Abarooma 9 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Nasaae neende abaandu bae

¹ Ese ndi ohulomaloma obwadyeeri bweene; ndi omuundu wa Kristo haandi simbacha daawe. Ebibaaso byaange, nibitukwa neende Mwooyo Mwoolerefu, byosi byomiisa biti simbacha.

² Mboola endi, ndi omwelalihirifu muno, haandi obuchuuni bwaange bwomu mwooyo sibwaakama daawe,

³ hulw'abaandu baange, ab'olwiibulo lwaange lweene, haandi ab'amabaanga kaange keene. Hulwaabwe, ndahekoombere endi ese mweene mba ndabwaabwa neende Nasaae mani ndaawuha hu Kristo.

⁴ Bano nibo abaandu ba Nasaae beene; ba yahola ohuba abaana bae mani yaabeekesa oluyaali lwae. Yahola nabo endagaano mani yaababeresa amalako. Bali neende engeri yadyeeri y'ohwiinamira Nasaae. Banyoola ebisuubiso bya Nasaae.

⁵ Beechuhulu batula hu bakuuka yaabwe Bayudaaya bamanyihana; haandi Kristo koti omuundu mwiibulanwa waabwe. Lehe Nasaae otuka byoosi afumisibwe endaalo choosi. Amiina.

⁶ Si ndi huboola endi ebiindu bi Nasaae yasuubisa haba sibyoolerera; olwohuba Abaisiraeli boosi haba sibali abaandu ba Nasaae.

⁷ Kata sisiri mbwe abeechuhulu ba Abburahamu boosi baana ba Nasaae. Nasaae yaboolera Abburahamu ati, “Ochia ohunyoola abeechuhulu ba ndahusuubisa ohubitira mu Yisaka.”

⁸ Sino syeekesa siti abaana beebulwa mu ngeri ya buli ludaalo, haba si baana ba Nasaae; ohumalaho, abaana beebulwa ohweema hu sisuubise sya Nasaae nibo abalaangwa koti abeechuhulu badyeeri.

⁹ Olwohuba Nasaae yahola esisuubise n'aboola emboosi chino: “Mu biha bihoyeerwe, njia ohukobola, mani Saara achia ohwiibula omwaana musyaani.”

¹⁰ Haandi sino sinisyo syoong'ene daawe. Olwohuba abaana ba Rebbeka babiri bali neende saabwe mulala, Yisaka kuuka yeefwe.

¹¹ Kata nibaba nibasisiiri ohwiibulwa, haandi nibasisiiri ohuholaho esiindu silai oba esibi, ohweekesa huti esichiiririrwa nisyo ohudoola hwa Nasaae, ohuteema hu bihole, nae ohweema hu hulaanga hwae.

¹² Nasaae yaboolera Rebbeka ati, “Omwaana muhuluundu achia ohuhalaabanira omwaana muyere.”

¹³ Koti lu byandiiko byoolerefu biboola biti, “Ndaheera Yakobbo nae ndaasyuula Esau.”

¹⁴ Mani hunaboole huti Nasaae akwiira abaandu baandi? Haba daawe!

¹⁵ “Njia ohukwiira esisa omuundu yeesi yi ndaha; haandi njia ohusaasira omuundu yeesi yi ndaha.”

¹⁶ Mani sakira, buli siindu syeema hu sisa sya Nasaae syoong'ene ataali ohweema hu hudaha hw'omuundu oba bi muundu ahola.

¹⁷ Olwohuba ebyandiiko byoolerefu biboolera omutuki wa Misiri biti, “Ndahuhola omutuki, hu nyale ohuhwehoonyera ohweekesa obunyala bwaange neende ohusalaania efuma yaange hu syaalo syoosi.”

¹⁸ Mani sakira, Nasaae akwiira esisa buli muundu yaaba n'adaha, haandi yoomya emitwe cha buli baandu baaba n'adaha.

Etima lya Nasaae neende esisa syae.

¹⁹ Owuundi hweeng'we achia ohuteeba ati, “Nibiri bityo, Nasaae aheengera atye omuundu omusaango? Wiina mweene onyala ohuyiingania si Nasaae adaha?”

²⁰ Nae wasyaange, niiwe wiina omuundu sa onyala ohukaluha mu Nasaae? Endamu yosi yinyala ohuteeba omuundu wayiloonga yiti, “Lwasiina wanoonga oti?”

²¹ Omuundu oloonga endamu ngaandi ali neende obunyala bw'ohwehoonyera eloba koti lu mweene adaha. Haandi anyala ohuloonga endamu chibiri ohutula mu loba nasilala, anyala ohuloonga endamu ndala eyohwehoonyerwa hu miholo mihuluundu nae eyiindi eyohwehoonyera mu ngeri ya buli ludaalo.

²² Nasaae yesi yahola esiindu nasilala atyo. Yadaha ohweekesa etima lyae, haandi neende ohukera obunyala bwae bumanyihane. Sakira yesimiirisira muno abo abamudiisa etima, abali abohusihiriswa.

²³ Haandi Nasaae yadaha ohweekesa oluyaali lwae lubitiirifu, lu yatuberesa efwe abaandu ba yakwiira esisa, abaandu ba yali yatekeha ohwakaanira oluyaali lwae.

²⁴ Olwohuba neefwe abaandu ba Nasaae yalaanga, ataali ohutula mu baandu Bayudaaya boong'ene, nae ohutula mu Abateende bosi.

²⁵ Sino nisyo sy'aboola mu sitabo sya Hosea: “Abatali abaandu baange njia ohubalaanga ‘Abaandu baange.’ Esyaalo si ndali nitaheera Njia ohusilaanga ‘Esiheerwa syaange.’

²⁶ Haandi abuundu bweene yi baboolerwa bati, ‘Eng'we haba simuli abaandu baange,’ ao niwo yi bachia ohulaangirwa abaana ba Nasaae mulamu.”

²⁷ Haandi Yisaaya alomaloma hu Yisiraeli ati: “Kata neende abaandu Baisiraeli bahaba abaangi koti omusenye kwohu nyaanja, nae abadiidi boong'ene nibo abacha ohuwonisibwa;

²⁸ olwohuba Omwaami achia ohuheengera esyaalo omusaango bwaangu muno.”

²⁹ Biri koti lu Yisaaya yaboola hale ati, “Omwaami w'Obunyala aba naatatuleheraho abeechuhulu baandi, huba hweehola koti Sodomu, hwahabeere koti Gomora.”

Paulo asabira Abaisiraeli.

³⁰ Sakira huboola huti Abateende, abatali nibateemaho abeene ohuba abaluungifu neende Nasaae, baholwa baaba abaluungifu ohubitira mu fukiirira;

³¹ nae abaandu ba Nasaae, abali nibakoonyaanga elako libahola ohuba abaluungifu neende Nasaae, haba sibalinyoola.

³² Nae siina syeene esyakera baahaya ohulinyoola? Olwohuba bi bahola haba sibyeema hu fukiirira, nae byeema hu bihole byaabwe bilai byoong'ene. Mani beegumula hu “Kina ly'ohweegumulaho”

³³ li byandiiko byoolerefu bilomalomaho biti: “Bone, mbao nda mu Siyooni ekina elicha ohukera abaandu beegumule, olwaanda luchia ohukera bakwe. Nae oyo yeesi omufukiiriramo, haba saachia hudiirwa esoni.”