Abarooma 5 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ohuba omuluungifu neende Nasaae.

¹ Bulaanu koti lu hwamala ohuholwa abaluungifu neende Nasaae hulw'ohufukiirira, hwanyoola omuleembe neende Nasaae ohubitira mu Omwaami weefwe Yesu Kristo.

² Ohubitira mu fukiirira, Omwaami weefwe Yesu Kristo yatuleeta hwaaba mu mbabaasi cha Nasaae sino si hulimo bulaanu.

³ Haba sinisyo esyo syoong'ene, nae haandi lehe fweesi husaangaalira ebidinyu byeefwe, olwohuba humanyire huti ebidinyu bitulamo ohwesimiirisa,

⁴ ohwesimiirisa hukera Nasaae yaatusiima, haandi Nasaae ohutusiima hutulamo esuubi.

⁵ Ohusuubira nahwo haba si hutudiisa esoni, olwohuba obuheeri bwa Nasaae bwachuhwa mu mwooyo kyeefwe ohubitira mu Mwooyo Mwoolerefu yi hwabeereswa.

⁶ Olwohuba nihwali nihubula obuhoonyi bwoosi, Kristo yafwiira abahola-mbi mu biha bi Nasaae yatekeha.

⁷ Lwasiina yahola atyo? Sidinyu muno omuundu ohufwiira omuundu muluungifu. Awuundi sinyaliha omuundu ohweyaanayo ohufwiira omuundu mulai.

⁸ Nae Nasaae yamala ohutweekesa obuheeri bwae, olwohuba nihwali nihusisiiri abahola-mbi, Kristo yatufwiira!

⁹ Koti ohufwa hwae hwatuleetera obuluungifu neende Nasaae, bulaanu yatuwonisira elalira etima lya Nasaae.

¹⁰ Hale hwalichiingi abasuku ba Nasaae, nae Nasaae yatuhola hwaaba abeecha bae ohubitira mu hufwa hw'Omwaana wae. Koti lu huli abeecha ba Nasaae, bulaanu obulamu bwa Kristo bucha ohutuwonisira elalira.

¹¹ Nae esyo sinisyo syoong'ene daawe; huli abasangaafu hulw'ebyo bi Nasaae yatuholera ohubitira mu Omwaami weefwe Yesu Kristo, oyo owatuhola hwaaba abeecha ba Nasaae.

Adamu neende Kristo.

¹² Esyonoono syeecha mu syaalo nisibitira mu omuundu mulala, haandi esyonoono syae syaleeta ohufwa. Esyatulamo, ohufwa hwasalaana hwoola hu buli muundu, olwohuba abaandu boosi bonoona.

¹³ Esyonoono syali mu syaalo amalako nikasisiiri ohubaao; nae yi lako litali, abulao omuundu ofunaanwa hulw'ohwonoona.

¹⁴ Nae ohutula mu ndaalo cha Adamu ohwoola mu ndaalo cha Musa, ohufwa hwali nihutuka abaandu boosi, kata neende abo abatahola esyonoono koti lu Adamu yahola n'ahaya ohuwulira amalako ka Nasaae. Adamu yali efwaani y'oyo owali owohwiichia.

¹⁵ Nae bano boombi haba sibali nasilala daawe, olwohuba esiyaanwa sya Nasaae syebihaya haba sisifwaanana neende esyonoono sya Adamu. Nikali mbwe abaandu baangi bafwa ohweema hu syonoono sya Adamu omuundu mulala oyo, nae embabaasi cha Nasaae neende esiyaanwa syae syebihaya eyiri abaandu baangi muno si banyoola ohubitira mu mbabaasi ch'omuundu mulala Yesu Kristo siba sichia ohuhirira elalira.

¹⁶ Haandi yiluwo engabuhana akatikaati w'esiyaanwa sya Nasaae neende esyonoono sy'omuundu mulala. Luunyuma lw'esyonoono silala, weechao ohuheenga omusaango, “Omusaango kubahira”; nae luunyuma lw'ebyonoono biingi muno, yiichao esiyaanwa si hwali nihutahoyera siti, “Babula omusaango!”

¹⁷ Syadyeeri siti, ohubitira mu syonoono sy'omuundu mulala, ohufwa hwachaaka ohutuka abaandu. Nae esitula mu siholwa sy'omuundu mulala Yesu Kristo sihirira elalira! Mani abo boosi abanyoola embabaasi cha Nasaae nyiingi muno, mani baaholwa ohuba abaluungifu neende Nasaae, bachia ohutuka mu bulamu ohubitira mu muundu mulala Yesu Kristo.

¹⁸ Mani sakira, koti lu syonoono silala syadiisa abaandu boosi omusaango, mu ngeri nasilala eyo, esiholwa siluungifu silehuula abaandu boosi, mani syaababeresa obulamu.

¹⁹ Haandi koti lu obutawulira bw'omuundu mulala bwaleetera abaandu baangi muno ohuba abahola-mbi, mu ngeri nasilala niyo yi huwulira hw'omuundu mulala huchia ohukera abaandu baangi muno babe abaluungifu neende Nasaae.

²⁰ Elako nilyeecha, lyameeda abaandu ohwonoona; nae koti lu syonoono syemeeda, nilwo lwosi lu mbabaasi cha Nasaae chosi chemeeda ohuhirira elalira.

²¹ Mani sakira, koti esyonoono syatuka omuundu ohubitira mu hufwa, nilwo nasilala lu mbabaasi cha Nasaae chituka ohubitira mu buluungifu, nichituyira mu bulamu butaakama ohubitira mu Yesu Kristo Omwaami weefwe.