Amalako Kohubiri 14 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Emisiro kitafukiirirwa hu masika

¹ “Eng'we muli abaana b'Omwaami Nasaae weeng'we; haba mutesaandakaanga oba mweebeka emitwe nimuli hu masika.

² Olwohuba muli abaandu boolerefu eyiri Omwaami Nasaae weeng'we, haandi Omwaami yabadoola ohuba abaandu bae beene, ohutula mu baandu bali hu syaalo syoosi.

Ebisolo bihoyerwa ohuliibwa neende eby'omusiro

³ “Mutalichaanga esiindu sy'omusiro.

⁴ Bino nibyo ebisolo bi muhoyere ohulichaanga: Eng'oombe, amakoondi, embusi,

⁵ emboongo, ebijusu, amakoondi komu siino, neende embusi chomu siino.

⁶ Buli sisolo syoosi esiri neende ebirekeyi bibiri, haandi esikaaya obunyaasi bu syaayire, mu bisolo byoosi, esyo munyala ohusilya.

⁷ Nae ebyo ebikaaya obunyaasi nae biri neende ebirekeyi byaambaana, koti engamia, ebiduuyu, neende embeba chomu makina, mutabilichaanga olwohuba bikaayaanga obunyaasi nae haba sibiri neende ebirekeyi bibiri, haandi haba sibyalabisibwa daawe.

⁸ Nae embiichi, kata ayahaba niyiri neende ebirekeyi bibiri, nae haba siyikaayaanga, sakira haba siyalabisibwa yi muli. Mutalichaanga enyama yao, oba kata sa ohuyidiiraho niyifwiire.

⁹ “Nae eng'eeni choosi echiri mu maachi, munyala ohulyaaho sa echiri neende amalaha neende amakaamba choong'ene.

¹⁰ Nae buli siindu syoosi esitaali neende amalaha neende amakaamba mutasilichaanga, olwohuba haba sibyalabisibwa yi muli.

¹¹ “Munyala ohulya buli yoni lyalabisibwa.

¹² Nae amayoni kaloondaho kano mutakalichaanga: Eeswi, engosya, ehwaasi,

¹³ ewuusi, amahirihiihi, wefweeko, adyeedo, embuudombuudo, ebihubbi, neende ako koosi akakafwaana.

¹⁴ Buli yoni, ngeri ya namung'ona;

¹⁵ ewudo, enyaange, ekaambi, neende ako koosi akakafwaana;

¹⁶ ehirihiihi diidi neende ehoongo, amayoyo komu maachi

¹⁷ neende amang'aang'a, owaang'i neende akaandi akakafwaana;

¹⁸ awudu, neende embuudombuudo.

¹⁹ Haandi ebikooko buliho embaya bwoosi haba sibwalabisibwa yi muli; mani mutabilichaanga daawe.

²⁰ Buli bibburuha byoosi ebyalabisibwa munyala ohubilya.

²¹ “Mutalichaanga esiindu sifwiire esyeene, ohumalaho munyala ohusiberesa abateende ba mwamenya nabo mu biko byeeng'we, banyale ohusilya, oba munyala ohusikusa walukeendwa; olwohuba muli abaandu boolerefu ab'Omwaami Nasaae weeng'we. “Mutetaanga mulya omwaana kw'ekoondi oba okw'embusi okusinuuna kabeere ka ng'ina haba.

Amalako kadiira hu huyaana silala sy'ehumi

²² “Muchia ohutusaanga silala sy'ehumi sya buli siindu si mukesa ohutula mu ndalo cheeng'we buli mwaaka.

²³ Haandi munachichaanga eyiri Omwaami Nasaae weeng'we, abuundu yaanedoolere ohwiinamirwaangao, muchia ohuliiraanga eyo silala sy'ehumi sy'engaano yeeng'we, esy'efiini yeeng'we neende esy'amafuta keeng'we, neende esy'eng'oombe neende ebyaayo byeeng'we bitaangira ohwiibulwa. Mweeke ohwiisaanga oluyaali mu Omwaami Nasaae weeng'we buli siha.

²⁴ Nae olukeendo nilubabitiiriraho obuleeyi, mani mwaahaya ohuleeta silala sy'ehumi, olwohuba abuundu yi Omwaami Nasaae weeng'we yedooleere ohwiinamirwaangao ali eyale muno naang'we,

²⁵ muba munakusaangamo esiyaanwa esyo mani muyira eseende chituliremo echo abuundu yi Omwaami Nasaae weeng'we aba niyedoolera ao.

²⁶ Eseende echo muba munachikulaangamo esiindu si myooyo kyeeng'we kyekoomba, koti eng'oombe, amakoondi, oba efiini oba esyohung'wa sy'amaani, buli siindu si myooyo kyeeng'we kyekoomba; mani musiyira mu moni w'Omwaami Nasaae weeng'we, nimweehoya, eng'we neende abomu nyuumba cheeng'we.

²⁷ Nae muteebiriraanga Omuleefi oli mu biko byeeng'we, olwohuba haba saali neende omukabo kwae kweene kwoosi oba obusiha bwae bweene.

²⁸ “Nae hu buli njakamo y'emyaaka kidatu, munaleetaanga silala sy'ehumi sya buli siindu si mwahanyooleenge mu myaaka kyeene ekyo, mani mubitecheenge mu biko byeeng'we.

²⁹ Mani Abaleefi, olwohuba babula omukabo kwaabwe kweene oba obusiha bwaabwe bweene, neende bawalukeendwa, neende bamulehwa neende abahasi bafwiirwe, abali mu biko byeeng'we, bachia ohubilichaanga beekuta; mani Omwaami Nasaae weeng'we anyala ohuberesa eng'we ehabi mu buli siindu si muhola.