Abarooma 3 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ Siluwo esiindu syoosi si Bayudaaya bahirira Abateende? Oba mahuluundu siina akali mu huhebwa?

² Ohuhira ohwo ahira muno mu buli ngeri choosi! Muhuchaaka hweene, Nasaae yadiisa Abayudaaya emboosi yae.

³ Nae lwasiina abaandi hu abo haba sibeesikwa daawe? Obuteesikwa bwaabwe bumalao obweesikwa bwa Nasaae?

⁴ Haba daawe, esyo haba sisinyalihana kata nabudiidi! Nasaae ahoyere ohuba owadyeeri kata neende buli muundu yaahaba omubacha. Koti lu byandiiko byoolerefu biboola biti, “Ohoyere weyekese ohuba omuluungifu mu nomanoma yao; ohoyere ohuhira omusaango kwao n'oyaaswa.”

⁵ Nae ohuhola bubi hweefwe nihuba nihweekesera elalira bweene obwadyeeri bwa Nasaae, hunyala hwaboola huti Nasaae ahola bubi n'atusaandya? (Sino nisyo esiteebo sihoyeerwe ohuteebwa koti omuundu.)

⁶ Haba sisinyalihana kata nabudiidi! Nasaae nataali owadyeeri, yahanyala atye ohuheengera esyaalo omusaango?

⁷ Nae obubacha bwaange nibwemeeda ohweekesa koti lu Nasaae ali ow'obwadyeeri, mani yaabereswa oluyaali, lwasiina mba nisiheengerwa omusaango ohuuhira koti omuhola-mbi?

⁸ Lwasiina sihuboola huti, “Lehe hwonoone, hu silai sinyale ohutulamo”? Mubwadyeeri bweene abaandu baandi bamala ohuunyeka nibaafunaana bati ndaboola esiindu sino! Bahaheengerwe omusaango ohubahira koti lu bahoyera.

Abulao omuundu muluungifu.

⁹ Mani efwe Abayudaaya huliho neende engeri yoosi yi huhiriramo Abateende obulai? Haba daawe, kata nabudiidi! Malire ohweekesa endi Abayudaaya neende Abateende boosi nasilala bali mu bunyala bw'esyonoono.

¹⁰ Koti lu ebyandiiko byoolerefu biboola biti: “Abulao omuundu muluungifu kata mulala,

¹¹ abulao omuundu mukesi oba owiinamira Nasaae.

¹² Boosi batula hu Nasaae; boosi badoondobana; boosi alala abulao ohola esiluungifu, kata mulala yeeng'ene.

¹³ Emboosi chaabwe cheechula obubacha bw'ohufwa; enimi chaabwe chihulukusa obubacha bubi, eminwa kyaabwe kitulamo ohutiisa-tiisa hubi ohuli koti obusiba bw'enjuha;

¹⁴ enomanoma yaabwe yeechula ebichubo bilulu byoong'ene.

¹⁵ Baangu muno ohunyaala neende ohwiita;

¹⁶ buli yi bachiira balehayo ohunyaasa neende ohusihirisa.

¹⁷ Haba sibamanyireho engira yileeta omuleembe,

¹⁸ kata sibadeeba hu hwiisa oluyaali mu Nasaae.”

¹⁹ Bulaanu humanyire huti ebyo byoosi ebiri mu malako ka Musa bidiira hu abo abatukwa neende amalako ako, hu muundu abuleo owewosaho mani yaakayira Nasaae ohuheengera esyaalo syoosi omusaango.

²⁰ Olwohuba abulao omuundu yeesi oli omuluungifu mu moni wa Nasaae hulw'ohwooseresa bi malako ka Musa kadaha; bi malako kahola nibyo ohubonesa abaandu koti abahola-mbi.

Engeri yi huholelwa abaluungifu neende Nasaae

²¹ Nae bulaanu engeri yi Nasaae aholeramo abaandu ohuba abaluungifu alala nae yamala ohumanyihana. Engeri yino haba siyiloondakana neende amalako ka Musa daawe, kata syahaba siti amalako ka Musa neende abanabbi byatusa obuloli buyidiiraho.

²² Olwohuba Nasaae ahola abaandu ohuba abaluungifu ohubitira mu fukiirira yaabwe mu Yesu Kristo. Nasaae aholaanga sino eyiri abo boosi abafukiirira mu Kristo, olwohuba yibulao engabuhana yoosi:

²³ olwohuba abaandu boosi bamala ohwonoona, mani bali eyale muno neende oluyaali lwa Nasaae.

²⁴ Nae ohubitira mu siyaanwa sy'embabaasi cha Nasaae sihwabereswa buhaya, abaandu boosi baholwa abaluungifu neende Nasaae ohubitira mu Kristo Yesu, obanunula mu byonoono byaabwe.

²⁵ Kristo Yesu niye yi Nasaae yataao ohuba esiyaanwa simalao esyonoono ohubitira mu hufwa hwae, eyiri abo boosi abamufukiiriramo. Nasaae yahola atyo ohweekesa obuluungifu bwae, olwohuba hale, mu hwesimiirisa hwae koti Nasaae, haba siyadeebaanga hu byonoono byaabwe.

²⁶ Nae mu biha bya bulaanu, yehaliirisa ebyonoono byaabwe, mani hwaanyale ohweekesa obuluungifu bwae. Mu ngeri yino Nasaae yeyekesa omweene koti lwali omuluungifu haandi koti lwahola buli muundu yeesi ofukiirira mu Kristo yaaba omuluungifu.

²⁷ Mani bulaanu siindu siina esinyala syaakera hwefumia? Sibulao daawe! Haandi siina syeene esikera byaaba bityo? Mani siriho mu hwooseresa hweefwe hw'amalako ka Musa? Haba daawe, nae olwohuba mbwe huli neende efukiirira.

²⁸ Mani humaliirisa nihuboola huti, omuundu aholwa yaaba omuluungifu neende Nasaae ohubitira muhufukiirira hwoong'ene, nae ataali mu hwooseresa bi malako ka Musa kadaha.

²⁹ Kose huboole huti Nasaae wuno ali Nasaae w'Abayudaaya boong'ene? Haba saali Nasaae w'Abateende bosi? Ngandi ali Nasaae waabwe.

³⁰ Nasaae ali mulala yeeng'ene, mani achia ohuhola Abayudaaya ohuba abaluungifu alala nae ohweema hu fukiirira yaabwe, haandi achia ohuhola Abateende ohuba abaluungifu ohubitira mu fukiirira yaabwe.

³¹ Nae sino syeekesa siti hulehane neende amalako ka Musa hulw'efukiirira yino? Haba daawe! Ohumalaho efwe hwomiise amalako koosi.