Amalako Kohubiri 2 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ Mani hwakaluuhana, hwaakeenda nihukobola mu siparara nihuchiira ena Nyaanja Njahanyu, koti Omwaami yali niyamboleere. Hwakeenda nihwebodoohania olugulu lwa Seyiri ohumala endaalo nyiingi muno.

² Nae Omwaami niyamboolera ati,

³ “Mumalire embaka hoongo muno nimweebodoohanianga esyaalo sy'engulu sino; bulaanu mukaluuhane muchiireho emukulu.

⁴ Haandi boolera abaandu oti: Muli aambi ohubita mu syaalo sy'abaana beeng'we, abeechuhulu b'Esau, abamenya mu Seyiri; bachia ohubatya. Nae mwehaliirise bulai,

⁵ mutachaakaho ebiita nabo; olwohuba haba siinja ohubaberesaho kata ahatuundu hadiidi ah'eloba lyaabwe, kata hahaba ahadiidi ahaakana neende esisiisiro sy'ohukulu, olwohuba ndamala ohuberesa Esau olugulu lwa Seyiri ohuba olwae.

⁶ Muchia ohwehoonyeraanga eseende ohubakulaho ebyohulya hu munyale ohulya; haandi muchia ohubakulaho amaachi kosi, hu munyale ohung'wa.

⁷ Olwohuba Omwaami Nasaae weeng'we ababereese ehabi mu buli siindu si munaahole; amanyire ebidinyu bi mwabitamo nimuli mu siparara sihoongo sino; emyaaka amahumi kane kano, Omwaami abeere naang'we; mani mwaahaya ohuba neende esiindu si mwekoomba.

⁸ “Hwakeenda, hwaaleha bamwaanama, abeechuhulu b'Esau abali nibamenya mu Seyiri, eyale neende engira ya Arabba eyitula Elaati neende Esiyonigebberi hu Nyaanja Y'Omuunyu, haandi hwaakaluuhana emukulu ohwoola hu Moabbu. “Hwakaluuhana hwaadiira engira yomu siparara sya Moabbu.

⁹ Mani Omwaami niyamboolera ati, ‘Mutasaandya abaandu ba Moabbu, oba mwaachaakisa ebiita nabo, olwohuba haba siinja ohubaberesa eloba lyaabwe libe elyeeng'we, olwohuba ndaliberesa abeechuhulu ba Loti ohuba elyaabwe.’ ”

¹⁰ (Hale Abamiimu nibo abali nibamenya mu Ari, abaandu abali kirahula kiingi, haandi ekileeyi koti Anakimu;

¹¹ haandi koti Anakimu, bosi bali nibalaangwa bati, Abarefaimu, nae Abamoabbu baabalaanga bati, “Abamiimu.”

¹² Abaahoori bosi hale bamenyaanga mu Seyiri, nae abeechuhulu b'Esau babeerusamo, mani nibasihirisa oluyia lwaabwe, baamenyamo; koti lu Abaisiraeli bahola mu syaalo si Omwaami yababeresa ohuba esyaabwe.)

¹³ “Bulaanu musiingire, mani mwaambuhe ahaalo ha Seredi. Hwaambuha ahaalo ha Seredi.

¹⁴ Mani ohutula nihutula Kadesi Bbarinea ohwoola lu hwaambuhira ahaalo ha Seredi, hwayira embaka y'emyaaka amahumi kadatu neende kitaanu-na-kidatu. Abasaacha balwaani boosi ab'endaalo echo basihiriswa baawa mu kaambi koti lu Omwaami yali n'abechubiire.

¹⁵ Olwohuba mubwadyeeri bweene, Omwaami yabalwaania n'adaha ohubasihirisa ohwoola lu yabamalirao elalira mu kaambi.

¹⁶ “Nibafwa baawa,

¹⁷ Omwaami yamboolera ati,

¹⁸ ‘Enyaanga yino muchia ohwaambuha olwaaho lwa Moabbu nimubitira Ari;

¹⁹ nae nimuli aambi ohwoola hu beechuhulu ba Abaamooni, haba simubayira bubi oba mwaachaakisa ebiita nabo, olwohuba haba siinja ohubaberesa eloba ly'abeechuhulu ba Abaamooni ohuba elyeeng'we, olwohuba ndaliberesa abeechuhulu ba Loti ohuba elyaabwe.’

²⁰ (Esyaalo esyo syosi silaangwa siti esya Refaimu; Abarefaimu hale nibo abamenyaangamo, nae Abaamooni beecha babalangaanga bati, “Abasamusumimu.”

²¹ Bali abaandu b'amaani haandi abaangi muno, haandi bali abaleeyi koti Anakimu. Nae Omwaami yabasihirisa, mani Abaamooni nibayira esyaalo syaabwe nibasimenyamo koti esyaabwe.

²² Nilwo lu Omwaami yaholera abeechuhulu b'Esau, abamenya mu Seyiri. Yasihirisa Abaahoori hu beechuhulu b'Esau banyale ohuyira esyaalo esyo ohuba esyaabwe, yi bamenya ohwoola buti.

²³ Nae Abaafimu, bamenyaanga mu ngoongo ohwoolera elalira Gasa, Abafitoriimu, abatula Kafitoori, babasihirisa mani nibamenya mu loba lyaabwe.)

²⁴ “Siingire, muchaake olukeendo, muchie mu hooho lya Arinooni; bone, mbao mbadiisire Sihooni, Omuamoori, omutuki wa Hesibboni, alala neende esyaalo syae; muchaake ohusiyira, mumuseete neende ebiita.

²⁵ Enyaanga yino njia ohuchaaka ohuta oluteengo neende obuti mu baandu bali hu syaalo syoosi, abachia ohuwulira ebibadiiraho mani bachia ohukwaamo oluteengo beyendeherere hulweeng'we.

Abaisiraeli bayiingira omutuki Sihooni

²⁶ “Mani ndatuma bawamwaanda ohutula mu siparara sya Kedemooti eyiri Sihooni omutuki wa Hesibboni, neende emboosi ch'omuleembe nimboola endi,

²⁷ ‘Leha mbite mu syaalo syao; njia ohubita hu ngira yoong'ene, haba siinja ohukabuhaho kata hu muhono muluungi oba omukaada.

²⁸ Ebyohulya bi hunaalye neende amaachi ka hunaang'we hunabikula, nae leha mbite ningeenda mu syaalo syao,

²⁹ ohwoola lu hunaambuhire Omwaalo kwa Yorodaani, hwiingire mu syaalo si Omwaami Nasaae weefwe ali ohutuberesa. Abeechuhulu b'Esau abamenya mu Seyiri neende Abamoabbu abamenya mu Ari, batufukiirira ohubita mu situundu syaabwe.’

³⁰ Nae Sihooni omutuki wa Hesibboni haba siyatufukiirira ohubita mu syaalo syae; olwohuba Omwaami Nasaae weeng'we yoomia omwooyo kwae, yaahola omwooyo kwae ohuba omwoomeranu, hu humale humuyiingire, mani hutuke esyaalo si hulimo bulaanu sino.

³¹ Omwaami yamboolera ati, ‘Bona, mbao njaakire ohubaberesa Sihooni neende esyaalo syae, muchaake ohusiyira, mani mumenye mu syaalo syae.’

³² Mani Sihooni neende abaandu bae boosi nibatulayo ohwiicha ohutulwaanisira Yahasi.

³³ Nae Omwaami Nasaae weefwe yamuta mu bunyala bweefwe, hwaamuyiingira, alala neende abaana bae, n'abaandu bae boosi.

³⁴ Hwaamba ebiko byoosi ebyali ebyae ebiha ebyo, hwaasihirisira elalira buli siko, neende abaandu babyo boosi, abasaacha, abahasi, neende abaana; sibulao esiindu syadoong'ao.

³⁵ Eng'oombe choong'ene nicho chi hwayira koti ebiindu bipeeye, neende ebiindu biindi bi hwapeeya mu biko bi hwaamba.

³⁶ Ohutula Aroeri, esiri hu ndulo w'ehooho lya Arinooni, neende ohutula mu siko siri mu hooho, ohwoolera elalira Gileadi, sibulao esiko syatuhayaho ohwiingiramo hulw'obuleeyi bw'esida syasyo; Omwaami Nasaae weefwe yabitechaanga byoosi mu bunyala bweefwe.

³⁷ Ohutusaho esyaalo sy'abeechuhulu ba Abaamooni, nisyo si mutasuda aambi nasyo, eyiri amagenya koosi ak'omwaalo kwa Yabboki neende ebiko byomu syaalo sy'ebigulu, neende buli abuundu woosi yi Omwaami Nasaae weefwe yatukayiraanga.”