Amalako Kohubiri 25 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ “Niwiichuhana amayiingani kaabaao akatikaati w'Abaisiraeli babiri, mani beecha mu siina ohuheengerwa omusaango, abakayi babaheengera omusaango, balehuuleenge omuundu otaaliho omusaango, mani omusaango kuhira owuundi.

² Omuundu yi musaango kuhirire n'ahoyerwa ohunaalwa embooko, omukayi anaamwaliseenge aasi mani bamunaalira mu moni wae embooko, ohuchianakana neende omusaango kwaaba naaholere.

³ Banyala ohumunaala embooko chitabita amahumi kane, ataali ao, nibamunaala embooko chibita amahumi kane, siba sinamudiise esoni mu moni w'abaasye.

⁴ “Mutaboyaanga endaawu omunwa niyiwuula engaano.

Omulimo ku muundu ahoyere ohuholera mwaanang'ina wafwa

⁵ “Niwiichuhana abasyaani beebulanwa babiri baamenya mu lwaanyi lulala, mani mulala hu nibo yaafwa naatebuuleho omwaana musyaani, omuhasi wae haba saahoyere ohudeehera omusaacha wuundi otaali ow'oluyia lwa wamwe oba n'afwiire oyo. Mwaanang'ina mufu niye oba n'ahoyeere ohukerama omuhasi mufwiirwe oyo, mani amuholere esyo si mwaanang'ina muundu ahoyera ohuholera mulamuung'ene.

⁶ Omwaana musyaani yaanataangireenge ohwiibula, anaakulihweenge eliita lya mwaanang'ina wafwa, mani eliita lyae elyo lihaye ohwiibirirwa mu Yisiraeli.

⁷ Nae mwaanang'ina mufu n'ahaya ohukerama omuhasi mufwiirwe, omuhasi oyo aba anaachicheenge hu siruwa sy'esiko eyiri abeemeresi basyo, mani aboola ati, ‘Mwaanang'ina wamwaange ahayire ohuchiiririsa eliita lya mwaanang'ina mu Yisiraeli. Ahayire ohuhola esiindu si mwaanang'ina musaacha ahoyere ohuholera mulamuung'ene.’

⁸ Mani abeemeresi b'esiko banaamulaangeenge balomaloma nae. Nae niyemeeda ohuhaya, n'aboola ati, ‘Haba siindaha ohumukerama,’

⁹ ao omuhasi mufwiirwe wa mwaanang'ina oyo aba anaachicheenge yaali mu moni w'abeemeresi, amufwaalulamo esiraato mu hukulu hulala, amufuucha amate mu moni, mani amuboolera ati, ‘Olwo nilwo lu musaacha ohaya ohwiibulira mwaanang'ina omusiha ahoyere ohuyirwa.’

¹⁰ Mani edaala lyae mu Yisiraeli linalaangeengwe liti, ‘Edaala ly'omusaacha yi bafwaalulamo esiraato mu hukulu.’

Amalako kadiira hu biindu bitaali nasilala

¹¹ “Niwiichuhana omusaacha yalwaana neende omusaacha waasye, mani omuhasi wa mulala hu nibo yeecha ohwaabina wamwe ohumutusa hu musaacha oli ohumuhuya, mani yaakwa hu busaacha bw'omusaacha wuundi oyo,

¹² omuhasi oyo aba anaatemweengeho omuhono ataali ohukwiirwa esisa kata nabudiidi.

¹³ “Mutabechaanga abaliichaki nimwehoonyera ebipiimo bitaali nasilala, silala esihoongo nae esiindi esidiidi.

¹⁴ Mutabechaanga neende ebikero bitaali nasilala mu nyuumba cheeng'we, silala esihoongo nae esiindi sidiidi.

¹⁵ Mwehoonyereenge ebipiimo byadyeeri neende ebikero bichuule, hu munyale ohuyiindira mu syaalo si Omwaami Nasaae weeng'we ali ohubaberesa.

¹⁶ Olwohuba buli baandu bahola ebiindu biri bityo, b'omusiro nibo eyiri Omwaami Nasaae weeng'we.

Esilagiro sy'ohwiita Abameleki

¹⁷ “Mwiichulise bi Bameleki babahola nimuli hu lukeendo lweeng'we nimutula Misiri,

¹⁸ koti lu babaseeta nimuli hu ngira, nimwali nimujoong'ere haandi nimuweeremo amaani, mani nibeeta abo boosi abali badoong'ere enyuma; haandi nibahaya ohwiisa oluyaali mu Nasaae.

¹⁹ Mani sakira Omwaami Nasaae weeng'we niyahamale ohubawuluusa, abasuku beeng'we babeebodoohaanie, mu syaalo si Omwaami Nasaae weeng'we ali ohubaberesa musituke. Mwahasihirisire elalira Abameleki abo, bahaye ohwiichuliswaho haandi hu syaalo. Mumanyaanga mwiibiriraho ohuhola mutyo.