Amalako Kohubiri 28 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ehabi chinyoolehana mu buwulisi

¹ “Nae ni munaawulireenge ekono ly'Omwaami Nasaae weeng'we, mani mwadiiraanga ebilagiro byae byoosi bi mbalagira enyaanga yino, Omwaami Nasaae weeng'we oyo yaabahole mwaaba esyaalo sihiramo obuhunuufu hu syaalo syoosi.

² Nimuwulira ekono ly'Omwaami Nasaae weeng'we, ehabi chino choosi chahababeeho mani mwaachinyoola.

³ Omwaami anaababereseenge ehabi mu biko byeeng'we, haandi munabecheenge neende ehabi kata neende mu byaalo weeng'we.

⁴ Munabecheenge neende ehabi mani mwiibula abaana abaangi, haandi ebyaamo by'eloba lyeeng'we binaabecheenge ebiingi. Ehoonge ch'ebyaayo byeeng'we, neende eng'oombe cheeng'we bichia ohwemeedaanga, haandi amakoondi keeng'we kachia ohwiibulanaanga.

⁵ Emere yi munalimeenge neende ebyohulya bi munaadeheenge ohuyitulamo bicha ohubechaanga eby'ehabi.

⁶ Munabecheenge neende ehabi nimwiingira haandi munabecheenge neende ehabi nimutula erwaanyi.

⁷ “Omwaami anayiingiraanga abasuku beeng'we babaseeta nimubona. Banaadiireenge engira ndala nibeecha ohubaseeta, nae bachia ohwiiruhaanga ohubatulaho nibakoterwe engira yabaleeta.

⁸ Omwaami Nasaae weeng'we achia ohubabechaanga ehabi mu buli siindu si muhola. Achia ohwiichusaanga ebyaaki byeeng'we; haandi anaababecheenge ehabi mu syaalo syaali ohubaberesa.

⁹ Omwaami achia ohubahola mubecheenge abaandu bae boolerefu beene koti lu mweene ali omwoleerefu, nimudiira ebilagiro by'Omwaami Nasaae weeng'we, haandi nimukeendera mu ngira chae.

¹⁰ Abaandu bohu syaalo boosi bachia ohubonaanga koti lu Omwaami abasudiisye aambi nae mani babatya muno.

¹¹ Omwaami achia ohwiingiya olwiibulo lweeng'we, olw'abaana neende olw'ebyaayo, haandi muchia ohwiitaanga ebyohulya biingi, mu syaalo si Omwaami yechubira bakuuka yeeng'we ohubaberesa.

¹² Omwaami achia ohubeekulirao esibiihiro sy'ebiindu bilai. Ekulu lichia ohukwiisaanga efula mu syaalo syeeng'we mu biha byayo. Haandi mu buli siindu si munaaholeenge, Omwaami anaababecheenge ehabi. Muchia ohweyosaanga ebyaalo biingi, nae eng'we haba simuchia ohwewolaangaho esiindu hu muundu yeesi.

¹³ Omwaami achia ohubahola mube abeemirisi, ataali abamaliirihayo. Munaabecheenge ab'aakulu ataali ab'aasi, nikali mbwe mudiira amalako k'Omwaami Nasaae weeng'we, ka mbalagira enyaanga yino, mani mwehaliirisa ohukooseresa.

¹⁴ Mutateemangaho ohudoondobana mutula hu malako ka mbalagira enyaanga yino, mani mwachaaka ohwiinamira banasaae baandi haandi mwaabahalaabanira.

Ebitula mu butawulira

¹⁵ “Nae nimutawulira ekono ly'Omwaami Nasaae weeng'we mani mwehaliirisa ohudiira ebilagiro byae neende amalako kae ka mbalagira enyaanga yino, ebichubo bino byoosi byahabooleho mani byabadoong'aho.

¹⁶ Mwahabwaabwe mu biko byeeng'we, haandi mwahabwaabwe neende mu byaalo weeng'we.

¹⁷ Ebyohulya bi mwahataakeenge neende bi mwahadeeheenge byahabwaabweenge.

¹⁸ Olwiibulo lweeng'we, neende ebirime byeeng'we, ehoonge ch'eng'oombe cheeng'we, neende amayicho k'embusi cheeng'we, neende amakoondi keeng'we binabecheenge ebibwaabe.

¹⁹ Munabecheenge ababwaabe nimwiingira haandi nimutula erwaanyi.

²⁰ “Omwaami anabasiindihiraanga ebibwaabo, obudoondobanu neende ebidinyu, mu buli siindu si munaaholeenge; ohwoola lu mwahasihirisirwe mwaamalwao bwaangu, ohweema hu bibi bi muhola. Olwohuba mweetusire hu Omwaami.

²¹ Omwaami achia ohubasiindihira amalwaae kabeete ohwoola lu yahabamalire hu syaalo si muli ohwiingiramo ohusituka.

²² Omwaami anabalwasaanga obulwaae bw'omuyaka, omusuuja, neende ebifwiimba. Achia ohubasiindihiraanga esiminyu neende omuyaka kw'amaani ohusihirisa ebirime byeeng'we. Ebyo byoosi binabaseetaanga ohwoola lu byahabasihirisire byaabamalao.

²³ Ekulu linabecheenge koti omugana, mani lihaya ohubakwiisira efula, haandi eloba lyeeng'we linoomeenge liba koti esichuma.

²⁴ Mu siha sy'efula, Omwaami anabasiindihiraanga esiifuusye neende olufu ohutula Muukulu ohwoola lu byahabasihirisire.

²⁵ “Omwaami yahakere abasuku beeng'we baabayiingira. Munaadiireenge engira ndala nimucha ohubaseeta, nae nimuyingiirwe, mwaheruheenge mukota engira yabayira. Obutuki buli hu syaalo syoosi bwahaboneenge ebibakwiireho, mani butya.

²⁶ Mani nimumalire ohufwa, amayoni kabburuha neende ebisolo biteende byahalicheenge emilaambo kyeeng'we abulao omuundu obiirusa.

²⁷ Omwaami achia ohubalwaasaanga amabute koti ka yalwaasa Abamisiri, alala neende amakoonjo neende ehwaaku, neende engaha, ebitahaoneenge.

²⁸ Omwaami yahabakwiiseengeho elalu neende obuwofu neende obudoondobanu bw'ebibaaso.

²⁹ Mwahadaambakaneenge esideete koti lu muwofu yahadaambakana mu siirima, muhaywa ohuhulaa-hulana mu buli siindu si muhola. Muchia ohufwiinyirirwaangwa haandi bemeeda sa ohubayaayaanga, mani abuleo omuundu obaabina.

³⁰ “Munaaserereenge abahasi, nae abasaacha baandi babadeehya. Munoombaheenge enyuumba, nae muhaya ohuchimenyamo. Munataakeenge endalo ch'emisabbiibbu, nae muhaywa ohulyaaho ebyaamo byachio.

³¹ Eng'oombe cheeng'we chinetweengwe nimubona, nae muhaywa ohulyaaho enyama chachio. Esuhiri cheeng'we chahabanyuulweengwe, chiyirwa nimubona; mani muhaywa ohuchiyabina. Amakoondi keeng'we kahaberesweenge abasuku beeng'we, mani abulao omuundu okaabina daawe.

³² Abaana beeng'we basyaani neende abaana beeng'we bahaana bahayirweengwe neende abateende koti abawaambe nimubona. Buli ludaalo mwahewunjeenge nimudaha bakobole, nae sibulao esiindu si mwahanyaleenge ohuhola.

³³ Abaandu b'esyaalo siindi si mutaamanyire nibo abahalicheenge ebyohulya bi mwahalimeenge nimunyaahana mu loba lyeeng'we. Bachia ohwemeeda ohubafwiinyiriraanga nibabalekeeresa sa.

³⁴ Mani ohusaanda hu mwahasaandireengemo hwahabakwiiseengeho elalu.

³⁵ Omwaami yahabadiiseenge obulwaae butawona hu mahuumbo neende hu makulu. Ebifwiimba byahabeechuleengeho ohutulira hu makulu ohwoola hu mitwe.

³⁶ “Omwaami yahabayireenge, eng'we alala neende omutuki yi mwahabecheenge muteereo ohubatuka, mu syaalo si eng'we oba bakuuka yeeng'we batamenyaangahoomo, mani muhalaabanireenge banasaae baandi, ababaachwa mu misaala neende mu makina.

³⁷ Mwaheeholeenge esy'ohuwukisa, esyolukaado, neende esy'ohwemoonyaho eyiri abaandu bomu byaalo bi Omwaami abayiriremo.

³⁸ Mwahayanyeenge emwo nyiingi mu ndalo cheeng'we, nae mwahanyooleenge ekesa diidi. Olwohuba esike chahabecheenge nichiliire ebyohulya byeeng'we.

³⁹ Mwahataakeenge endalo ch'emisabbiibbu, muchiaaka bulai, nae haba simwahang'wecheengeho efiini yacho oba mulyaaho ebyaamo byacho; olwohuba esibuuha syahabecheenge nisichiriire.

⁴⁰ Mwahataakeenge emiseituuni mu syaalo syeeng'we syoosi, nae haba simwahebaheengeho amafuta kachio. Olwohuba ebyaamo byacho byahahuhumuheenge byoosi.

⁴¹ Mwahebuleenge abaana basyaani neende abahaana, nae haba sibahabecheenge abeeng'we. Olwohuba bahayirweengwe koti abawaambe.

⁴² Emisaala kyeeng'we kyoosi neende ebyaamo byomu syaalo syeeng'we, esike chahabilicheenge.

⁴³ Bawalukeendwa bamenya mu syaalo syeeng'we bahemeedeenge ohuhulaa-hulana, nae eng'we mwahachiirireenge sa ohudoong'a enyuma.

⁴⁴ Bahabeyoseenge, nae eng'we sibulao esiindu si mwahanyaleenge ohubeeyosa. Bachia ohubeemerera, nae eng'we muchia ohuba abamaliirihayo.

⁴⁵ Ebichubo bino byoosi bichia ohubakwaaho, mani bibadoong'eho ohwoola lu mwahasihiriswe mwawerao elalira. Olwohuba haba simwawulira ekono ly'Omwaami Nasaae weeng'we, nimudiira ebilagiro byae neende amalako kae, ka mbalagira enyaanga yino.

⁴⁶ Ebichubo ebyo byahabe obulolero neende eby'amayia yi muli, mani bibabeeho, eng'we neende abeechuhulu beeng'we, endaalo choosi.

⁴⁷ “Olwohuba haba simwahalaabanira Omwaami Nasaae weeng'we neende omwooyo kwichuule esangaalo neende omwehoyo. Olwohuba mwanyoola ebiindu bilai biingi.

⁴⁸ Sakira abasuku beeng'we, ba Omwaami achia ohubasiindihira babaseete, muchia ohubahalaabanira nimulumwa enjala neende obuluwo, ao nimuli syeekenye, haandi nimuli mu ngisa ya buli siindu; mani bachia ohubata ekoombo mu kosi weeng'we, ohwoola lu bahabasihirisire elalira.

⁴⁹ Omwaami yahabaleetere abaandu b'esyaalo siindi esy'eyale ohubaseeta, si baandu basyo balomaloma olulimi lu mutaamanyire. Bachia ohutula hu njakamo y'esyaalo. Bachia ohubakwaaho koti lu eeswi yiseeta mani yaakwa hu mwiinyu.

⁵⁰ Abasuku beeng'we abo bahabe abaalaba, abatadeeba hu baandu bakofu oba bakwiira esisa eyiri abaana bayere.

⁵¹ Bachia ohulichaanga ebisolo byeeng'we neende ebyohulya beeng'we bi mwalima, ohwoola lu mwahasihirisirwe elalira. Haba sibahabalehereho engaano, efiini, oba amafuta, ohumeeda hw'eng'oombe cheeng'we oba ebyaayo byeeng'we, ohwoola lu mwahafwe enjala, mani mwasihirira.

⁵² Bachia ohubaseetaanga mu buli biko byeeng'we, ohwoola lu biko byeeng'we bihoongo byoosi ebyasitwa, bi mwali nimwesika, byahasihiriswe mu syaalo syeeng'we syoosi. Bachia ohubaseeta mu biko byeeng'we byoosi ebiri mu syaalo syeeng'we syoosi si Omwaami Nasaae weeng'we yababeresa.

⁵³ Mani munalicheenge abeechuhulu beeng'we beene, enyama y'abaana basyaani beeng'we neende abaana bahaana beeng'we, ba Omwaami Nasaae weeng'we yababeresa. Abasuku beeng'we bachia ohubaseeta babafwiinyirire muhae ohuba neende esyohulya syoosi.

⁵⁴ Omusaacha w'emiduunga milai haandi omwibulana w'oluya lw'abatuki, anaatingaaleenge bubi bamwaanang'ina neende omuhasi wae yadaha muno, neende abaana bae balamu basidoong'ere.

⁵⁵ Mani ahaye ohubabaaho enyama y'abaana bae bali ohulya, olwohuba sibulao esiindu siindi syanaalya mu huseetwa, neende ohufwiinyirwa hw'abasuku beeng'we hu munabecheenge nahwo mu biko byeeng'we byoosi.

⁵⁶ Omuhasi w'emiduunga milai haandi omwehaliirisa muno, otanyalaho kata ohuseena ohukulu hwae hu loba olwohuba emiduunga chae milai neende oluyaali lwae, anaatingaaleenge bubi wamwe yadaha muno, neende omwaana wae musyaani neende omwaana wae muhaana.

⁵⁷ Abaana bae bayeebula haandi bayalera hu makulu beene nibo bayahalye mu bweekisi. Olwohuba yahahaywe esiindu syohulya. Abasuku beeng'we bahaseete ebiko byeeng'we mani babafwiinyirire.

⁵⁸ “Nimutadiireenge bulai emboosi ch'elako lino, echandiikwa mu sitabo sino, mani mwakoseresa, haandi nimutatichaanga oluyaali lwae neende eliita lyoolerefu ly'Omwaami Nasaae weeng'we,

⁵⁹ ao Omwaami anabaleeteraanga, eng'we neende ab'olwiibulo lweeng'we ohusaanda huungi, ohw'amaani haandi ohutaakama, neende endwaae mbi haandi echitawona.

⁶⁰ Haandi anabaleetaangaho amalwaae ka Misiri koosi, ka mwali nimwatya.

⁶¹ Omwaami achia ohubaleeteraanga buli bulwaae bwoosi neende ohusaanda hwa buli ngeri ohutaandiikwa mu sitabo sy'amalako sino, ohwoola lu mwahasihirisirwe elalira.

⁶² Kata ayahaba mbwe mwali abaangi muno koti eng'ining'ini chomu kulu, abahawoneo mwahabe abadiidi muno hulw'ohutawulira ekono ly'Omwaami Nasaae weeng'we.

⁶³ Nae koti lu Omwaami yasangaala ohubaholera ebiindu bilai mani yabeengiya, nilwo lu Omwaami yahasangaale n'abasihirisa n'ohubatusao. Muchia ohutuswa hu syaalo si muli ohwiingiramo ohusituka.

⁶⁴ “Omwaami achia ohubasalaania mu baandu boosi, ohutula hu lwaande lulala lw'esyaalo ohwoola hu luundi. Mani eyo muchia ohuhalaabanira banasaae baandi, ababaachwa mu misaala neende mu makina, ba mwali nimutaamanyaho oba bakuuka yeeng'we ohumanyaho.

⁶⁵ Haandi mu byaalo ebyo, haba simwahasangaalireyo daawe. Simwahabe neende obuwuluuhiro bwoosi, nae Omwaami yahababerese omwooyo muti, mani muhaye ohubona yi muchia, haandi nimubula esuubi lyoosi.

⁶⁶ Simwahabeeho neende omuleembe abuundu woosi, haandi mwahabulireho elalira neende obumenyo bweeng'we bweene. Esiro neende esideete munaabecheenge mu hutya, mani muhaya ohumanya koti lu bulamu bweeng'we bunaabe.

⁶⁷ Echuli munabooleenge muti, ‘Buneere liina!’ Nae engoloobe, munabooleenge muti, ‘Bunaahye liina!’ Ebyo munabibooleenge hulw'obuti bw'emyooyo kyeeng'we, neende hulw'ebiindu bi muchia ohubonaanga.

⁶⁸ Mani Omwaami achia ohubakobosayo Misiri mu meeri, olukeendo lu ndabasuubisa endi haba simwahaluhole haandi daawe. Nimuli eyo, mwahetuseengeo abeene eyiri abasuku beeng'we, abasaacha oba abahasi koti abawaambe, nae haba siyahabecheengeo oubakula.”