Abarooma 2 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Nasaae aheengera abaandu boosi omusaango

¹ Mani wasyaange, ewe oheengera abaasyo omusaango, kata obe wiina, obula esy'ohwediisa daawe. Olwohuba n'oheengera abaasyo omusaango, nae ohola ebiindu nasilala koti bi bahola, oba omweene oli ohweheengera omusaango.

² Efwe humanyire huti, Nasaae wadyeeri naaheengera omusaango abaandu bahola ebiindu bifwaana biti.

³ Nae ewe wasyaange, oheengera abaasyo omusaango ohubahira, nae ewe wesi ohola ebiindu nasilala ebyo, obaasa oti ochia ohwebalula eheenga y'omusaango ya Nasaae?

⁴ Kose awuundi oli ohulekeeresa esisa syae siingi, neende ohudiira kaala, alala neende ohwesimiirisa hwae. Mubwadyeeri, omanyire oti Nasaae w'esisa, olwohuba ateemaho ohubona ati weyolobya.

⁵ Nae ewe oli neende omwooyo mwoomeranu haandi okutawulira, mani sakira omweene oli ohweleetera ohusaandisibwa huhirao hu ludaalo lu tima lya Nasaae neende eheenga yae nuungifu yicha ohweyekeseraho.

⁶ Olwohuba Nasaae achia ohuberesa buli muundu omukabo ohweema hu buli siindu si yahola.

⁷ Abaandu baandi bomiirira ohuhola ebiindu bilai, haandi bakoonya oluyaali neende efuma, neende obulamu butaakama; abo Nasaae yahababerese obulamu butaakama.

⁸ Nae abaandu baandi beemani haandi bahaya obwadyeeri, mani baloondakana neende obutaali obwadyeeri; abo Nasaae achia ohubanyoolerera haandi abaalabire.

⁹ Abonooni boosi bachia ohusaandisibwa haandi bachuunisibwe, ohuchaaka neende Abayudaaya ohwoolera elalira hu Abagiriki bosi.

¹⁰ Nae abo boosi abahola ebilai, Nasaae achia ohubaberesa oluyaali, efuma, neende omuleembe, ohuchaaka neende Abayudaaya, ohwoolera elalira hu Abagiriki bosi.

¹¹ Olwohuba Nasaae saakwiiraanga omuundu yeesi n'aheenga omusaango.

¹² Abateende haba sibali neende amalako ka Musa; bonoona baakota ataali ohuloondakana neende amalako ka Musa. Nae Abayudaaya bali neende amalako ka Musa; bonoona, baaheengerwa omusaango neende amalako ka Musa.

¹³ Olwohuba ohuba omuluungifu alala neende Nasaae haba sisitula hu baandu ohuwulira amalako ka Musa nae bitula hu baandu ohuhola bi malako ka Musa kadaha.

¹⁴ Abateende haba sibali neende amalako ka Musa; nae buli siha si bahola bi malako ka Musa kadaha ohweema hu hudaha hw'emyooyo kyaabwe kyeene, baba beeholere amalako kaabwe abeene akabatuka, kata neende nibabula amalako ka Musa.

¹⁵ Ebiima byaabwe, byeekesa biti, bi malako ka Musa kadaha, byandiikwa mu myooyo kyaabwe. Ebibaaso by'emyooyo kyaabwe, byeekesa biti, sino syadyeeri, olwohuba ebibaaso byaabwe, ebiha biindi bibawabira, haandi ebiha biindi bibakwiira.

¹⁶ Nae ohweema hu Mboosi Ndai yi njaala, nilwo lu sino sichia ohuba hu ludaalo lu Nasaae ohubitira mu Yesu Kristo achia ohuheengera omusaango eby'engiso by'ebibaaso by'abaandu boosi.

Abayudaaya neende Amalako.

¹⁷ Nae bulaanu niwelaanga Omuyudaaya; oweesika amalako haandi oweefumisira mu Nasaae;

¹⁸ omanyire bulai bweene bi Nasaae adaha, olwohuba weekeswa amalako, n'obaasa esiindu sihira obulai.

¹⁹ Weyira koti niiwe omweemeresi w'abawofu, ohosera abo abali mu siirima,

²⁰ omweekesa w'abaandu bataali neende amakesi, haandi omweekesa w'abaandu bataamanyire. Omanyire bulai oti mu malako onyoolamo amakesi koosi neende obwadyeeri.

²¹ Nae omweekesa w'abaandi, lwasiina haba siweyekesaho omweene? Oyaala oti, “Oteebanga” nae ewe omweene wiiba.

²² Oboola oti, “Otayiranaanga” nae ewe omweene oyirana. Wekaana ebiloongaloongwe, nae ewe wiiba mu masabo.

²³ Wefumisira mu malako ka Nasaae, nae omala oluyaali mu Nasaae n'ohalaka amalako kae.

²⁴ Ebyandiiko byoolerefu biboola biti, “Eng'we Abayudaaya niing'we abakera Abateende nibalomaloma bubi hu Nasaae.”

²⁵ Nimuloondakana neende amalako ka Musa, ao ohuhebwa hweeng'we huba hulimo amahuluundu; nae nimutaloondakana neende amalako ka Musa, byahahiriire elalira mwadoong'a nimutaheberwe.

²⁶ Omuteende otahebwa n'aliinda amalako ka Musa, mubaasa muti, Nasaae haba saachia humuyira koti owahebwa?

²⁷ Mani sakira eng'we Abayudaaya, Abateende bachia ohubaheengera omusaango kubahire, olwohuba muhalaka amalako ka Musa, kata mwahaba nimuli nako mu bwandiike, haandi mwahebwa; nae Abateende baloondakana neende amalako ka Musa, kata bahaba nibatahebwa neende ohuhebwa hw'omubiri.

²⁸ Nae bulaanu, Omuyudaaya mweene, owaheberwa elalira, niye oli atye? Oyo haba siniye Omuyudaaya w'ohumukulu, owahebwa neende ohuhebwa hw'omubiri hwoong'ene.

²⁹ Ohumalaho oyo Omuyudaaya mweene, niye omuundu Muyudaaya ow'omukati, haandi owahebwa neende ohuhebwa hwadyeeri, niye oyo yi mwooyo kwae kwahebwa, mani kuno mulimo kwa Mwooyo wa Nasaae, ataali okw'amalako kaandiikwa. Omuundu ofwaana ati, anyoola efuma ohutula eyiri Nasaae ataali ohutula hu baandu.