Amalako Kohubiri 15 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Omwaaka kwa hataanu-na-habiri

¹ “Buli myaaka kitaanu-na-kibiri nikyahawecheenge, muhoyere ohuleheraangamo abaandu ba mubaanja amakobi.

² Yino niyo engeri yi munaholereengemo: buli muundu onabecheenge neende omuundu y'abaanja, anamulehereengemo esiindu si yamweeyosa; haba sanabanjeenge owaasye oba mwanaang'ina, olwohuba Omwaami mweene niye olagiire ohuleherwamo.

³ Bawalukeendwa, munyala ohubabaanja, nae buli siindu syeeng'we esiri neende bamwaanamao, muchia ohubaleheraangamo.

⁴ Nae abulao omuundu onabecheenge omumanani mweeng'we (olwohuba Omwaami achia ohubaberesa ehabi mu syaalo si Omwaami Nasaae weeng'we ali ohubaberesa ohuba esyeeng'we).

⁵ Sino syahabaholerwe sa nikali mbwe mweedinya ohuwuliraanga Omwaami Nasaae weeng'we, haandi nimwehaliirisa bulai ohwooseresaanga amalako kano koosi, ka ndi ohubalagira enyaanga yino.

⁶ Olwohuba Omwaami Nasaae weeng'we achia ohubaberesa ehabi, ebyaalo biingi binabeyoolaangaho, nae eng'we haba simuchia ohwewolaanga; haandi muchia ohutukaanga ebyaalo biingi, nae haba sibichia ohubatukaanga daawe.

⁷ “Nae nimunabecheenge neende omuundu mumanani, mulala hu beebulanwa beeng'we, oli mu siko syeeng'we syoosi esiri mu syaalo si Omwaami Nasaae weeng'we ali ohubaberesa, haba mutamuchuunianga omwooyo oba muhaya ohumuhoonya,

⁸ ohutusaho mumukwiireenge esisa, mani mumweeyosa buli siindu sy'aba n'adaha.

⁹ Mweehalirise bulai muhaye ohubaasa mu myooyo kyeeng'we muti, ‘Omwaaka kwa hataanu-na-habiri okwohuleheramo amakobi kuli aambi,’ mani mwaaba neende obwaalaba eyiri bamwaanamao, mwaahaya ohumweeyosa esiindu syoosi si aba n'adaha. Aba achia ohulirira Omwaami mani aboolobye. Sino siba sichia ohubabeera esibi.

¹⁰ Mumweyoseenge neende omwooyo mulala, ataali ohulirikana hwoosi, olwohuba Omwaami Nasaae weeng'we aba achia ohubaberesa ehabi mu buli mulimo kweeng'we neende buli siindu si munaholeenge.

¹¹ Olwohuba abamanani haba sibahawe hu syaalo, sakira mbalagira endi mutahayaanga ohuhoonya abanaluyia beeng'we, abaandu bali mu saando neende abamanani bali mu syaalo.

Engeri y'ohuyiriramo abawaambe

¹² “Nibabakusaanga Omuibburania waasyeeng'we, omusaacha oba omuhasi, achia ohubahalaabaniraanga embaka y'emyaaka kisaasaba, nae mu mwaaka kwa hataanu-na-habiri, muchia ohumulehaanga aba omulehuule mani awaao.

¹³ Nae nimumuleha yaaba omulehuule, mutamulehaanga awaao amahono mahaya.

¹⁴ Mumubechaanga ebiindu neende omwooyo mukabi nimutusa hu byaayo byeeng'we, hu byohulya byeeng'we neende hu fiini yeeng'we, ohuchianakana koti lu Omwaami Nasaae weeng'we aba n'ababerese ehabi, mani mwesi mumubereseenge.

¹⁵ Mwiichuliseenge muti mwesi mwaliho abawaambe mu syaalo sya Misiri, mani Omwaami Nasaae weeng'we yabanunula; sakira mbalagira sino enyaanga yino.

¹⁶ Nae omuwaambe oyo n'ababoolera ati, ‘Haba siinja ohuhutulaho mbweeo,’ olwohuba yahuheera alala neende abomu daala lyao, haandi aholeganaanga naawe bulai,

¹⁷ oba onamuyiraanga amwiingira w'enyuumba yao, mani omufudula ohutwi. Aba achia ohudoong'a naali omuwaambe wao endaalo choosi. Omuwaambe muhasi otadaha ohuwaao yesi omuyiraanga mu ngeri nasilala eyo.

¹⁸ Lehe ohubaasa muti sidinyu muno ohuleha omuwaambe yaabeera elalira omulehuule, olwohuba hulw'embaka y'emyaaka kisaasaba, abeere n'ahalaabanira esituundu sy'omusaara kw'omuhalaabani mupaangise. Sakira Omwaami Nasaae weeng'we achia ohubaberesa ehabi mu buli siindu si munaaholeenge.

Eng'oombe neende amakoondi byaamberi ohwiibulwa

¹⁹ “Buli bisolo bisaacha bitaangira ohwiibulwa eby'ebyaayo byeeng'we neende eng'oombe cheeng'we munabyaawuliraanga Omwaami Nasaae weeng'we. Eng'oombe surusi chitaangira ohwiibulwa echo, mutachilimyaanga, haandi amakoondi mamiiku kataangira ohwiibulwa ako, mutakabekaanga obwooya.

²⁰ Munaliiraanga ebisolo ebyo mu moni w'Omwaami Nasaae weeng'we buli mwaaka abuundu yi Omwaami achia ohudoola.

²¹ Nae esisolo sinaabecheengeho obufwoolwa, nisiba esilema oba esiwofu, oba esiri neende obufwoolwa bw'amaani, haba mutasiyaaniraanga Omwaami Nasaae weeng'we.

²² Munasiliireenge mu biko byeeng'we, abalabisibwa neende abatalabisibwa nasilala banyala ohusilya koti lu bahalya emboongo oba esijusu.

²³ Ohutusaho mutalichaanga amabaanga kasyo; mukachuheenge hu loba koti lu mwahachuha amaachi.