Amalako Kohubiri 23 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Abaandu batafukiirirwa mu muhung'aano kw'abaandu b'Omwaami

¹ “Omusaacha yeesi owalooywa oba yi baheengaho obusaacha haba saafukiirirwa ohuba mu muhung'aano kw'abaandu b'Omwaami.

² “Omwaana w'enda y'esiimba haba saafukiirirwa ohwiingira mu muhung'aano kw'abaandu b'Omwaami. Kata ohwoola hu lwiibulo lw'ehumi, abeechuhulu bae haba sibafukiirirwa ohwiingira mu muhung'aano kw'abaandu b'Omwaami.

³ “Abulao Omumooni oba Omumoabbu ofukiirirwa ohwiingira mu muhung'aano kw'abaandu b'Omwaami, ohwoola hu lwiibulo lw'ehumi. Abulao omuundu waabwe ohoyere ohwiingira mu muhung'aano kw'abaandu b'Omwaami endaalo choosi.

⁴ Olwohuba bahaya ohubaakaanira mani baababeresa ebyohulya neende amaachi k'ohung'wa nimwali nimuli hu lukeendo lweeng'we ohutula Misiri. Ohumeeda hu esyo, bakuliirira Bbalamu omwaana wa Bbeori ohutula Petoori mu syaalo sya Mesopotamia ohubabwaaba.

⁵ Nae Omwaami Nasaae weeng'we yahaya ohuwulira ebya Bbalamu. Nae Omwaami Nasaae weeng'we mu siha syohubabwaaba, yababeresa ehabi, olwohuba Omwaami Nasaae weeng'we yabaheera.

⁶ Mu bulamu bweeng'we bwoosi, haba mutakoonyaangaho omuleembe nabo oba kata mubahoonyaho ohuba bulai.

⁷ “Mutasoolaniaanga Abaedomu, olwohuba beeho beeng'we nibo; oba Abamisiri, olwohuba mwabaaho abawaambe mu syaalo syaabwe.

⁸ Abeechuhulu baabwe ab'olwiibulo lwohudatu ba baheebule banyala ohwiingira mu muhung'aano kw'abaandu b'Omwaami.

Ohuhola ekaambi ya ab'amaye yibe enyoonjo

⁹ “Nimuchia ohuseeta abasuku beeng'we nimuli mu kaambi, mwebwaabeenge buli siindu sibi.

¹⁰ “Niwiichuhana wabao omuundu mweeng'we oloota esiro ati yeyaliise n'omuhasi mani yeyinyaalaho amaanyi k'esisaacha, anaatusweenge erwaanyi w'ekaambi, abe eyo ahaya ohwiingira mu kaambi.

¹¹ Nae engoloobe niyoola, omweene aba achia ohweyoka, hu bulaanu elyuuba nilikwa, anyale ohwiingira mu kaambi.

¹² “Munabecheenge neende abuundu erwaanyi w'ekaambi yi munachicheenge ohwehoonya esibakala.

¹³ Munabecheenge neende olusaala lu, nimumala ohwehoonya esibakala erwaanyi w'ekaambi, munehonyereenge ohuyaba eliina, mani mubuka eloba elyohu bunyaka obwo.

¹⁴ Olwohuba Omwaami Nasaae weeng'we ang'alaalaanga mu kaambi yeeng'we n'abawonia haandi naakera nimuyiingira abasuku beeng'we. Sakira ekaambi yeeng'we yihoyere ohuba enyoonjo, Omwaami ahaye ohubona obunyaka bweeng'we, mani abafudatiire.

Amalako kadiira hu biindu bitaali nasilala

¹⁵ “Omuwaambe wiruuhe hu mwaami wae niyeecha yi muli ohumukayirira, mutakobosaanga eyiri omwaami wae oyo.

¹⁶ Omuwaambe oyo ahoyere ohumenyaanga naang'we abuundu yaanedoolereenge omweene mu silala hu biko byeeng'we, syaaba n'adahire muno, haandi mutamuyiraanga bubi.

¹⁷ “Saahoyere ohubechaangao mu Yisiraeli omuhasi oba omusaacha ohola obucheke bwomu nyuumba ya Nasaae.

¹⁸ Mutaleetaanga mu nyuumba y'Omwaami Nasaae weeng'we eseende chi muhasi oba omusaacha anyoolere mubucheke. Omusaara kw'embwa kwosi mutakuleetaanga eyiri Omwaami ohwooseresa obweyamo bweeng'we. Olwohuba bino byoombi by'omusiro eyiri Omwaami Nasaae weeng'we.

¹⁹ “Nimweeyosa abasyeeng'we eseende oba ebyohulya, oba esiindu syoosi esiriho engaanga, mutabatusaangaho engaanga.

²⁰ Nae eyiri omuteende, munyala mwaamutusaho engaanga. Eyiri Omuisiraeli waasyeeng'we, mutamutusaangaho engaanga; hu Omwaami Nasaae weeng'we anyale ohubaberesa ehabi mu buli siindu si muhola mu syaalo si muchia ohwiingiramo musituke.

²¹ “Nimuhola esyeeyamo eyiri Omwaami Nasaae weeng'we, mutahayaanga ohusyoseresa. Olwohuba Omwaami Nasaae weeng'we siyahahaye ohuhuteeba ebidiira hu syeeyamo esyo, mani syahahwekaluuhanire syaaba esyonoono yooli.

²² Nae nimuhaya ohweeyama, haba simunabecheenge neende esyonoono syoosi.

²³ Mweehalirise bulai mani mwooserese ebyeeyamo byeeng'we bi mwasuubisa neende eminwa kyeeng'we. Olwohuba abeene niing'we abeeyama neende omwooyo mulala eyiri Omwaami Nasaae weeng'we esyo, si mwasuubisa neende eminwa kyeeng'we.

²⁴ “Nimuchichaanga mu ndalo y'emisabbiibbu yo wasyeeng'we, munyala ohulya emisabbiibbu kyoosi-kyoosi ki mudaha, nae mutatechaangaho ekiindi mu sikiingiro syeeng'we.

²⁵ Nimuchichaanga mu ndalo y'engaano yo wasyeeng'we, munyala sa ohwaakula amatwi kayo neende amahono, nae mutakesaanga engaano yae neende engeso.