Amalako Kohubiri 20 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ebidiira hu biita

¹ “Nimuchia mu biita ohulwaania abasuku beeng'we, mani mwaabona efaraasi neende ebigaari neende eye hoongo ohuhira elyeeng'we, mutabatichaanga; olwohuba Omwaami Nasaae weeng'we, owabatusa mu syaalo sya Misiri ali naang'we.

² Nimunaabecheenge aambi ohuchaaka ebiita, omulaamisi aneecheenge mberi alomaloma neende ab'amaye beeng'we.

³ Anaababoolereenge ati, ‘Wulire, eng'we Abaisiraeli, enyaanga yino muli aambi ohuchaaka ebiita nimulwaania abasuku beeng'we, nae mutawaamo omwooyo daawe, mutatya daawe, oba mwaateengerehaho, oba abasuku beeng'we batabatiisa daawe.

⁴ Olwohuba Omwaami Nasaae weeng'we niye ochia ohuba naang'we, niye ochia ohulwaania abasuku beeng'we, mani akere muyiingire.’

⁵ Abahoongo b'eye lyeeng'we nabo banaateebeenge ab'amaye beeng'we bati, ‘Ano yahabahoo omuundu obere huyahoombaha sa enyuumba njaaha naasisiiri ohuyiingisa? Leha akoboleyo engo wae, olwohuba anyala ohufwiira mu biita mani omuundu wuundi yaayiingisa.

⁶ Haandi bati ano yahabahoo omuundu oli neende endalo y'emisabbiibbu osisiiri ohulyaaho ebyaamo byayo? Leha akoboleyo engo wae, olwohuba anyala ohufwiira mu biita mani omuundu wuundi yaalya ebyaamo byayo.

⁷ Haandi bati ano yahabahoo omuundu opataane neende omuhasi, nae asisiiri ohumudeehya? Leha akoboleyo engo wae, olwohuba anyala ohufwiira mu biita mani omuundu wuundi yaamudeehya.’

⁸ Haandi abahoongo b'eye bachia ohwemeeda ohuteebaanga ab'amaye abo bati, ‘Ano yahabahoo omuundu otiire haandi oweeremo omwooyo? Leha akoboleyo engo wae, olwohuba anyala ohukera abaasye bosi baawaamo omwooyo.’

⁹ Nae abahoongo b'amaye nibamala ohulomaloma neende ab'amaye, baba bachia ohudoolaanga abeemeresi b'amaye hu baba nibadoong'ere.

¹⁰ “Nimunaasudeenge aambi neende esiko ohusilwaania, mutangireenge mberi ohuberesa abasirimo ehabi y'ohwewaayo.

¹¹ Nibanabakoboleengemo bati bafukiriire ohweyaanayo mani babeekulirao, abaandu boosi-boosi abasirimo baba bachia ohuyiikwaangwa ohubaholera emirimo neende ohubahalaabanira.

¹² Nae nibahaya ohweyaanayo yi muli mani baheengao ohubalwaania, munebodohanienge esiko esyo neende amaye keeng'we.

¹³ Nae Omwaami Nasaae weeng'we nanaafukirireenge ohuwaamba esiko esyo, mwiiteenge abasaacha basirimo boosi.

¹⁴ Nae abahasi, abaana bayere, eng'oombe neende buli siindu siri mu siko esyo, mubiyireenge koti ebipeeye biba ebyeeng'we. Muchia ohusangaaliraanga mu biindu bipeeye by'abasuku beeng'we ebyo, bi Omwaami Nasaae weeng'we ababereese.

¹⁵ Munaholeenge mutyo eyiri ebiko byoosi ebiri eyale muno naang'we, ebitaali ebiko byomu byaalo bi muchia ohumenyamo bino.

¹⁶ “Nae nimunawaambeenge ebiko biri mu syaalo si Omwaami Nasaae weeng'we ali ohubaberesa musituke, mutalehaangao esiindu syoosi siyeera nisisiiri esilamu.

¹⁷ Nae munasihirisireenge elalira buli baandu: Abahiiti neende Abaamoori, Abakanani neende Abaperisi, Abahiifi neende Abayebbusi, koti lu Omwaami Nasaae weeng'we abalagiire.

¹⁸ Mubeeteenge bahaye ohukeraanga nimuhola ebiindu bibi ohuchianakana neende emisiro ky'esifwaabi kyoosi nibahalaabanira banasaae baabwe, mani mwonoona eyiri Omwaami Nasaae weeng'we.

¹⁹ “Nae nimwebodoohania esiko ohumala embaka hoongo, nimusilwaania hu musiwaambe. Mutasihirisaanga emisaala kyasyo nimukyasyaaka neende eyaaywa; olwohuba munyala ohuchilyaaho ebyaamo, sakira mutakitemaanga. Emisaala kyomu ndalo haba si baandu, sakira mutakisihirisaanga.

²⁰ Nae emisaala kyoosi ki mumanyire muti sikyaamaho ebyaamo, munyala ohukisihirisa mani mwaakitema-tema, mwakyoombahira ebiindu bi mudaha ohulwaanisira esiko esyo esiri ohubalwaania olwoola lu mwahasiwaambire.