Abarooma 11 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Esisa sya Nasaae eyiri Abaisiraeli.

¹ Bulaanu ndeeba endi: Nasaae yahaya abaandu bae beene? Mubwadyeeri bweene haba daawe! Ese mweene ndi Omuisiraeli, omwichuhulu w'Abburahamu, mulala hu b'enono ya Bbenjamini.

² Nasaae haba siyahaya abaandu bae, ba yadoola ohutula muhuchaaka. Mumanyire bi byandiiko byoolerefu biboola mu situundu si Elija yekweederamo Nasaae hulw'Abaisiraeli ati:

³ “Omwaami, beetere abanabbi bao, haandi bagemule alutaari chao; Niise syeeng'ene odoong'ere, haandi bangiiya ohunjiita syesi.”

⁴ Nasaae yamukobolamo atye? Yamukobolamo ati, “Ndamala ohwebiihira abaandu boola aambi elifu chitaanu-na-chibiri (7,000) abatenamiraho nasaae otaali owadyeeri, olaangwa, Bbaali.”

⁵ Sakira ohwoola bulaanu buti mu engeri nasilala eyo: basiidoong'ereo abaandu badiidi mu baandu ba Nasaae yedooleramo hulw'embabaasi chae.

⁶ Ohudoola hwae hweema hu sisa syae, ataali ohweema hu biindu bilai bi muundu ahola, olwohuba biba byeema hu bilai bi muundu ahola, embabaasi chae echo haba sichahabeere echadyeeri.

⁷ Bulaanu siina syeene? Abaandu Baisiraeli haba sibanyoola esiindu si baaba nibakoonya. Kwali omukaanda mudiidi sa, ku Nasaae yadoola okwanyala ohusinyoola; abaandi nabo beehola abadiimbe eyiri omulaanga kwa Nasaae.

⁸ Koti lu byandiiko byoolerefu biboola biti, “Nasaae yasiruwasa emyooyo kyaabwe neende ebibaaso byaabwe; ohwoolera elalira hu ludaalo luno lweene, haba sibanyala hubona oba ohuwulira.”

⁹ Haandi Daudi yaboola ati, “Ebidyaalo byaabwe bihoya byeehola emiteego kibateka, kyaabadiira; bahoya baakwa, bahoya basaandisibwa!

¹⁰ Emoni chaabwe chihoya chawofula, baahaya ohubona; haandi bahoye bewunamire mu bidinyu byaabwe ebiha byoosi.”

¹¹ Sakira ndeeba endi: Abayudaaya nibeegumula baakwa basihirira elalira? Haba daawe! Hulw'ohwonoona hwaabwe, obuwonia bwiichire eyiri Abateende, ohukera Abayudaaya badiirire Abateende ebihali-hali.

¹² Ebyonoono by'Abayudaaya byaleetera esyaalo syoosi esisa siingi haandi ohukwa hwaabwe, hwaleetera Abateende esisa siingi. Mani bulaanu esisa syae syahaake yeena obuungi Abayudaaya boosi nibahabalirwemo!

Obuwonia bw'Abateende.

¹³ Bulaanu nomanoma neende eng'we Abateende: nisisiiri omutume w'Abateende, njia ohweekinisira mu mulimo kwaange.

¹⁴ Awuundi nyala ohukera abaandu b'enono yaange ohuba neende ebihali-hali, hu nyale ohuwoniahoomo abaandi.

¹⁵ Olwohuba nibasukunwa erwaanyi, abaandu baandi boosi bakaluuhanisibwa baahaya ohuba abasuku ba Nasaae beehola abeecha bae. Syahabe sitye nibafukiriirwe? Bwahabe obulamu eyiri abafwa!

¹⁶ Bulaanu esituundu sy'omugaati sitaangira nisibeereswa Nasaae, esyo syeekesa siti omugaati kwoosi kwae kwosi; haandi emisi ky'omusaala nikibeereswa Nasaae, amasaga kae kosi.

¹⁷ Amasaga kaandi ak'omuseituuni kwataakwa nikahalakwaho, esaga ly'omuseituuni kwomu siino lyamala lyeyambaaniaho. Eng'we Abateende muli koti omuseituuni kwomu siino okwo, mani bulaanu mukabana hu bulamu bw'omwooyo buungi bw'Abayudaaya.

¹⁸ Mani sakira, simuhoyere ohulekeeresa abo abahalakwaho koti amasaga. Munyala mutye ohwewulira? Muli esaga; haba sineeng'we abasiira emisi, nae emisi nikyo ekibasiira.

¹⁹ Nae eng'we muchia ohuboola muti, “Eee, nae amasaga kaandi kahalakwaho hu katwiikulire obweyaango.”

²⁰ Esyo syadyeeri. Kahalakwaho olwohuba sikali nikafukiirira, nae eng'we mudoong'a mu bweyaango obwo olwohuba mufukiirira. Nae esyo sitakera mwefumia; ohutusaho, mube abatiiririrwa.

²¹ Nasaae otasaasira Abayudaaya, abali koti amasaga keene; mubaasa muti neeng'we baachia ohusaasira sa?

²² Ano hubona koti lu Nasaae ali ow'esisa, haandi koti lu ali omwaalaba. Mwaalaba eyiri abo abakwa, nae w'esisa eyiri eng'we nimwemeeda ohuba mu sisa syae. Nae nimuhaya, mwesi muchia ohuhalakwaho.

²³ Nae Abayudaaya nibalehana neende obutafukiirira bwaabwe, bachia ohukaluswa mu bweyaango bu balimo hale; olwohuba Nasaae ali neende obunyala bw'ohubakalusa.

²⁴ Eng'we Abateende muli koti esaga ly'omuseituuni kwomu siino elyahalakwa mani lyoongwa hu museituuni mutaake, koti lu sitabechaanga. Abayudaaya nabo bali koti omuseituuni kwataakwa kuno; mani sichia ohwanguyira Nasaae muno, ohwambaania amasaga kahalakwaho kano hu musaala kwaako kweene.

Esisa sya Nasaae eyiri abaandu boosi.

²⁵ Basyaange, buliwo obwadyeeri bw'esyaama bu ndaha mumanye, hu muhaye ohubaasa muti muli abakesi. Obwadyeeri obwo buli buti, esyeejo sy'abaandu Baisiraeli haba sisichia hubaao endaalo choosi, nae sichia ohubaao ohwoola lu baandu Abateende boosi bachia ohwiicha eyiri Nasaae.

²⁶ Haandi yino niyo engeri yi Yisiraeli yoosi yichia ohunyooleramo obuwonia. Koti lu byandiiko byoolerefu biboola biti, “Omuwonia achia ohutula mu Siyooni haandi atuse ebyonoono byoosi mu beechuhulu ba Yakobbo.”

²⁷ “Njia ohuhola endagaano yino nabo niimalao ebyonoono byaabwe.”

²⁸ Olwohuba Abayudaaya bahaya Emboosi Ndai, beehola abasuku ba Nasaae hulw'obulai bwa Abateende eng'we. Nae ohweema hu hudoola hwa Nasaae, beecha bae, hulw'obulai bwa bakuuka yaabwe.

²⁹ Olwohuba Nasaae haba saakaluuhania ebibaaso byae bidiira hu muundu yi yadoola, haandi yaaberesa ehabi.

³⁰ Nae eng'we Abateende, mwali mwahaya hale ohuwulira Nasaae; nae bulaanu, mwanyoola esisa sya Nasaae olwohuba Abayudaaya bahaya ohuwulira Nasaae.

³¹ Mu ngeri nasilala eyo, ohweema hu sisa sya Nasaae si mwanyoola, Abayudaaya bulaanu sibawulira Nasaae, hu bulaanu bosi banyale ohunyoola esisa sya Nasaae.

³² Olwohuba Nasaae yahola abaandu boosi ohuba ababoye b'obutawulira, hwaanyale ohukwiira boosi esisa.

Ohufumia Nasaae.

³³ Obuyiinda bwa Nasaae nga buungi muno! Amakesi kae neende ohumanya hwae nga bibitiirifu! Wiina mweene onyala ohutotola eheengao yae? Wiina mweene onyala ohumanya engira chae?

³⁴ Koti lu byandiiko byoolerefu biboola, “Wiina omanyire ebibaaso by'Omwaami? Wiina onyala ohumukerakira?”

³⁵ “Wiina owali niyamubaaho esiindu syoosi, hwaanyale ohuba n'ahoyere ohusituunga?”

³⁶ Olwohuba ebiindu byoosi byaloongwa nae, haandi ebiindu byoosi bibaao ohumubitiramo haandi biriwo hulwae. Nasaae anyoole oluyaali endaalo choosi! Amiina.