Amalako Kohubiri 30 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ebihoyerwa ohuholwa hu mukobole eyiri Omwaami neende ohunyoola ehabi

¹ “Nae ebiindu bino byoosi, ehabi neende ebibwaabo, bi mbateere mu moni weeng'we, nibyahamale ohubakwaaho, mubiichuliseenge mu byaalo byoosi bi Omwaami Nasaae weeng'we yahabayire.

² Mukobole eyiri Omwaami Nasaae weeng'we, eng'we neende abaana beeng'we. Mani muwulireenge ekono lyae neende emyooyo kyeeng'we kyoosi, neende obulamu bweeng'we bwoosi mu biindu bi mbalagira enyaanga yino bino byoosi.

³ Omwaami Nasaae weeng'we achia ohubakobosera ehabi cheeng'we, haandi abakwiire esisa, achia ohubabuusa alala n'abatusa mu byaalo byoosi yi Omwaami Nasaae weeng'we yali n'abasalanisiire.

⁴ Kata mwahaba ni mwasalanisiirwa mu soonda ch'ebyaalo by'eyale, Omwaami Nasaae weeng'we achia ohubabuusa alala, mani abakobose haandi.

⁵ Omwaami Nasaae weeng'we achia ohubaleeta mu syaalo si bakuuka yeeng'we batuka, mani mwesi musituke; haandi achia ohukera muhulaahulane muno mani mwiingiye ohuhira bakuuka yeeng'we.

⁶ Omwaami Nasaae weeng'we achia ohubaberesa emyooyo milai, eng'we neende abaana beeng'we, mani muheeraanga Omwaami Nasaae weeng'we neende emyooyo kyeeng'we kyoosi neende obulamu bweeng'we bwoosi; hu munyale ohwemeeda ohumenya mu syaalo esyo.

⁷ Omwaami Nasaae weeng'we achia ohuta ebibwaabo ebyo byoosi hu basuku beeng'we, abo ababasyuula haandi ababayiingania.

⁸ Muchia ohuwulira ekono ly'Omwaami, haandi mudiire ebilagiro byae byoosi bi mbalagira enyaanga yino.

⁹ Omwaami Nasaae weeng'we achia ohubaberesa ehabi mani muhulaahulane mu buli siindu si munaholeenge. Muchia ohwiibula abaana baangi, ebisolo byeeng'we byosi bichia ohwiingiya, neende ebirime byeeng'we byosi bicha ohwemeeda. Olwohuba Omwaami haandi achia ohusangaala naang'we mani ababerese ehabi, koti lu yasangaalira bakuuka yeeng'we.

¹⁰ Nimuwulira ekono ly'Omwaami Nasaae weeng'we, nimuliinda ebilagiro byae neende amalako kae ebyandiikwa mu sitabo sy'amalako sino, mani nimukobola eyiri Omwaami Nasaae weeng'we neende emyooyo kyeeng'we kyoosi, neende obulamu bweeng'we bwoosi.

¹¹ “Olwohuba esilagiro si ndi ohubalagira enyaanga yino haba si sidinyu muno, haandi haba sisiri eyale muno.

¹² Haba sisiri Muukulu, hu mweemeo muboole muti, ‘Wiina onatuchiire Muukulu yasituleetera, hu hweemeo husiwulire haandi husidiire?’

¹³ Haandi haba sisiri engereha w'enyaanja, hu hweemeo huboole huti, ‘Wiina onatwaambuhire enyaanja, mani yaasituleetera, hu hweemeo husiwulire haandi husidiire?’

¹⁴ Nae emboosi yiri aambi naang'we, yiri mu munwa kweeng'we haandi neende mu mwooyo kweeng'we, hu bulaanu munyale ohuyidiira.

¹⁵ “Bone, mbao mbaterereo mu moni weeng'we, obulamu neende esilai, ohufwa neende esyonoono.

¹⁶ Nimuwulira ebilagiro by'Omwaami Nasaae weeng'we, bi mbalagira enyaanga yino, nimuheera omwaami Nasaae weeng'we, nimumuwulira haandi nimudiira ebilagiro byae neende amalako kae, engeraka chae, ao muba muchia ohumenya haandi muyiindire, Omwaami Nasaae weeng'we achia ohubaberesa ehabi mu syaalo si muli ohwiingiramo mani musituke.

¹⁷ Nae emyooyo kyeeng'we nikikaluuhana kyatula hu Omwaami, mani mwahaya ohumuwulira, mwachaaka ohwiinamira banasaae baandi haandi mwabahalaabanira,

¹⁸ mbaboolera enyaanga yino endi, muchia ohusihirira. Haba simuchia huyiindira mu syaalo si muli aambi ohwaambuha omwaalo kwa Yorodaani mani musituke.

¹⁹ Bulaanu, enyaanga yino naanga ekulu neende esyaalo ohuba abaloli, endi tereo mu moni weeng'we, obulamu neende ohufwa, ehabi neende esibwaabo. Mani sakira, doole obulamu, hu eng'we neende abaana beeng'we munyale ohuyiindira.

²⁰ Daheenge Omwaami Nasaae weeng'we, mumuwulireenge, haandi mumwomiirireengeho; olwohuba niye obulamu bweeng'we neende ohuyiindira hweeng'we. Ao mani munayiindireenge mu syaalo si Omwaami yechuba ohuberesa bakuuka yeeng'we, Abburahamu, Yisaka neende Yakobbo.”