Abarooma 4 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Esyohuboneraho sya Abburahamu.

¹ Bulaanu hunaboole siina hu Abburahamu kuuka yeefwe mu mubiri? Obulamu bwae bwali butye mu moni wa Nasaae?

² Abburahamu aba niyali omuluungifu mu moni wa Nasaae ohweema hu biindu bi yahola, yahanyalire ohuba neende ohwefumia omweene, nae haba saanyala ohwefumia mu moni wa Nasaae.

³ Ebyandiiko byoolerefu biboola biti, “Abburahamu yafukiirira mu Nasaae, mani ohweema hu fukiirira yae, Nasaae yaamubala ohuba omuluungifu.”

⁴ Omuundu ohalaabanira omusaara, omusaara kwae okwo haba sikuyirwaanga koti esiyaanwa; nae kuba ku muundu ahalaabaniire.

⁵ Nae omuundu oteesika ebiholwa byae, mani yaafukiirira Nasaae oyo ohola mbi, ohuba abaluungifu, ohufukiirira hwae hubalwa koti ohuluungifu ataali ebiholwa byae.

⁶ Sino nisyo si Daudi yesi yeekesa n'alomaloma hu habi y'omuundu yi Nasaae abala ohuba omuluungifu, ataali ohweema hu biindu bi muundu ahola:

⁷ “Bali neende ehabi abo ba bibi byaabwe byaleherwamo, ba bibi byaabwe bimalwao!

⁸ Ali neende ehabi omuundu oyo yi Omwaami abala ati abulaho ebyonoono daawe!”

⁹ Bulaanu ehabi yino yi Daudi yalomalomaho y'abaandu bahebwa boong'ene? Haba kata! Ehabi eyo y'abaandu batahebwa bosi. Olwohuba huboolere huti ebyandiiko byoolerefu biboola biti, “Abburahamu yafukiirira mu Nasaae, mani ohweema hu fukiirira yae, Nasaae yaamubala ohuba omuundu muluungifu.”

¹⁰ Nae sino simubalirwa sitye? Sino syeehola Abburahamu n'asisiiri ohuhebwa, kose n'amalire ohuhebwa? Sino syehola n'asisiiri ohuhebwa, ataali n'amalire ohuhebwa.

¹¹ Abburahamu yahebwa luunyuma, mani ohuhebwa hwae hwaaba ahalolero heekesa efukiirira yi yali nayo n'asisiiri ohuhebwa, sakira Nasaae yamubala ohuba omuundu muluungifu. Esyo nisyo esikera Abburahamu yaaba kuuka womu mwooyo waabo abafukiirira Nasaae, ba Nasaae abala ohuba abaluungifu kata bahaba nibatahebwa.

¹² Abburahamu yesi niye laatang'ene baandu bahebwa bosi, esyeekesa siti, ohumeeda hu huhebwa, abo bosi abali neende efukiirira yiri koti yi Abburahamu yali nayo n'asisiiri ohuhebwa.

Esisuubise sya Nasaae sinyolehana ohubitira mu fukiirira

¹³ Nasaae niyasuubisa Abburahamu neende abeechuhulu bae ati, esyaalo sichia ohuba esyae, haba siyahola atyo olwohuba Abburahamu yooseresa amalako ka Musa, nae olwohuba Abburahamu yafukiirira mani Nasaae yamubala ohuba omuundu muluungifu.

¹⁴ Nae nikali mbwe abo abooseresa amalako ka Musa boong'ene nibo abachia ohunyoola esyo si Nasaae yasuubisa, esyo siba syeekesa siti, omuundu oli neende efukiirira abula obuhoonyi, haandi esisuubise sya Nasaae syosi sibula obuhoonyi.

¹⁵ Elako lileeta etima lya Nasaae; nae yi lako litaali, ao abulao ohuhalaka amalako.

¹⁶ Mani sakira esisuubise esyo syeema hu fukiirira, hu sisuubise sinyale ohwomiisibwa hu mbabaasi koti esiyaanwa sya Nasaae syebihaya eyiri abeechuhulu ba Abburahamu boosi, ataali eyiri abooseresa amalako ka Musa boong'ene, nae eyiri abo abafukiirira koti lu Abburahamu hale yafukiirira. Olwohuba Abburahamu niye laata yeefwe womu mwooyo weefwe fweesi;

¹⁷ koti lu byandiiko byoolerefu biboola biti, “Ndahuhola laatang'ene baandu boosi.” Mani esisuubise esyo silai mu moni wa Nasaae yi Abburahamu yafukiiriramo; Nasaae oyo osyuuhisa abafu baaba abalamu, haandi yi hulagira hwae hutaao esiindu sitaaliwo mani syabaao.

¹⁸ Abburahamu yafukiirira haandi yaasuubira, kata neende niyitaaliwo esifune sy'ohusuubira, mani sakira yeehola “laatang'ene abaandu boosi.” Koti lu byandiiko byoolerefu biboola biti, “Abeechuhulu bao bachia ohuba abaangi muno koti eng'ining'ini.”

¹⁹ Abburahamu yaba aambi ow'emyaaka emia ndala (100) eky'obuhuluundu; nae efukiirira yae haba siyawaamo amaani niyabaasa hu mubiri kwae okwali koti okwamala ohufwa, oba niyabona ati Saara yali n'atanyala ohunyoola omwaana ohweema hu myaaka kyae.

²⁰ Abburahamu haba siyaakama ohufukiirira, haandi haba siyakanakanaho hu sisuubise sya Nasaae daawe; efukiirira yae yamwiichusa amaani mani yaafumia Nasaae.

²¹ Abburahamu yali yamaliirira ati bi Nasaae yasuubisa achia ohubyooseresa.

²² Mani sakira, hulw'efukiirira ya Abburahamu, esyo nisyo esyakera “Nasaae yaabala Abburahamu ohuba omuundu muluungifu”.

²³ Emboosi chiboola chiti, “yamubala ohuba omuundu muluungifu” haba sichaandiikwa hulwa Abburahamu yeeng'ene.

²⁴ Chaandiikwa hulweefwe fwesi abachia ohubalwa ohuba abaandu baluungifu, efwe abafukiirira mu oyo owasyuuhisa Yesu Omwaami weefwe ohutula mu bafu.

²⁵ Ebyonoono byeefwe nibyo ebyakera Yesu yaayaanwayo afwe, mani yasyuuhiswa hwaanyale ohutuhola abaluungifu neende Nasaae.