Abarooma 15 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ohusangaasa abaandi

¹ Efwe ab'amaani mu fukiirira huhoyere ohuhoonya abakata ohukiinga emigugu kyaabwe. Haba sihuhoyere ohwesangaasa abeene.

² Ohutusaho, huhoyere ohusangaasa abafukiiriri baandi hulw'obulai bwaabwe abeene, hu hunyale ohuboombaha mu fukiirira.

³ Olwohuba Kristo haba siyesangaasaho omweene. Ohutusaho, koti byandiiko byoolerefu biboola biti, “Amanyeko ka hunyekwa, kakwa hweese.”

⁴ Buli siindu syoosi esyandiikwa mu byandiiko byoolerefu, syandiikwa ohutweekesa, hu hunyale ohunyoola esuubi ohubitira mu hweesimiirisa neende ohuguma emyooyo koti lu byandiiko byoolerefu bituberesa.

⁵ Mani lehe Nasaae, yi hweesimiirisa neende ohulemya emyooyo bitulaho, ababerese amaani munyale ohuba neende ebibaaso nasilala nimuloondakana neende esyohuboneraho sya Kristo Yesu,

⁶ haandi hweeng'we mweesi alala munyale ohufumia neende ekono lala Nasaae haandi Laatang'ene Omwaami weefwe, Yesu Kristo.

Emboosi Ndai eyiri Abateende.

⁷ Sakira mwaakananireenge abeene-na-beene, koti lu Kristo yabaakaanira hulw'oluyaali lwa Nasaae.

⁸ Olwohuba mbaboolera endi, obulamu bwa Kristo bw'ohuhalaabana eyiri Abayudaaya, bwali obw'ohweekesa buti Nasaae mweesikwa niye, hwaanyale ohwooseresa abweene ebisuubise bi yasuubisa bakuuka yaabwe.

⁹ Haandi yahola atyo, hu Abateende banyale ohuberesa Nasaae oluyaali hulw'esisa syae. Koti lu byandiiko byoolerefu biboola biti, “Sakira njia ohuhufumia mu Bateende; njia ohuhweembera niihufumia.”

¹⁰ Haandi biboola biti, “Eng'we Abateende musaangaale neende abaandu ba Nasaae!”

¹¹ Haandi biboola biti, “Eng'we Abateende mweesi mufumie Omwaami; abaandu boosi mumufumie!”

¹² Haandi omunabbi Yisaaya yesi aboola ati, “Omwichuhulu wa Yese achia ohwiicha; achia ohwiicha ohutuka Abateende, mani achia ohuba esuubi lyaabwe.”

¹³ Lehe Nasaae yi suubi litulamo, abechuse neende esangaalo lyoosi neende omuleembe ohubitira mu humufukiiriramo hweeng'we, hu suubi lyeeng'we linyale ohwemeeda ohuhula hulw'amaani ka Mwooyo Mwoolerefu.

Esyakera Paulo niyandiika neende obwomiifu bwoosi

¹⁴ Basyaange: ese syesi manyire bulai bweene endi, mwechulamo ebiima bilai, muli neende amakesi kamala koosi, haandi endi munyala ohukerakanira abeene-na-beene.

¹⁵ Nae mu bbarwa yino, nyandiikire neende obwomiifu bwoosi ebidiira hu biindu biindi bi mbechuliise. Mbeere neende obwomiifu ohweema hu mbabaasi chi Nasaae yaamberesa

¹⁶ ey'ohuba omuhalaabani wa Kristo Yesu ohuholera Abateende. Halaabana koti omulaamisi ninjaala Emboosi Ndai eyitula eyiri Nasaae hu Abateende banyale ohuba esiyaanwa sifukiirirwa eyiri Nasaae, esimubeereswa neende Mwooyo Mwoolerefu.

¹⁷ Mani alala neende Kristo Yesu, nyala ohuba neende esichiiririrwa sy'ohwefumia mu mulimo kwaange eyiri Nasaae.

¹⁸ Njia ohuba omwomiifu, mani nomanome hu bi Kristo yahola ohuumbitiramo byoong'ene ohukera Abateende bawulire Nasaae. Yahola sino ohubitira mu mboosi neende ebihole,

¹⁹ ohubitira mu maani k'eby'amayia neende ebiwuukisa, haandi neende ohubitira mu maani ka Mwooyo wa Nasaae. Mani sakira mu hukeenda hwaange hwoosi ohutula elalira Yerusalemu ohwoola Yilirikomu, ndayaalira elalira mu bwiichufu Emboosi Ndai yidiira hu Kristo.

²⁰ Esiindu si ndekoombaanga buli ludaalo syali ohuyaala Emboosi Ndai mu bituundu bitawuliraho ebidiira hu Kristo, hu haye ohwoombaha hu musiingi ku muundu wuundi yachaakisa.

²¹ Koti lu ebyandiiko byoolerefu biboola biti, “Abo abali nibataboolerwaho ebimudiiraho, bachia ohubona, haandi abo abatawuliraho bachia ohumanya.”

Endekeha ya Paulo ohukeniya Rooma.

²² Ohuyaala Emboosi Ndai mu bituundu bitawuliraho hu Kristo nisyo esyaangayira amahabi maangi ohwiicha yi muli.

²³ Nae bulamu koti lu malire omulimo kwaange mu bituundu ebyo, haandi koti lu mbeere nindekoombaanga emyaaka miingi ohwiicha ohubabona,

²⁴ bulaanu buti suubira ohwiicha ohubabona. Ndaha ohubabona ni ndi hu lukeendo lwaange lw'ohuchia mu Sipeini. Nimalire ohusangaalira alala naang'we, ndaha muhoonye engeri y'ohwoola Sipeini.

²⁵ Nae bulaanu buti ndi ohuchia Yerusalemu ohuhalaabanira abaandu ba Nasaae bali eyo.

²⁶ Olwohuba abafukiiriri bali mu Makedonia, neende ab'e Akaya, baheengereo abeene ohuhoonya abamanani bali mu baandu ba Nasaae abali mu Yerusalemu.

²⁷ Abeene baheengao ohuhola batyo; nae mubwadyeeri bweene, bali neende omulimo kw'ohubahoonya. Olwohuba Abayudaaya bakabana ehabi chaabwe chomu mwooyo neende Abateende, Abateende bosi bahoyere ohwehoonyera ehabi chaabwe echoby'omubiri ohuhoonya Abayudaaya.

²⁸ Mani niimba niimalire omulimo kuno, haandi niimalire ohubayirira eseende choosi chi ndababuusira, ao niwo yi njia ohubakeniyira nindiirire olukeendo lwaange luchia Sipeini.

²⁹ Niinjicha yi muli, manyire endi, njia ohwiicha neende ehabi cha Kristo mu bwiichufu.

³⁰ Basyaange mbekweeda hulw'Omwaami weefwe Yesu Kristo neende hulw'obuheeri bwa Mwooyo Mwoolerefu: mundeyambaanieho mu huusabira neende amaani koosi eyiri Nasaae.

³¹ Muusabire muti, abaandu babula efukiirira abali mu Yudea bahaye ohuuholaho esibi, haandi muti abaandu ba Nasaae bali mu Yerusalemu, banyale ohufukiirira ohuhalaabana hwaange.

³² Mani sakira, nihuli ohudaha hwa Nasaae, njia ohwiicha yi muli ninjichuule esangaalo, mani olukeendo mbuluuheho ni ndi alala naang'we.

³³ Lehe Nasaae yi muleembe kwoosi kutulaho abe naang'we mweesi. Amiina.