Amalako Kohubiri 21 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ebidiira hu misaango ky'obutemo kitayaaswa kyaawa

¹ “Niwiichuhana mu syaalo si Omwaami Nasaae weeng'we ali ohubaberesa ohusituka, mwanyoolamo omuundu yeeterwe n'ali mu ndalo oba n'akonere hu ngira, nae omuundu amwiitire haba samanyihaane,

² ao abeemeresi beeng'we neende abakayi beeng'we banachichaanga mani bapiime obuleeyi ohutula hu mulaambo ohwoola hu biko byebodoohaanieo.

³ Abeemeresi b'esiko sihira ohuba aambi neende omulaambo kw'omuundu yeeterwe banaayireenge esurusi njere eyisisiiri ohuholaho omulimo haandi eyisisiiri ohuhweesaho ekoombo.

⁴ Mani abeemeresi b'esiko esyo banaayireenge emoosi eyo mani beehirira mu hooho lirimo amaachi kahulukusa, elitalimwaangaho oba lyataakwamo. Banaafunakireenge ekosi ly'emoosi eyomu hooho elyo.

⁵ Nae abalaamisi, abaana ba Leefi bachia ohuchichaanga eyo bosi, olwohuba abo nibo ba Omwaami Nasaae weeng'we yadoola ohumuhalaabanira haandi ohuberesa ehabi mu liita ly'Omwaami. Nibo abanahengeengeo obusoolo bw'abaandu bayiingana neende abalwaanakana.

⁶ Abeemeresi boosi abomu siko sihiramo ohuba aambi neende omulaambo kw'omuundu yeetwa banesaabireenge amahono kaabwe hu ng'oombe yi bafunakira ekosi mu hooho.

⁷ Bachia ohuboolaanga bati, ‘Amahono keefwe haba sikeedisa amabaanga kano, haandi haba sihumanyireho owamutemula.

⁸ Ewe Omwaami, kwiira esisa abaandu bao Abaisiraeli ba wanunula, mani ohaye ohubataaho omusaango kw'ohutemula omuundu otaaliho omusaango.’

⁹ Mani nimunaholeenge ebyo byoosi bi Omwaami aba naadaha, munetusaangaho omusaango kw'obutemo.

Ebidiira hu bahasi bawaambiirwe mu biita

¹⁰ “Nimunachicheenge mu biita ohulwaania abasuku beeng'we, mani Omwaami Nasaae weeng'we yaakera mwaayiingira, mani mwaabawaamba,

¹¹ nae mwaabona mu bawaambe abo omuhasi aboneha bulai, mani mwamwekoomba, haandi mwaadaha ohumudeehya,

¹² muba munaamubukuleenge mumuyira engo weeng'we. Omuhasi w'engeri eyo ahoyere ohwebekaangaho efwiiri haandi yeededaho amadete kosi.

¹³ Ahoyere haandi ohwefwaalulaangaho engubo chi yawaambirwamo, mani adoong'a naali mu nyuumba yeeng'we. Anaalireenge laatang'ene neende ng'ina ohumala embaka y'omwoosi mulaamba. Naamalire atyo, hu bulaanu muba munyala ohuba alala nae, mani yeeholera elalira omuhasi weeng'we.

¹⁴ Nae nimubona muti haba saabasangaasa, muba munamulehaanga achia yaadaha. Nae mutamukusaangamo eseende, oba mwaamuyira koti omuwaambe, olwohuba mwamuloongoyasa.

Ebidiira hu busihirano bw'omwaana musyaani waamberi

¹⁵ “Omusaacha naaba neende abahasi babiri, omuheerwa neende omusyuule, mani boombi bamwiibulira abaana, omuheerwa neende omusyuule, nae omwaana musyaani otaangira ohwiibulwa yaahaya ohuba omwaana w'omuhasi muheerwa,

¹⁶ omusaacha oyo naanoleenge ohulaamira abaana bae ebiindu, haba saanaholeenge omwaana w'omuhasi muheerwa ohuba owaamberi mu bweyaango bw'omwaana waamberi mweene, yi muhasi musyuule yeebula.

¹⁷ Ohutusaho anafukirireenge ati omwaana w'omuhasi musyuule niye omwaana waamberi, mani aberesa omwaana oyo omukabo kwae amahabi kabiri, okw'ebiindu byae byoosi, olwohuba niye omwaana otaangira ohutula mu maani kae. Sakira obusiha bw'omwaana waamberi bwae nibwo.

Ebidiira hu mwaana musyaani mujeemu

¹⁸ “Omuundu naanabecheenge neende omwaana wae musyaani w'omutwe mwoomu haandi ow'esireka, otawulira laatang'ene oba ng'ina, kata neende bahamukolola batye,

¹⁹ ao abeebusi bae banaamuyireenge eyiri abeemirisi bomu siko syae, mu siruwa sy'esituundu si yamenyamo.

²⁰ Bachia ohubooleraanga abeemirisi b'esiko syae abo bati, ‘Omwaana weefwe wuno w'omutwe mwoomu haandi w'esireka niye, mani haba saatuwuliraanga daawe. Wokuliira haandi mumeesi niye.’

²¹ Abasaacha bomu siko esyo boosi baba bachia ohumuhuyaanga amakina bamwiita. Mani buli muundu oba anasiwuliraanga mu Yisiraeli aba anaatichaanga.

Amalako kaandi kadiira hu biindu bitaali nasilala

²² “Omuundu n'anaholeenge esyonoono esikera yeetwa, mani yeetwa niyaniihwe hu musaala,

²³ mutalehaanga omulaambo kwae kukona hu musaala ohwo esiro syoosi, nae mumusiheenge oludaalo lweene olwo, olwohuba omuundu omikirwe aba yebwaabwa neende Nasaae. Mutaleetaanga omufuto mu syaalo syeeng'we si Omwaami Nasaae weeng'we ali ohubaberesa ohuba esyeeng'we.