Amalako Kohubiri 26 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ebiyaanwa by'ekesa

¹ “Nimwiingira mu syaalo si Omwaami Nasaae weeng'we ali ohubaberesa ohuba esyeeng'we, mani mwaasimenyamo,

² mubukuleenge hu byaamo byoosi bi mutaangira ohukesa mu syaalo esyo mubita mu sikono, mani muchia abuundu yi Omwaami Nasaae weeng'we achia ohudoola ohumwiinamiramo.

³ Muchia ohuchichaanga eyiri omulaamisi onabecheenge hu mulimo ebiha ebyo, mani mumuboolera muti: ‘Bulaanu njekesa enyaanga yino eyiri Omwaami Nasaae waange endi nyingiire mu syaalo si Omwaami yechuba ohuberesa bakuuka yeefwe.’

⁴ Omulaamisi achia ohuhutusaangaho esikono mu mahono kao, mani asita aasi mu moni w'alutaari y'Omwaami Nasaae weeng'we.

⁵ “Mani mu moni w'Omwaami Nasaae weeng'we, muchia ohulomaloma emboosi chino: Kuuka yaange yali walukeendwa Murameeya, oweehirira yaachia Misiri mani naang'alaalira eyo neende abomu daala lyae. Bali abaandu badiidi muno, nae eyo bamala beengiya beehola esyaalo sihoongo, esy'amaani, haandi esimanyihaane.

⁶ Abamisiri batuyira bubi, haandi baatusaandya muno, nibatuyiika ohuhola emirimo koti abawaambe.

⁷ Nae hwalirira Omwaami Nasaae wa bakuuka yeefwe, mani yaabona ohusaanda, ohudidiihana, neende ohufwiinyirirwa hweefwe.

⁸ Omwaami yatutusa mu Misiri niyehoonyera obunyala bwae buungi neende amaani kae. Yahola ebitiisa biingi, eby'amayia biingi neende ebiwuukisa.

⁹ Yatuleeta ano haandi yaatuberesa esyaalo silai haandi esiyiinda sino.

¹⁰ ‘Nae bone, mbano ndeetere ebiindu bi ndaataangiire ohukesa mu loba li ewe Omwaami wamberesa.’ Ochia ohutechaanga esikono esyo aasi mu moni w'Omwaami Nasaae wao, mani wiinamira Omwaami Nasaae wao.

¹¹ Haandi ochia ohusangaaliraanga mu biindu bilai byoosi bi Omwaami Nasaae ahubereese, ewe neende abomu nyuumba yao, neende Abaleefi, neende bawalukeendwa booli nabo.

¹² “Buli mwaaka kwohudatu, tuseenge silala sy'ehumi sya buli siindu si mukesa musiberesa Abaleefi, bawalukeendwa, bawamulehwa, neende abahasi bafwiirwe, bali mu biko byeeng'we byoosi babilya beekuta.

¹³ Noomala ohuhola otyo hu bulaanu onyala ohuboola nooli mu moni w'Omwaami Nasaae wao oti, ‘Malire ohutusa esituundu sy'ebiindu byoolerefu mu nyuumba yaange, haandi malire ohusiberesa Abaleefi, bawalukeendwa, bawamulehwa, neende abahasi bafwiirwe, ohuchianakana neende ebilagiro byao byoosi bi ewe walagira. Sibulao esilagiro syao kata silala sitooseresaanga oba siibirira.

¹⁴ Sibulao silala sy'ehumi si ndalya ni ndi mu ngisa, oba ndaatusaho esituundu syoosi nitaali omulabisibwe, oba ndaasiyaanira abafu. Ndadiira emboosi y'Omwaami Nasaae waange, ndaahola buli siindu koti lu walagira.

¹⁵ Tingaala aasi nooli mu bwiihalo bwao bwoolerefu, nooli Muukulu, mani oberese abaandu bao Abaisiraeli ehabi neende esyaalo silai sy'otubereese; koti lu wechubira bakuuka yeefwe, esyaalo silai muno esihulukusa amabeere neende obuuhi.’

Abaandu b'Omwaami beene

¹⁶ “Enyaanga yino Omwaami Nasaae weeng'we abalagira ohwooseresaanga amalako kano neende ebilagiro bino. Mani sakira mwehaliirise ohukooseresaanga neende emyooyo kyeeng'we kyoosi alala neende obulamu bweeng'we bwoosi.

¹⁷ Mwomiisire enyaanga yino ebidiira hu Omwaami, muti niye Nasaae weeng'we, haandi muti muchia ohumuwuliraanga, muchia ohudiiraanga amalako kae neende ebilagiro byae, neende buli siindu syaabalagira.

¹⁸ Omwaami yomiisire enyaanga yino ebibadiiraho, koti lu muli abaandu bae beene, koti lu yabasuubisa, haandi ati muchia ohudiiraanga ebilagiro byae byoosi.

¹⁹ Omwaami achia ohubahusa ohuhira ebyaalo biindi byoosi bi yaloonga, mu huhukinisibwa haandi mu huhufumisibwa neende mu luyaali. Muchia ohubechaanga abaandu boolerefu eyiri Omwaami Nasaae weeng'we, koti lu yasuubisa.”