Abarooma 10 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ Basyaange, ndekoomba neende omwooyo kwaange kwoosi endi, abaandu baange bosi banyale ohuwonisibwa! Ngambasabira eyiri Nasaae!

² Nyomiisa endi beweerayo elalira ohudaha Nasaae; nae ohweyaanayo hwaabwe haba sihweema hu humanya hwadyeeri.

³ Basisiiri ohumanya engeri yi Nasaae aholeramo abaandu ohuba abaluungifu nae, ohutusaho bateemaho ohutaao engeri yaabwe abeene; mani sibewaayo abeene eyiri engeri yi Nasaae aholeramo abaandu ohuba abaluungifu.

⁴ Olwohuba Kristo yaakamia Amalako, hu buli muundu yeesi ofukiirira anyale ohuholwa ohuba omuluungifu neende Nasaae.

Obuwonia bw'abaandu boosi

⁵ Musa yaandiika hu bidiira ohuholwa ohuba abaluungifu neende Nasaae ohubitira mu hwooseresa amalako ati: “Oyo yeesi owoseresa ebilagiro bya amalako, achia ohuba omulamu.”

⁶ Nae bi byandiiko byoolerefu biboola hu bidiira hu huholebwa ohuba abaluungifu neende Nasaae ohubitira mu fukiirira nibyo bino: “Oteteeba mu mwooyo kwao oti, Wiina mweene oliniina Muukulu?” (Amahuluundu mbwe, ohwiisa Kristo aasi)

⁷ oba oteteeba oti, “Wiina mweene oliiha aasi mu syaalo sy'aasi?” (Amahuluundu mbwe, ohuniinia aakulu Kristo ohutula mu bafu).

⁸ Sino nisyo si byandiiko byoolerefu biboola: “Emboosi ya Nasaae yiri aambi naawe, yiri hu munwa kwao, neende mu mwooyo kwao” eyo niyo, emboosi y'efukiirira yi huli ohuyaala.

⁹ Notuumbula neende omunwa kwao oti Yesu niye Omwaami haandi wafukiirira neende omwooyo kwao, oti Nasaae yamusyuuhisa ohutula mu bafu, ochia ohuwonisibwa.

¹⁰ Olwohuba efukiirira yeefwe niyo eyikera hwaaba abaluungifu neende Nasaae; ohutuumbula hweefwe nihwo ohukera hwawonisibwa.

¹¹ Ebyandiiko byoolerefu biboola biti, “Oyo yeesi omufukiiriramo, haba saachia hudiiswa esoni.”

¹² Sino sidiira hu buli muundu yeesi, olwohuba abulao engabuhana akati w'Abayudaaya neende Abateende; Nasaae mulala niye Omwaami w'abaandu boosi haandi aberesa buli muundu omulaanga ehabi.

¹³ Koti lu byandiiko byoolerefu biboola biti: “Buli muundu yeesi olaanga eliita ly'Omwaami achia ohuwonisibwa.”

¹⁴ Nae banalaange batye omuundu yibatafukiiriramo? Haandi banaafukiirire batye mu muundu yi batawuliraangaho? Haandi banaawulire batye ataali omuundu oyaala?

¹⁵ Haandi abaandu banayaale batye nibataayirirwe? Koti lu byandiiko byoolerefu biboola biti, “Ohwiicha hw'abaandu baleeta emboosi ndai nga hulai!”

¹⁶ Nae abaandu boosi haba sibafukiirira Emboosi Ndai. Omunabbi Yisaaya mweene yesi yaboola ati, “Omwaami, wiina owafukiirira emboosi yeefwe?”

¹⁷ Sakira, efukiirira yitula hu huwulira emboosi, haandi emboosi yitula hu huyaala Kristo.

¹⁸ Nae ndeeba endi: Syadyeeri siti haba sibawulira emboosi? Ngandi bawulira olwohuba koti ebyandiiko byoolerefu biboola biti: “Ekono lyaabwe lyawuliirihana ohwoola mu syaalo syoosi; emboosi chaabwe choola yi syaalo syaakama.”

¹⁹ Haandi ndeeba endi: Mani abaandu ba Yisiraeli haba sibamanya? Musa mweene niye owataangira ohukobolamo ati: “Njia ohwehoonyera esyaalo syali sitahoyera ohuwaambia abaandu baange ebihali-hali; haandi nindehoonyera esyaalo sy'abaandu basiru njia ohudiisa abaandu baange etima.”

²⁰ Haandi omunabbi Yisaaya kata ali neende obwomiifu n'aboola ati, “Abaandu bali nibatangoonya, nibo abanjakaana; ndabonehera abaandu bali nibateeba.”

²¹ Nae ebidiira hu Yisiraeli Yisaaya yaboola ati, “Ndasiingisa amahono kaange aakulu oludaalo lwoosi ohwakaanira abaandu batawulira haandi abajeemu.”