Abarooma 16 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Amaheeso eyiri sya mulala-mulala

¹ Mbadahisa Fiibbi mboocho yeefwe, ohalaabanira mu bafukiiriri bamenya Kekerea.

² Mumwaakaanire mu liita ly'Omwaami, koti abaandu ba Nasaae bahoyere, haandi mumuberese obuhoonyi bwoosi bw'adaha ohutula yi muli; olwohuba omweene yesi yahahoonya abaandu baangi muno syesi ni ndi mulala hu nibo.

³ Nduma amaheeso kaange eyiri Purisiila neende Akwiila, abahalaabani basyaange mu Kristo Yesu;

⁴ abayaanayo obulamu bwaabwe hulwaange. Mbasiima muno haandi haba siniise syeeng'ene obeebasa, nae omukaanda kw'abafukiiriri Bateende kwoosi kubeebasa.

⁵ Haandi nduma amaheeso kaange eyiri omukaanda kw'abafukiiriri okwebuusiraanga mu nyuumba yaabwe. Nduma amaheeso kaange eyiri omwiicha waange Epaineto, oyo niye owataangira mu situundu sya Asia ohufukiirira mu Kristo.

⁶ Nduma amaheeso eyiri Maria, owabahaalabanira muno.

⁷ Haandi nduma amaheeso eyiri Andironiko neende Yunia; Abayudaaya basyaange abali mu jeela naange; bamanyihaane muno eyiri abatume, haandi beehola abafukiiriri ese nisisiiri.

⁸ Nduma amaheeso kaange eyiri Amupiliato, omwiicha waange muno mu Omwaami.

⁹ Haandi heesa Wuribbano, omuhalaabani wasyeefwe mu mulimo kwa Kristo, neende Sitaaki, omwiicha waange mukoosi.

¹⁰ Amaheeso eyiri Apele, yi buwulisi bwae mu Kristo bumanyihaane bulai. Amaheeso eyiri abo ab'edaala lya Arisitobbulo.

¹¹ Amaheeso eyiri Herodioni, Omuyudaaya wasyaange, haandi eyiri abafukiiriri bomu daala lya Narikiso.

¹² Amaheeso kaange eyiri Turufena neende Turufoosa, abahalaabana mu mulimo kw'Omwaami, haandi eyiri Perisi, omwiicha waange muno, owahalaabanira muno Omwaami.

¹³ Nduma amaheeso eyiri Rufusi, omuhalaabani omanyihaane mu mulimo kw'Omwaami, haandi eyiri ng'ina, ebiha byoosi owaanjira koti omwaana wae.

¹⁴ Amaheeso kaange eyiri Asikuriito, Filegooni, Herume, Patiroobba, Herima, neende abafukiiriri baandi boosi ba bali nabo.

¹⁵ Amaheeso eyiri, Filoloogo neende Julia, eyiri Nereyo neende mboochoong'ene, eyiri Olipa neende eyiri aboolerefu boosi ba bali nabo.

¹⁶ Heesanie mu ngeri yeekesa ohuheerana hw'abeebulanwa. Abafukiiriri ba Kristo boosi babatumira amaheeso kaabwe.

Amakerako kamaliiriha

¹⁷ Basyaange mbekweeda endi: mweliindeenge abo abaleeta ohukabuhana neende abanyaasa efukiirira y'abaandu, haandi abacha nibalwaania enjekesa yi mwanyoola. Mutabesudyaangaho!

¹⁸ Olwohuba abaandu bahola ebiindu bifwaana bityo, haba sibahalaabanira Kristo Omwaami weefwe, nae bahalaabanira enda chaabwe abeene. Beehoonyera emboosi ndai neende ohwefumia, mani baabachirisa abaandu bataaliho omusaango.

¹⁹ Buli muundu yamala ohuwulira obuwulisi bweeng'we eyiri Emboosi Ndai, mani hulwasino ndi omusangaafu muno hulweeng'we.

²⁰ Nasaae otuberesa omuleembe achia ohunyooba bwaangu muno Sitaani mu makulu keeng'we. Embabaasi ch'Omwaami weefwe Yesu chibe naang'we.

²¹ Timoteo, omuhalaabani wasyaange abatumira amaheeso; haandi Lusio, Yasooni, neende Sosipateeri.

²² Ese Taasio, owahoonya Paulo ohwandiika ebbarwa yino, mbaheesa mu liita ly'Omwaami weefwe.

²³ Gaayo owaniinda, omweene daala li bafukiiriri bebuusiraangamo yesi abaheesa; Erasito, omubiihi w'esiko, neende owasyeefwe Kwaruto babaheesa. Ehabi ch'Omwaami weefwe Yesu Kristo chibe naang'we. Amiina.

²⁴ Leha embabaasi ch'Omwaami weefwe Yesu Kristo chibe naang'we mweesi. Amiina.

Esaala yimaliirihayo y'ohufumia Nasaae

²⁵ Lehe hufumie Nasaae! Onyala ohukera mwomiirira mu fukiirira yeeng'we, ohweema hu Mboosi Ndai yi ndabayaalira eyidiira hu Yesu Kristo neende ohweema hu humanyihana hw'esyaama sy'obwadyeeri esyali syakiswa emyaaka miingi ekyabitao.

²⁶ Nae bulaanu, obwadyeeri obwo bwamala ohumanyihana alafu ohubitira mu byandiiko by'abanabbi; neende ohulagira hwa Nasaae otaakama, esyaama esyo syamanyihana eyiri ebyaalo byoosi, hu baandu banyale ohufukiirira haandi ohuwulira.

²⁷ Lehe Nasaae mulala, yeeng'ene omanyire ebiindu byoosi, abereswe oluyaali ohubitira mu Yesu Kristo endaalo choosi! Amiina.