Amalako Kohubiri 31 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Yosua yeehaswa ohuba omusiha wa Musa

¹ Musa yemeeda ohulomaloma emboosi chino eyiri Abaisiraeli boosi.

² Yababoolera ati, “Enyaanga yino mbano njosere emyaaka emia ndala neende amahumi kabiri (120). Haba sisinyala ohubeemerera, haandi Omwaami yamboolere ati, ‘Haba s'ocha ohwaambuha omwaalo kwa Yorodaani.’

³ Omwaami Nasaae weeng'we mweene niye ochia ohubeemerera. Achia ohusihirisa ebyaalo ebyo nimubona, mani mubituke. Yosua niye ochia ohubemereramo mwaambuhe omwaalo kwa Yorodaani, koti lu Omwaami yaboolere.

⁴ Omwaami achia ohuyiingira abaandu abo koti lu yayiingira Sihooni neende Ogu, abatuki b'Abaamoori, bayasihirisa neende ebyaalo byaabwe.

⁵ Omwaami achia ohubibaberesa, mani mubihole ohuchianakana neende ebilagiro byoosi bi ndi ohubalagira.

⁶ Mube abagumu haandi abamaliirifu. Mutatya oba mwawaamo omwooyo daawe. Olwohuba Omwaami Nasaae weeng'we achia ohubechaanga naang'we; haba saachia ohubalehaanga oba abajwaang'a.”

⁷ Musa yalaanga Yosua, mani n'amuboolera mu moni ch'Abaisiraeli boosi ati, “Ba omugumu haandi omumaliirifu; olwohuba niiwe ochia ohwemerera abaandu bano ohwiingira mu syaalo si Omwaami yechuba ohuberesa bakuuka yeefwe; bachia ohusituka.

⁸ Omwaami niye ochia ohubeemereraangamo; achia ohubechaanga naang'we, haba s'achia ohubalehaanga oba abajwaang'a. Mutatichaanga oba mweyendehera daawe.”

Amalako ka Nasaae kahoyrere ohusomwaanga hu buli w'emyaaka kitaanu-na-kibiri

⁹ Musa yandiika amalako kano, mani n'akadiisa abalaamisi Baleefi, abakiingaanga Esanduuku ly'Endagaano y'Omwaami, neende abeemirisi boosi aba Yisiraeli.

¹⁰ Musa yabalagira ati, “Buli myaaka kitaanu-na-kibiri nikinabiteengeo, mu biha bi yataao ohuleheraangamo amakobi, mu Esidyaalo sy'Ebikaali,

¹¹ Abaisiraeli boosi nibeecha ohwiinamira Omwaami Nasaae weeng'we abuundu yi yahadoole, muchia ohusomaanga amalako kano eyiri Abaisiraeli boosi nibawulira.

¹² Muhung'anieenge abaandu boosi, abasaacha neende abahasi neende abaana bayere, neende bawalukeendwa bamenya mu biko byeeng'we; mani banyale ohuwulira haandi beeke ohwiisaanga oluyaali mu Omwaami Nasaae weeng'we, neende ohudiiraanga amalako kano koosi.

¹³ Mu ngeri yino, abaana baabwe abasisiiri ohukamanya bachia ohuwulira mani beeke ohwiisaanga oluyaali mu Omwaami Nasaae weeng'we endaalo choosi chi munabecheenge mu syaalo si muchia ohutuka nimwaambuuhe omwaalo kwa Yorodaani.”

Ebiindu bi Omwaami yamaliirihayo ohulagira Musa ohwooseresa

¹⁴ Omwaami yaboolera Musa ati, “Mbona endi endaalo ch'ohufwa hwao mbano chiri aambi ohwoola. Laanga Yosua, omuleete mu Yeema ly'ohubukananiramo, mukerakire.” Musa neende Yosua nibeecha abeene mu Yeema ly'ohubukananiramo.

¹⁵ Omwaami yababonehera mu siiro y'ebireesi; mani omusiiro kw'ebireesi nikweema aakulu w'olwiiki lw'Eyeema.

¹⁶ Omwaami yaboolera Musa ati, “Bona, oli aambi ohufwa obe alala neende bakuuka yao. Nae n'omalire ohufwa, abaandu bano haba sibachia ohuba abeesikwa yi ndi haandi bachia ohufunaka endagaano yaange yi ndahola nabo. Bahandehe ao mani bachaaka ohwiinamira banasaae bomu syaalo si bali aambi ohwiingiramo.

¹⁷ Ao mani etima lyaange lichia ohubedihaho mu biha ebyo. Njia ohubebwaaba haandi mbeekise, mani bachia ohusihiriswa. Ebidinyu biingi neende ohusaanda huungi bichia ohubakwaaho, mani bahaboole mu ndaalo echo bati, ‘Ebidinyu bino bitukwiireho olwohuba Nasaae weefwe haba sasisiiri naafwe.’

¹⁸ Nae mubwadyeeri bweene, njia ohubeekisa mu ndaalo echo ohweema hu bibi bi bahabe nibaholere. Olwohuba bahabe bakaluhaane nibeenamira banasaae baandi.

¹⁹ Mani sakira, ewe omweene yandiika olweembo luno, mani olweekese Abaisiraeli; lehe balweembe. Olweembo luno luchia ohuba omuloli waange, ohusaandya Abaisiraeli abo.

²⁰ Olwohuba nindahabayire mu syaalo silai haandi esiyiinda, esyaalo si ndeechuba ohuberesa bakuuka yaabwe. Nae nibahabe nibamalire ohulya mani beekuta, haandi baahomera, bahakaluuhane baachia eyiri banasaae baandi mani babahalaabanira, nae bahandekeerese mani bahalaka endagaano yaange.

²¹ Mani ebidinyu neende ohusaanda huungi nibyahabakweeho, olweembo luno luchia ohubakobosamo omwooyo koti omuloli (Abeechuhulu baabwe haba si bahalwiibirire). Olwohuba manyire ebichiiririrwa byaabwe, kata nisisiiri ohubayira mu syaalo si ndeechuba ohubaberesa.”

²² Musa yaandiika olweembo luno hu ludaalo lweene olwo, mani yalweekesa Abaisiraeli.

²³ Omwaami yalomaloma neende Yosua omwaana wa Nuuni, naamuboolera ati, “Guma omwooyo haandi obe omwomiifu; olwohuba niiwe ochia ohuyira Abaisiraeli mu syaalo si ndeechuba ohubaberesa; mani njia ohubechaanga alala naawe.”

²⁴ Musa niyali naamalire ohwandiika emboosi ch'amalako kano mu sitabo, ohuchimalirao elalira,

²⁵ yaboolera abalaamisi Baleefi abakiingaanga Esanduuku ly'Endagaano y'Omwaami ati,

²⁶ “Mubukule esitabo sy'amalako sino, mani musite aambi neende esanduuku ly'endagaano y'Omwaami Nasaae weeng'we, sinyale ohuba obuloli buyiingania abaandu bae.

²⁷ Olwohuba manyire koti lu bali abajeemu haandi ab'esyeejo. Bona, kata nyaanga yino nisisiiri nabo, bamalire ohujeemera Omwaami, nae bahaake yeena nimalire ohufwa!

²⁸ Naangire abeemeresi b'enono cheeng'we, neende abahunuufu beeng'we, mani nomanome emboosi chino nibawulira. Leha naange ekulu neende esyaalo bibe abaloli bibayiingania.

²⁹ Olwohuba manyire endi, nindahafwe, bahehole ababi elalira, haandi balehane neende bi mbalagiire ohuhola. Mani mu ndaalo chiicha ebidinyu bichia ohubakwichaangaho, olwohuba mwahabecheenge nimwoononere mu moni w'Omwaami, nimumunyoleese ohweema hu biindu bibi bi muhola.”

Olweembo lwa Musa

³⁰ Mani Musa yalomaloma emboosi ch'olweembo luno choosi Abaisiraeli boosi nibawulira.