira hulw'ebiima byaabwe by'ohwiinamira ebiloongaloongwe. Baanyoleese neende ohweesika ebiloongaloongwe byaabwe. Mani syesi njia ohubadiirira embaliha ninjuunirwa abaandu bataali abaange. Njia ohubanyoolesa nindehoonyera esyaalo sitaali neende amakesi.

²² Olwohuba etima lyaange lyaaduha koti omuliro, mani lisaamba ohwoolera elalira aasi w'Emakoombe, ohusihirisa esyaalo neende buli siindu si siriho, mani lyaadusa omuliro hu bwaalo bw'engulu.

²³ “ ‘Njia ohubabuungihaho ebibi bya buli ngeri; ndahabamalireho obusaale bwaange.

²⁴ Bahafwiicheenge enjala neende omusuuja, mani basihiriswe neende omubasu kusaamba muno neende esike ch'obutwa. Haandi njia ohusiindiha esolo chomu siino chibalye, neende enjuha chaambaaka hu loba chibatemule.

²⁵ Erwaanyi, ebiita byahabeete, nae mu nyuumba obuti bwahabeete, nibisihirisa abasyaani baraaga baabwe neende abaana bahaana baabwe bataamanyireho eby'abasaacha, abaana basinuuna neende abasaacha bakofu nasilala.

²⁶ Ndahaboolere endi, “Njia ohubasaalanisirya eyale, abuleo omuundu yeesi owahabechuliseho.”

²⁷ Nae haba sindanyala ohuleha abasuku baabwe beepaaha, nibaboola bati: Hulw'obunyala bw'amaani keefwe hwabayiingira, nae Omwaami siniye oholere sino.’

²⁸ “Olwohuba Abaisiraeli haba sibanyala ohukerakirwa; haandi babulamo omuundu otegeera.

²⁹ Baba nibali neende amakesi bahamanyire sino, bahamanyire esikerere abasuku baabwe babayiingira.

³⁰ Omuundu mulala yahayingiire atye abaandu elifu ndala, haandi babiri bakera abaandu elifu ehumi beeruha, ohutusaho Ow'obunyala obaliinda yaaba n'atabetusaho, haandi Omwaami yabajwaang'a?

³¹ Olwohuba abasuku baabwe bamanyire bati banasaae baabwe bakata nibo, haba sibali neende maani koti Nasaae w'Abaisiraeli.

³² Olwohuba emisabbiibbu kyaabwe kitula Sodomu; haandi neende mu ndalo cha Gomora; emisabbiibbu kyaabwe kyaamaho ebyaamo by'obutwa, haandi ebyaaku byahwo bilulu nibyo.

³³ Efiini yaabwe y'obusiba koti obw'endemo, haandi bwaalaba koti ehala.

³⁴ “Omwaami yechulisa ebiindu bi basuku baabwe bahola; biri mu bibaaso byae.

³⁵ Omwaami niye okayirira esyaalo, haandi niye otuunga, ebiha bichia ohwoola basyeeluluhe bakwe aasi; olwohuba oludaalo lw'ohusaanda hwaabwe luli aambi, neende olwohubasihirisa lwiicha bwaangu.

³⁶ Olwohuba Omwaami aliheengerao abaandu bae omusaango mani yakwiira esisa eyiri abahalaabani bae, niyahabona ati boosi baweeremo amaani, mani omuwaambe neende omulehuule nasilala nibaweeremo elalira amaani.

³⁷ Ao mani Omwaami yahabateebe ati, ‘banasaae baabwe bali yeena, ab'obunyala babesikaanga,

³⁸ abalichaanga amasinya k'ebiyaanwa byaabwe, haandi abang'wechaanga efiini y'ebiyaanwa byaabwe by'ohung'wa? Lehe beeche mani babahoonye, lehe mani babaabine!

³⁹ “ ‘Bulaanu bone muti Niise, kata buti Niise, Nasaae oyo, haandi abulao nasaae wuundi ohumalaho ese; Niise owiita haandi Niise oberesa obulamu. Niise ofumita haandi Niise owonia; mani abulao onyala ohundusaho esiri mu bunyala bwaange.

⁴⁰ Olwohuba siingisa amahono kaange eyiri Ekulu, mani ndeechuba nimboola endi, Koti lu ndi omulamu endaalo choosi,

⁴¹ njia ohwakala olugaanga lwaange lumesamesa mani ese omweene heenge omusaango. Njia ohwetuunga abasuku baange, haandi njia ohusaandya abo abataandaha.

⁴² Obusaale bwaange bwaheechuleho amabaanga, haandi olugaanga lwaange lwahabosyoole emibiri kyaabwe; alala neende amabaanga kabeeterwe neende abaambirwe, neende emitwe ky'abeemeresi b'abasuku.’

⁴³ “Eng'we ebyaalo, fumie abaandu b'Omwaami; olwohuba yahetuunge amabaanga k'abahalaabani bae, mani yaasaandya abo abeeta abahalaabani bae, mani yakwiira esisa esyaalo sy'abaandu bae.”

⁴⁴ Musa neende Yosua omwaana wa Nuuni mani nibalomaloma emboosi ch'olweembo luno abaandu bosi banyale ohuluwulira.

Ebilagiiriro bya Musa bimaliirihayo ohutuswa

⁴⁵ Musa niyamala ohulomaloma emboosi chino choosi neende Abaisiraeli boosi,

⁴⁶ yababoolera ati, “Mute hu mwooyo emboosi choosi chi mbekeese nyaanga yino. Mucheekese abaana beeng'we, hu banyale ohuteemaangaho ohwooseresa ebiindu byoosi ebilagirwa mu malako kano.

⁴⁷ Olwohuba chino si nicho emboosi ch'ohubayiraho, nae nicho obulamu bweeng'we bweene, haandi nicho echahakere mwaayiindira mu syaalo si muchia ohutuka nimwaambuuhe omwaalo kwa Yorodaani.”

⁴⁸ Omwaami yaboolera Musa hu ludaalo lweene olwo ati,

⁴⁹ “Cha mu ngulu cha Abbariimu, oniine hu lugulu lwa Nebbo, oluli mu syaalo sya Moabbu, olutingaalire Yeriko, mani otingaale esyaalo sya Kanani, si mberesa Abaisiraeli ohuba esyaabwe.

⁵⁰ Ochia ohufwiira hu lugulu olwo koti lu mwaanamao Arooni yafwiira hu lugulu lwa Hoori, mani yeyambaania neende bakuuka yaabwe.

⁵¹ Olwohuba eng'we mweembi mwahalaka efukiirira naange mu lwichuule lw'Abaisiraeli. Nimwali hu maachi ka Meribba, mu sichiimi sya Siini; olwohuba haba simwanjisaamo oluyaali koti omwoleerefu mu moni wa Abaisiraeli.

⁵² Ochia ohubona esyaalo si huli mu moni; nae haba s'ochia ohwiingira mu syaalo si ndi ohuberesa Abaisiraeli.”