Amalako Kohubiri 27 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Amalako ka Nasaae akandiikwa hu makina

¹ Musa neende abeemeresi ba Yisiraeli balagira abaandu nibababoolera bati, “Mudiireenge amalako koosi ka mbalagira enyaanga yino.

² Haandi hu ludaalo lu mwaambuhiraho omwaalo kwa Yorodaani ohwiingira mu syaalo si Omwaami Nasaae weeng'we ali ohubaberesa, muhoyere ohuteengeha amakina mahoongo, mani mukawomeho;

³ haandi mukandiikeho emboosi choosi ch'amalako kano. Nimumala ohwaambuha mani mweengira mu syaalo silai si Omwaami Nasaae weeng'we ali ohubaberesa, esyaalo sihulukusa amabeere neende obuuhi, koti lu Omwaami Nasaae wa bakuuka yeeng'we, yabasuubisa,

⁴ nimuli engereha w'omwaalo kwa Yorodaani, muba mwahateengehe amakina ako hu lugulu lwa Ebbali, koti lu mbalagira enyaanga yino, mani mukapulaasite bulai.

⁵ Eyo niyo yi mwahoombahire Omwaami Nasaae weeng'we alutaari y'amakina kataaliho ebyuuma.

⁶ Munoombahira Omwaami Nasaae weeng'we alutaari neende amakina malaamba, akataatirwemo. Muchia ohuyaaniraho esiyaanwa sisaambe eyiri Omwaami Nasaae weeng'we.

⁷ Muchia ohuyaaniraangaho ebiyaanwa by'ohusaasania, mani muliiraanga eyo; haandi musangaaliraanga mu moni w'Omwaami Nasaae weeng'we.

⁸ Mwahandiikire elalira bulai bweene hu makina ako emboosi choosi ech'amalako kano.”

⁹ Musa alala neende abalaamisi Baleefi beemao baaboolera Abaisiraeli boosi bati, “Tekeerese mani muwulire, eng'we Abaisiraeli: enyaanga yino mweholere abaandu b'Omwaami Nasaae weeng'we.

¹⁰ Sakira wulireenge ekono ly'Omwaami Nasaae weeng'we, nimudiira ebilagiro byae neende amalako kae, ka mbalagira enyaanga yino.”

Ebibwaabo bitula hu butawulira

¹¹ Musa yalagira abaandu hu ludaalo lweene olwo, n'aboola ati:

¹² Nimwahamale ohwaambuha omwaalo kwa Yorodaani, bano nibo abaheeme hu lugulu lwa Gerisimu ohuberesa abaandu ehabi: Simeoni, Leefi, Yuda, Yisakari, Yosefu, neende Bbenjamini.

¹³ Haandi bano nibo abaheeme hu lugulu lwa Ebbali ohulaangirira esibwaabo: Rubbeeni, Gaadi, Aseri, Sebbulooni, Daani, neende Nafutaali.

¹⁴ Nae Abaleefi bahaboolere Abaisiraeli byoosi mu kono ly'aakulu bati:

¹⁵ “Omuundu ohola esifwaanani sisaanguluse oba esibaache, esy'omusiro eyiri Omwaami, esiindu siloongaloongwe, mani yasitusayo mu syaama, ahoyere ohubwaabwa. Mani abaandu boosi bakobolemo bati, Amiina.”

¹⁶ “Buli muundu oteesa oluyaali mu laatang'ene oba ng'ina, ahoyere ohubwaabwa. Mani abaandu boosi bakobolemo bati, Amiina.”

¹⁷ “Buli muundu osiihula ekoonge lyohu lwaaho lw'owaasye, ahoyere ohubwaabwa. Mani abaandu boosi bakobolemo bati, Amiina.”

¹⁸ “Buli muundu obachirisa omuwofu mani yaamuta hu ngira yimukosa, wohubwaabwa. Mani abaandu boosi bakobolemo bati, Amiina.”

¹⁹ “Buli muundu ohyaamya eheenga y'omusaango eyiri walukeendwa, bamulehwa, neende abahasi bafwiirwe, ahoyere ohubwaabwa. Mani abaandu boosi bakobolemo bati, Amiina.”

²⁰ “Buli muundu okona muha laatang'ene, ahoyere ohubwaabwa, olwohuba aholere eby'esibboorooro n'omukwoobo neende muha laatang'ene. Mani abaandu boosi bakobolemo bati, Amiina.”

²¹ “Buli muundu okona esisolo syoosi ahoyere ohubwaabwa. Mani abaandu bakobolemo bati, Amiina.”

²² “Buli muundu okona mboochoong'ene, oba omuhaana wa laatang'ene oba omuhaana wa ng'ina, ahoyere ohubwaabwa. Mani abaandu boosi bakobolemo bati, Amiina.”

²³ “Buli muundu okona masaalang'ene, ahoyere ohubwaabwa. Mani abaandu boosi bakobolemo bati, Amiina.”

²⁴ “Buli muundu otemula owaasye mu bweekisi, ahoyere ohubwaabwa. Mani abaandu boosi bakobolemo bati, Amiina.”

²⁵ “Buli muundu olya asowa ohutemula owaasye mu bweekisi, ahoyere ohubwaabwa. Mani abaandu boosi bakobolemo bati, Amiina.”

²⁶ “Buli muundu otadiira amalako kano mani yaakooseresa, ahoyere ohubwaabwa. Mani abaandu boosi bakobolemo bati, Amiina.”