Amalako Kohubiri 12 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Abuundu alala woong'ene aohwiinamiraangao Nasaae

¹ “Kano niko amalako neende ebilagiro bi muhoyere ohwehaliirisa bulai nimuli mu syaalo si Omwaami Nasaae wa bakuuka yeeng'we ababereese ohubukula musituke endaalo ch'obulamu bweeng'we bwoosi.

² Mutahayaanga ohusihirisa abuundu wohwiinamiramo banasaae woosi ow'abaandu bomu byaalo bi muchia ohuyira mani mubituke, ebiri hu ngulu ndeeyi neende hu bigulu, neende ebiri mu bisina by'emisaala.

³ Muchia ohulikula alutaari chaabwe, munyoonyobole amakutu kaabwe, haandi musaambe Aserimu byaabwe neende omuliro. Haandi muteme-temeenge ebifwaanani bya banasaae baabwe, mani musihirise ameeta kaabwe mukamale mu bituundu ebyo.

⁴ Muteenamiraanga Omwaami Nasaae weeng'we koti lu baandu bomu syaalo esyo beenamiraanga banasaae baabwe.

⁵ Nae mukoonyeenge abuundu yi Omwaami Nasaae weeng'we achia ohudoolamo ohutula mu nono cheeng'we choosi; eyo niyo yi baandu banaachicheenge ohwiinamira Omwaami Nasaae weeng'we.

⁶ Haandi nimuyira ebiyaanwa byeeng'we bisaambwa neende ebiyaanwa byeeng'we biindi, neende esituundu silala sy'ehumi, neende ebiyaanwa bi mwasuubisa Omwaami, neende eby'ebisolo bitaangira ohutula mu byaayo byeeng'we neende eng'oombe cheeng'we.

⁷ Eyo, mu moni w'Omwaami Nasaae weeng'we, niyo yi munaliiraanga haandi musangaalireenge mu ebyo byoosi bi Omwaami Nasaae weeng'we anababereseenge ehabi nimuhola.

⁸ Haba mutaholaanga ebyo byoosi bi muli ohuhola nyaanga yino ohuchianakana neende ohudaha hwa buli muundu.

⁹ Olwohuba musisiiri ohwoola mu syaalo si Omwaami Nasaae weeng'we ali ohubaberesa, yi muchia ohumenya mu muleembe.

¹⁰ Nae nimwaambuha omwaalo kwa Yorudaani, mani mwaamenya mu syaalo si Omwaami Nasaae weeng'we ali ohubaberesa ohuyira sibe esyeeng'we, achia ohumalao abasuku beeng'we babeebodoohaanie, mani mumenye mu muleembe.

¹¹ Omwaani Nasaae weeng'we achia ohubeekesa abuundu yi yahabe n'adoolere ohwiinamirwaangao. Ao niwo yi muchia ohuyiraanga buli siindu si mbalagira: ebiyaanwa byeeng'we bisaambwa neende ebiyaanwa byeeng'we biindi, silala sy'ehumi syeeng'we neende ebiyaanwa bi muberesa Omwaami neende ebiyaanwa byoosi bi mwasuubisa nimweechubira Omwaami.

¹² Muchia ohusangaaliraanga ao mu moni w'Omwaami Nasaae weeng'we, eng'we neende abaana beeng'we basyaani neende abaana beeng'we bahaana, abahalaabani beeng'we basaacha neende abahalaabani beeng'we bahasi, alala neende Abaleefi bali mu biko byeeng'we. Olwohuba Abaleefi haba sibali neende omukabo kwaabwe kweene kw'eloba.

¹³ Mweliindeenge muhaya ohuyiraanga ebiyaanwa byeeng'we bisaambwa mu buli situundu si mubona;

¹⁴ nae mubiyiraanga abuundu yi Omwaami achia ohudoola ohutula hu nono ndala mu nono cheeng'we. Ao niwo yi munayaaniraanga ebiyaanwa byeeng'we bisaambwa, haandi ao niwo yi munaholeraanga buli siindu si ndi ohubalagira.

¹⁵ “Nae munyala ohwiita mani mwaalya enyama y'ebisolo biri mu biko byeeng'we koti lu mwekoomba, ohuchianakana neende ehabi yi Omwaami Nasaae weeng'we achia ohubaberesa. Mweesi munalicheenge, abalabiiswe neende abatalabiiswe nasilala, koti lu mwahalya emboongo oba esijusu.

¹⁶ Nae mutalichaanga amalika; mukachuhaanga aasi koti amaachi.

¹⁷ Nae buli si muberesa Omwaami koti silala sy'ehumi, mutasiliraanga mu biko byeeng'we, kata asyahaba esy'engaano yeeng'we, oba esy'efini yeeng'we, oba esy'amafuta keeng'we, kata eng'oombe cheeng'we, oba ebyaayo byeeng'we bitaangira ohwiibulwa, oba esiyaanwa sisuubise syeeng'we si mweechuba ohuberesa Omwaami, oba esiyaanwa si muyaana nimwedahiire abeene, oba ebiyaanwa biindi bi mumuberesa.

¹⁸ Nae ebiyaanwa ebyo munabiliiraanga mu moni w'Omwaami Nasaae weeng'we nimuli abuundu yi Omwaami Nasaae weeng'we achia ohudoola; eng'we neende abaana beeng'we basyaani neende abaana beeng'we bahaana, abahalaabani beeng'we basaacha neende abahalaabani bahasi, neende Abaleefi bamenya mu biko byeeng'we; muchia ohusangaaliraanga mu moni w'Omwaami Nasaae weeng'we mu buli siindu si munaholeenge.

¹⁹ Mweliinde muhaye ohwiibiriraanga Abaleefi mu bulamu bweeng'we bwoosi.

²⁰ “Nae Omwaami Nasaae weeng'we niyahameedeho enjaho ch'esyaalo syeeng'we koti lu yabasuubisa, mani mwahaboole muti, ‘Njia ohulya enyama,’ olwohuba niyo yi mwekoomba ohulya, muchia ohunyala ohulya ohweema hu bwekoombi bweeng'we.

²¹ Nae abuundu yi Omwaami Nasaae weeng'we achia ohudoola ohumwiinamiramo naali eyale muno naang'we, munyala ohwiita esisolo syoosi ohutula mu ng'oombe cheeng'we oba mu byaayo byeeng'we bi Omwaami aliba n'ababereese, koti lu mbalagiire; haandi munyala ohubiliiraanga mu biko byeeng'we koti lu muba nimwekoomba.

²² Mweesi, abalabiswa neende abatalabiswa nasilala muchia ohulya koti lu mwahalya emboongo oba esijusu.

²³ Ohutusaho, mweliinde bulai muhaye ohulichaanga amabaanga; olwohuba amabaanga niko obulamu, sakira mutakalichaanga haba.

²⁴ Mutalichaanga amabaanga; nae mukachuheenge aasi koti amaachi.

²⁵ Mutalichaanga amabaanga; hu buli siindu sibachiireenge bulai, eng'we alala neende abaana beeng'we ba mwaheebule, nimuhola esilai mu moni w'Omwaami.

²⁶ Nae ebiindu byoolerefu bi muli nabyo, neende ebyo bi mwasuubisa ohuyaanira Omwaami, munabibukulaanga mani mubiyira abuundu yi Omwaami achia ohudoola.

²⁷ Munayaanaanga ebiyaanwa byeeng'we bisaambwa, neende enyama neende amabaanga hu alutaari y'Omwaami Nasaae weeng'we. Amabaanga k'ebiyaanwa byeeng'we munakachuheenge hu alutaari y'Omwaami Nasaae weeng'we, nae munyala ohulya enyama.

²⁸ Muwulireenge bulai emboosi chi mbalagira chino, hu biindu bibachiire bulai, eng'we neende abaana beeng'we endaalo choosi, nimuhola ebilai haandi ebiluungifu mu moni w'Omwaami Nasaae weeng'we.

Ohulabula ohudiira hu hwiinamiraanga banasaae baandi

²⁹ “Nae Omwaami Nasaae weeng'we niyahasihirise ebyaalo bi muli aambi ohwiingiramo mubiyire mubituke, mani nimumalire ohubituka haandi uhabimenyemo.

³⁰ Mweliinde bulai muhaye ohuteemwa mwaloondakana neende emiduunga kyaabwe, nibamalire ohusihiriswa nimubona, haandi muteteebaanga ebidiira hu banasaae baabwe nimuboola muti, ‘Abaandu bomu byaalo bino beenamiraanga batye banasaae baabwe? Mani fwesi huneenamireenge hutyo.’

³¹ Muteenamiraanga Omwaami Nasaae weeng'we mutyo; olwohuba buli siindu sy'omusiro si Omwaami atadaha nisyo si baholera banasaae baabwe; Kata bayaaniraanga banasaae baabwe abaana baabwe basyaani neende abaana baabwe bahaana, nibabasaambira hu alutaari chaabwe.

³² “Buli siindu si mbalagira musiholeenge bulai; haba mutoongeraangaho oba mutusaho esiindu syoosi.