Amalako Kohubiri 16 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Esidyaalo sya Paasaka

¹ “Muliindeenge omwoosi kwa Abbiibbu, haandi muholeenge Esidyaalo sya Paasaka eyiri Omwaami Nasaae weeng'we; olwohuba mu mwoosi kwa Abbiibbu, nikwo ku Omwaami Nasaae weeng'we yabatusiramo mu syaalo sya Misiri mu siro.

² Muchia ohuchichaanga abuundu yi Omwaami yahadoole ohumwiinamiramo, mani muyaanire Omwaami esiyaanwa sya Paasaka ohutula mu byaayo byeeng'we oba mu ng'oombe cheeng'we. Muchia ohuhola Esidyaalo sya Paasaka ohwiisa oluyaali mu Omwaami Nasaae weeng'we.

³ Nimulya Esidyaalo sino, mutasiliiraangaho emigaati mibbaahe. Munamalaanga endaalo chitaanu-na-chibiri nimulya emigaati kitaali emibbaahe, koti lu mwahola nimutula mu syaalo sya Misiri nimubbibbirihana ohwiiruha. Mani mu bulamu bweeng'we bwoosi mwiichuliseenge oludaalo lu mwatuliraho mu syaalo sya Misiri.

⁴ Hulw'embaka y'endaalo chitaanu-na-chibiri, abuleo omuundu yeesi hweeng'we onabecheenge neende amamera mu nyuumba yae. Haandi enyama y'esisolo siitirwe koti esiyaanwa hu ludaalo lutaangira haba siyinaakoneenge ohwoola hu ludaalo luloondaho.

⁵ Esiyaanwa sy'Esidyaalo sya Paasaka mutasiholeraanga mu silala hu biko byeeng'we byoosi bi Omwaami Nasaae weeng'we achia ohubaberesa.

⁶ Nae musiholereenge abuundu yi Omwaami Nasaae weeng'we achia ohudoola, ohwiisa oluyaali mu liita lyae, eyo niyo yimwahayaanire esiyaanwa sya Paasaka, engoloobe elyuuba nilikwa, koti lu mwahola mu biha bi mwatuliramo mu Misiri.

⁷ Munasideheenge mani musiliira abuundu yi Omwaami Nasaae weeng'we achia ohudoola; nae echuli nibuhyeere, munakobolaangayo mu mayeema keeng'we.

⁸ Hulw'embaka y'endaalo chisaasaba, munalichaanga emigaati kitaabbaahirwe; nae hu ludaalo lwa hataanu-na-habiri, munebuusaanga ohwiinamira Omwaami Nasaae weeng'we; haandi simunaaholeenge emirimo hu ludaalo olwo.

Esidyaalo sy'ekesa

⁹ “Munaabaleenge ejuma chitaanu-na-chibiri ohuchaakira mu biha bi mwachaakiraho ohukesa emwo mu ndalo.

¹⁰ Mani munaliindeenge Esidyaalo sy'ejuma eyiri Omwaami Nasaae weeng'we ohumwiisamo oluyaali neende esiyaanwa si mwedahiire abeene ohuchianakana neende ehabi chi Omwaami Nasaae weeng'we ababereese.

¹¹ Haandi munasangaaliraanga mu moni w'Omwaami Nasaae weeng'we, eng'we alala neende abaana beeng'we basyaani neende abahaana, neende abahalaabani beeng'we basaacha neende abahasi, neende Abaleefi bamenya mu biko byeeng'we, neende bawalukeendwa, neende abaana bafwiirwe, alala neende abahasi bafwiirwe abali naang'we, abuundu yi Omwaami Nasaae weeng'we achia ohudoola, ohumwiinamiramo.

¹² Mwiichuliseenge muti mwesi mwalichiingi abawaambe mu Misiri; mani mubone muti mudiira amalako kano.

Esidyaalo sy'ebikaali

¹³ “Munaholeenge Esidyaalo sy'Ebikaali mu ndaalo chitaanu-na-chibiri, nimumalire ohubiiha emwo yeeng'we mu byaaki haandi nimumalire ohuhunya efiini yeeng'we.

¹⁴ Mani musangaalire alala neende abaana beeng'we basyaani neende abahaana, neende abahalaabani beeng'we basaacha neende abahasi, Abaleefi neende bawalukeendwa, neende abaana bafwiirwe, alala neende abahasi bafwiirwe abamenya mu biko byeeng'we.

¹⁵ Hulw'embaka y'endaalo chitaanu-na-chibiri, muchia ohuholaanga Esidyaalo sino eyiri Omwaami Nasaae weeng'we abuundu yi Omwaami yahadoole; olwohuba Omwaami Nasaae weeng'we achia ohubaberesa ehabi mu buli siindu si munanyooleenge neende mu buli mulimo ku munaholeenge, hu munyale ohusangaalira elalira.

¹⁶ “Abasaacha boosi abomu syaalo syeeng'we banachichaanga amahabi kadatu buli mwaaka ohwiinamira Omwaami Nasaae weeng'we abuundu yi Omwaami yahadoole, mu sidyaalo sya Paasaka, mu sidyaalo sy'Ekesa neende Esidyaalo sy'Ebikaali. Haba sibanaachicheenge mu moni w'Omwaami mahono mahaya.

¹⁷ Buli muundu anaayaaneenge koti lu anyala ohuchianakana neende ehabi chi Omwaami Nasaae weeng'we aba naamubereese.

Ohuheenga emisaango hwadyeeri

¹⁸ “Munadooleenge abakayi neende abahunuufu baandi mu biko byeeng'we byoosi bi Omwaami Nasaae weeng'we ali ohubaberesa, ohuchianakana neende enono cheeng'we. Bachia ohuheengeraanga abaandu emisaango mu bwadyeeri.

¹⁹ Mutabechaanga abaandu babula obwadyeeri oba abakwiira abaandi nimuheenga emisaango; haandi mutafukiiriraanga ohulya asowa. Olwohuba ohulya asowa huwofusa omuundu mukesi, haandi huhyaamya emboosi ch'omuluungifu.

²⁰ Buli ludaalo mwoomiirireenge hu bwadyeeri bwoong'ene, hu munyale ohuyiindira haandi mutuke esyaalo si Omwaami Nasaae weeng'we achia ohubaberesa.

²¹ “Nimuba nimwoombahira Omwaami Nasaae weeng'we alutaari, mutataakaanga omusaala kw'ahalolero ha nasaae Asera aambi neende alutaari eyo.

²² Haandi mutoombahaanga omunaara kw'amakina ohwiinamiramo banasaae. Omwaami Nasaae weeng'we haba s'abadaha.